Të kujtojmë ata që jetojnë në shtëpitë e të moshuarve
1. Pse duhet t’u flasim për lajmin e mirë edhe atyre që jetojnë në shtëpitë e të moshuarve?
1 Shumë veta po përballen me pasojat ligështuese të moshës së shkuar. (Ekl. 12:1-7) Në këtë moshë disa jetojnë në shtëpitë e të moshuarve, ose azile, prandaj nuk kemi gjithnjë mundësi t’i takojmë gjatë predikimit shtëpi më shtëpi. Kjo ndodh edhe në vendet ku është normale që prindërit e moshuar të jetojnë te fëmijët ose te të afërm të tjerë. Ndonëse të kufizuar në lëvizje e në kujtesë, të moshuarit e të tjerët që jetojnë në këto qendra mund të jenë ende në gjendje të mësojnë për Jehovain, ta njohin dhe ta duan. Si të arrijmë të flasim me ta për lajmin e mirë ‘të shpresës së lumtur’?—Titit 2:13.
2. Si të bëjmë një listë të shtëpive të të moshuarve që duam të vizitojmë?
2 Si të fillojmë? Në përgjithësi, me anë të numëratorit telefonik ose Internetit mund të bëhet një listë e azileve të një zone të caktuar. Kërko kategoritë: shtëpia e të moshuarve, qendër rezidenciale për të moshuarit, shërbime sociale (shoqërore) dhe të tjera të ngjashme. Mbikëqyrësi i shërbimit mund të organizojë lajmëtarë të kualifikuar që të vizitojnë secilën nga këto qendra. Me planifikim të mirë dhe mbështetje te Jehovai, shpesh është e mundur të fillohet një studim biblik në grup.—Prov. 21:5; 1 Gjon. 5:14, 15.
3, 4. (a) Me cilin duhet folur për të filluar një studim biblik në grup?(b) Si mund t’ia shpjegojmë qëllimin e këtij organizimi?
3 Mënyra si do të prezantohet studimi varet nga lloji i azilit. Në qendrat e mëdha me shumë të moshuar dhe anëtarë personeli, është më mirë t’i afrohemi recepsionistit e t’i kërkojmë të flasim me drejtorin e qendrës. Në qendrat e vogla për të moshuarit—shtëpi me pak të moshuar dhe dy a tre kujdestarë—mund të jetë më mirë të lëmë një takim që të flasim drejtpërdrejt me pronarin.
4 Në secilën rrethanë, shpjego se po harxhon vullnetarisht kohën për t’u dhënë zemër atyre që u pëlqen të lexojnë e të flasin për tregimet biblike. Pyet nëse ka ndonjë të moshuar që do të donte të merrte pjesë në një grup ku flitet për Biblën rreth 30 minuta çdo javë. Mund të përdoren një sërë botimesh, por shumë kanë parë se botimet Libri im i tregimeve biblike dhe Njeriu më i madh që ka jetuar ndonjëherë janë pritur goxha mirë. Ndoshta mund t’ia tregosh botimet drejtorit. Mbase caktoni ditën, orarin dhe vendin e studimit dhe zakonisht këto paraqiten në kalendarin e aktiviteteve në qendër. Mos ngurro të prezantohesh si Dëshmitar i Jehovait. Njëkohësisht ndihmoje drejtorin të kuptojë se nuk je atje për të drejtuar shërbesa fetare, por për të nxitur arsimimin biblik.
5. Cilat sugjerime praktike do ta bëjnë studimin të këndshëm dhe të dobishëm?
5 Drejtimi i studimit: Drejtimi i studimit varet nga rrethanat dhe ambienti i qendrës, prandaj ji elastik dhe i matur. Drejtuesi i studimit duhet të sjellë me vete disa kopje të botimit për studim dhe duhet t’i mbledhë prapë në fund të studimit. Për disa ndoshta nevojiten botime me shkronja të mëdha. Mund të lexohen paragrafët, të bëhen pyetjet e të jepen përgjigjet, siç bëjmë zakonisht. Ata që janë në gjendje dhe kanë dëshirë mund t’i ftosh të lexojnë paragrafë ose pjesë nga Bibla. Gjatë studimit ji i vëmendshëm, pozitiv dhe miqësor. Me lejen e drejtorit, me raste vër ndonjë video të organizatës që forcon besimin te Bibla ose që thekson mësimet që nxjerrim nga një tregim biblik. Ndoshta është e mundur që studimi të fillojë e të mbarojë me një lutje të thjeshtë. Madje disa lajmëtarë kanë përdorur edhe këngë të Mbretërisë.
6. Ç’të bësh kur dikush ka një kundërshtim?
6 Ç’të bësh nëse një i moshuar kundërshton diçka që lexohet a thuhet gjatë studimit? Përgjigju me maturi. (Kolos. 4:6) Mbase mund të tregosh një shkrim biblik që i përgjigjet tamam pyetjes së tij. Nëse kjo nuk është praktike, do të ishte më mirë ta merrje parasysh komentin e tij dhe t’i thoshe që do të flisni bashkë për pyetjen pas studimit.
7. Çfarë mund të bësh nëse dikush ka një pyetje personale ose tregon mjaft interes?
7 Ndonjëherë, dikush bën një pyetje ose shpreh dëshirën për të ditur më shumë. Në këto raste, një motër thotë: «Ke bërë një pyetje shumë të bukur. Por, meqë është pyetje personale, le ta shohim kur të mbarojmë leximin. Do ta diskutojmë së bashku.» Shpesh mund të organizohen gjërat që me të interesuarit të drejtohen studime biblike në një moment dhe rrethanë tjetër.
