Ji shok shërbimi i mirë
1. Si mund ta imitojmë qëndrimin e apostullit Pavël kur predikojmë me të tjerët?
1 Apostulli Pavël e konsideronte kohën që kalonte me bashkëbesimtarët si mundësi ‘për të inkurajuar njëri-tjetrin’. (Rom. 1:12) A e shfrytëzoni kohën kur jeni me një lajmëtar tjetër në shërbim për ta inkurajuar e ndihmuar? Në vend që të jeni shok shërbimi i heshtur, pse të mos i tregoni çfarë ju ndihmon të keni sukses në shërbim?
2. Si t’ia forcojmë sigurinë shokut të shërbimit dhe pse ka rëndësi kjo?
2 Jepuni siguri: Disa lajmëtarë nuk ndihen të sigurt, dhe kjo mbase u pasqyrohet në shprehjet e fytyrës dhe në tonin e zërit. Mund t’ua forcojmë sigurinë duke u bërë lavdërime të sinqerta. A ka mënyra të tjera si t’u japim siguri? Një mbikëqyrës udhëtues ia tregon pa problem shokut të shërbimit pasiguritë që ndien dhe se lutet shpesh për ndihmë që të kapërcejë këtë ndjenjë. Një vëlla tjetër tregon çfarë e ndihmon të shfaqë siguri: «Filloj me një buzëqeshje. Ndonjëherë duhet të lutem që të arrij të bëj këtë veprim të thjeshtë.» A ka ndonjë gjë që ju ka ndihmuar të jeni më të sigurt në shërbim? Tregojani këtë shokut të shërbimit.
3. Çfarë mund t’i themi shokut të shërbimit që ta ndihmojmë të bëhet më i efektshëm?
3 Tregojuni metodat: A keni gjetur ndonjë hyrje ose pyetje të thjeshtë që ka pasur efekt për fillimin e bisedave, ndoshta diçka që ka lidhje me një ngjarje në vendin tuaj? A ke pasur rezultate të mira ngaqë i ke shtuar diçka nga vetja ndonjë prezantimi model? Tregojani shokut të shërbimit. (Prov. 27:17) Rrugës për te rivizita mund të tregoni çfarë synimi keni për vizitën dhe si keni menduar ta arrini. Pas një studimi biblik mund të shpjegoni pse zgjodhët të trajtoni atë pikë, atë shkrim ose atë metodë mësimdhënieje për ta ndihmuar studentin.
4. Pse duhet të përpiqemi të ndihmojmë të bashkëkrishterët?
4 Ungjillëzuesit e shekullit të parë nuk përpiqeshin të ndihmonin vetëm jobesimtarët. Ata kuptonin edhe sa rëndësi kishte të forconin e t’i jepnin zemër njëri-tjetrit. (Vep. 11:23; 15:32) Apostulli Pavël stërviti Timoteun e ri dhe e nxiti t’ua tregonte të tjerëve gjërat që kishte mësuar. (2 Tim. 2:2) Kur nuk harrojmë t’u bëjmë mirë të bashkëkrishterëve ndërsa jemi në shërbim, jo vetëm i ndihmojmë të jenë më të gëzuar e më të efektshëm, por edhe kënaqim Atin tonë qiellor.—Hebr. 13:15, 16.