8. Si duhen shënuar studimi në grup dhe çdo studim biblik me individë të caktuar nga grupi?
8 Zakonisht është më mirë që studimin e grupit ta drejtojë i njëjti Dëshmitar. Çdo lajmëtar që merr pjesë mund ta shënojë kohën e shërbimit. Sapo të jetë vendosur si studim, lajmëtari që e drejton mund ta shënojë si rivizitë sa herë që grupi mblidhet për studimin. Gjithashtu, mund të shënojë një studim biblik çdo muaj. Njësoj mund të veprohet edhe për studimet biblike me individët e grupit që janë në gjendje të kuptojnë e të mësojnë.
9, 10. Çfarë cilësish duhet të kenë ata që përfshihen në këtë vepër? Shpjego.
9 Vazhdimi i studimit: Është më mirë të caktoni një ditë dhe orar për studimin me grupin. Të moshuarit dhe personeli do të presin që të mbahet rregullisht, si edhe të nisë e të mbarojë në kohë. (Mat. 5:37) Prandaj, kërkohet angazhim, zell e rregullsi. Përvoja ka treguar se është më mirë që për të drejtuar studimin e grupit të bashkëpunojnë dy lajmëtarë të kualifikuar. (Ekl. 4:9, 10) Kurse në qendrat e mëdha mund të nevojiten më shumë lajmëtarë.
10 Edhe ngrohtësia e interesi personal janë të rëndësishme. (Filip. 2:4) Në vizitën e parë, merr kohë që të takosh secilin pjesëtar të grupit. Mbaji shënim emrat dhe përpiqu t’ua mbash mend para se të shkosh për studimin tjetër. Gjithsesi, disa të moshuar fyhen nëse një i panjohur u drejtohet me «ti» në vend që me «ju». Ndaj, falë durimit e dhembshurisë suaj, të gjithë do të ndihen të mirëpritur dhe të vlerësuar.
11. Si mund të tregojnë respekt për personelin dhe familjarët e të moshuarve ata që drejtojnë studimin?
11 Është thelbësore të tregohet respekt e dashamirësi ndaj anëtarëve të personelit dhe familjarëve të të moshuarve. Nëse studimi është vendosur, është e mençur të mos ndryshohet orari dhe mënyra e drejtimit pa folur më parë me drejtorin. Herë pas here pyeteni drejtorin për ndikimin e studimit te pjesëmarrësit. Nëse familjarët vijnë për vizitë gjatë studimit, merrni iniciativën që t’i takoni. Shpjegojuni qëllimin e studimit të Biblës. Sigurojini për interesimin e sinqertë ndaj familjarit të tyre të moshuar. Ftojini të ulen e të dëgjojnë në studim.
12, 13. Thoni ndonjë përvojë që tregon dobitë e dëshmisë në shtëpitë e të moshuarve.
12 Rezultati: Mbikëqyrësit udhëtues dhe kongregacionet raportojnë rezultate inkurajuese për këtë aspekt të shërbimit. Në një rast, në diskutimin e parë u mblodhën 20 të moshuar. Kjo çoi në studime individuale me gjashtë prej tyre. Me kohë, njëri u pagëzua. Një studim në një qendër tjetër, e nxiti një 85-vjeçare të shoqërohej me kongregacionin afër saj dhe të shprehte dëshirën për t’u pagëzuar. Kur një qendër vendosi t’i mbyllte aktivitetet, pra të shpërbënte grupin e studimit që drejtonin Dëshmitarët e Jehovait, pjesëmarrësit u ankuan te drejtori. Si rezultat, studimi u rifillua dhe më pas në të merrnin pjesë 25 deri në 30 veta.
13 Dashuria që u tregojmë atyre që janë në shtëpitë e të moshuarve nuk u lë mbresa të thella vetëm të moshuarve. Për shembull, është e zakonshme që anëtarët e personelit të ulen e madje të marrin pjesë në studim. Përpjekjet tona për të shfaqur interes personal ndaj atyre në shtëpitë e të moshuarve i japin dëshmi të mirë edhe komunitetit. (1 Pjet. 2:12) Pasi i treguan qëllimin e studimit, një administrator tha: «Po ku keni qenë deri tani? Kur mund të filloni?» Një drejtor tjetër tha: «Do t’ia rekomandoja këtë studim në grup të gjitha azileve të zonës. Dëshmitarët e Jehovait e ofrojnë falas këtë shërbim si pjesë të veprës së shërbesës në komunitet.» Në Havai, një shtëpi e të moshuarve u dha Dëshmitarëve të Jehovait një fletë lavdërimi për shërbimin e mirë dhe i përshkruante vullnetarët si «thesar i vyer» për banorët e qendrës.
14. Pse duhet të kemi dëshirë që t’i ndihmojmë ata në shtëpitë e të moshuarve?
14 Jehovai i fton të moshuarit që ta lëvdojnë. (Psal. 148:12, 13) Kjo ftesë përfshin edhe ata në shtëpitë e të moshuarve. A ka në territorin tuaj qendra të tilla ku të moshuarit do të nxirrnin dobi nga dëgjimi i lajmit të mirë? Me ndihmën e pleqve të kongregacionit dhe të drejtorëve të shtëpive të të moshuarve, mund t’u japim dëshmi atyre që jetojnë atje. Kur i kujtojmë të moshuarit, imitojmë Jehovain.—Psal. 71:9, 18.