E drejtë apo e gabuar: Bibla siguron drejtim të besueshëm

Nëse i bazojmë vendimet vetëm te ndjenjat tona ose tek opinioni i të tjerëve, nuk mund të kemi sigurinë se do të dalin për mirë. Bibla tregon arsyen pse, por nuk mjaftohet vetëm me kaq. Ajo na ndihmon të kuptojmë edhe çfarë është e drejtë ose e gabuar, pra sekretin për një jetë të lumtur e të kënaqshme.

DREJTIMI PËR TË CILIN KEMI NEVOJË

Në Bibël, Perëndia Jehovaa shpjegon se na krijoi me nevojën që të kërkonim drejtimin e tij e jo të ishim të pavarur nga ai. (Jeremia 10:23) Ja pse në Bibël ka siguruar udhëzime për atë që është e drejtë ose e gabuar. Ai e do familjen njerëzore dhe dëshiron të na kursejë dhimbjen e zhgënjimin që vjen kur mësojmë duke e pësuar. (Ligji i përtërirë 5:29; 1 Gjonit 4:8) Përveç kësaj, si Krijuesi ynë, ai ka mençurinë dhe njohurinë e nevojshme për të na dhënë këshillat më të mira. (Psalmi 100:3; 104:24) Gjithsesi, Perëndia nuk i detyron kurrë njerëzit të jetojnë sipas standardeve të tij.

Jehovai i dha çiftit të parë, Adamit dhe Evës, gjithçka u duhej për të qenë vërtet të lumtur. (Zanafilla 1:28, 29; 2:8, 15) Gjithashtu u dha disa udhëzime të thjeshta dhe priste që t’u bindeshin. Megjithatë, ua la atyre në dorë të zgjidhnin nëse do t’i zbatonin apo jo ato udhëzime. (Zanafilla 2:9, 16, 17) Mjerisht, Adami dhe Eva zgjodhën të jetonin sipas standardeve të tyre dhe jo të Perëndisë. (Zanafilla 3:6) Cili ka qenë rezultati? A është më e lumtur familja njerëzore ngaqë vendos vetë se çfarë është e drejtë apo e gabuar? Jo. Historia ka vërtetuar se, kur shpërfillim standardet e Perëndisë, nuk kemi paqe dhe lumturi jetëgjatë.—Eklisiastiu 8:9.

Bibla na siguron drejtimin që na nevojitet për të marrë vendime të mençura, pavarësisht vendit ku jetojmë dhe prejardhjes. (2 Timoteut 3:16, 17; shih kutinë «Një libër për të gjithë njerëzit».) Shqyrto si e bën Bibla këtë.

Mëso më shumë pse me të drejtë Bibla quhet ‘fjala e Perëndisë’.—1 Selanikasve 2:13. Shih në jw.org videon Kush është autori i Biblës?

PSE DISA E HEDHIN POSHTË BIBLËN

Disa njerëz pohojnë se Bibla s’mund të sigurojë drejtim të mençur për atë që është e drejtë apo e gabuar. Ata ngrenë kundërshtimet e mëposhtme.

Kundërshtimi: «Bibla bie në kontradiktë me veten.»

Fakti: Në pamje të parë mund të duket sikur disa fragmente të Biblës bien në kontradiktë me njëra-tjetrën. Por, po të marrim parasysh kontekstin, faktet historike, zakonet, këndvështrimin e shkrimtarit dhe faktorë të tjerë, do të kuptojmë se në të vërtetë ato përputhen.

Për të parë disa shembuj konkretë, lexo artikullin «A ka mospërputhje në Bibël?», në jw.org.

Kundërshtimi: «Njerëzit që pohojnë se i përmbahen Biblës bëjnë gjëra të këqija, ndaj s’ka se si të jetë një udhërrëfyes i mirë.»

Fakti: Nuk duhet fajësuar Bibla për sjelljen e gabuar të atyre që nuk i zbatojnë mësimet e saj. Ajo kishte parathënë se shumë veta—ndër ta edhe udhëheqës fetarë—të cilët pohojnë se ndjekin Biblën, do të vepronin në kundërshtim me mësimet e saj. Gjithashtu thotë se kjo do të shkaktonte që mësimet e saj ‘të shaheshin’.—2 Pjetrit 2:1, 2.

Lexo artikullin «Feja: Thjesht një biznes gjigant?» në jw.org, për të parë se si shumë udhëheqës fetarë kanë devijuar nga ajo që thotë vërtet Bibla.

Kundërshtimi: «Bibla nxit intolerancën ndaj atyre që janë ndryshe.»

Fakti: Bibla inkurajon t’i trajtojmë të tjerët me respekt. Ajo nuk i miraton qëndrimet e mëposhtme:

Ta konsiderojmë veten më të lartë se të tjerët.—Filipianëve 2:3.
Të mos i respektojmë njerëzit që kanë vlera dhe bindje ndryshe nga tonat.—1 Pjetrit 2:17.
T’u imponojmë të tjerëve pikëpamjet tona.—Mateu 10:14.

Bibla tregon se Perëndia i trajton gjithmonë njerëzit me dashuri e paanësi, dhe se Ai dëshiron që ta imitojmë.—Romakëve 9:14.

Për më shumë informacion, lexo artikullin «Toleranca—Si na ndihmon Bibla», në jw.org.

BIBLA NA ZBULON DREJTIMIN E PERËNDISË

Bibla dokumenton me saktësi si ka vepruar Jehovai me njerëzimin që nga fillimi i historisë. Përmbajtja e saj na ndihmon të kuptojmë çfarë është e drejtë a e gabuar dhe çfarë është e dobishme a e dëmshme nga pikëpamja e Perëndisë. (Psalmi 19:7, 11) Prej saj mësojmë parime që vlejnë për çdo kohë e që na ndihmojnë të marrim vendime të mençura ditë pas dite.

Për shembull, shiko këtë këshillë që e gjejmë te Proverbat 13:20: «Kush ecën me të mençurit, do të bëhet i mençur, por atij që shoqërohet me të pamendët, do t’i shkojë keq.» Ky parim është po aq me vlerë sot, sa ç’ishte në kohët e lashta. Bibla është plot me parime të tilla praktike e të vlefshme.—Shih kutinë «Mençuria e Biblës nuk njeh kohë».

Por mbase pyet veten: «Si mund të jem i sigurt se drejtimi i Biblës funksionon edhe sot?» Në artikullin tjetër do të shohim disa histori reale.

a Jehova është emri i Perëndisë.—Psalmi 83:18.

MENÇURIA E BIBLËS NUK NJEH KOHË

Ndonëse Bibla përfundoi thuajse 2.000 vjet më parë, ajo ka ende vlerë për ne sot. Sepse në thelb, natyra njerëzore nuk ka ndryshuar—edhe sot duam të jemi të lumtur dhe të bëjmë një jetë të mirë. (Eklisiastiu 1:9) Mençuria e Biblës nuk njeh kohë dhe mund të na ndihmojë të arrijmë këtë synim.

Ndershmëria

«Duam të sillemi me ndershmëri në çdo gjë.»—Hebrenjve 13:18.
«Vjedhësi të mos vjedhë më, por më mirë të punojë pa u lodhur.»—Efesianëve 4:28.

Marrëdhëniet me të tjerët

«Secili të vazhdojë të kërkojë jo interesin e vet, por atë të tjetrit.» —1 Korintasve 10:24.
«Vazhdoni të duroni e të falni bujarisht njëri-tjetrin.»—Kolosianëve 3:13.

Marrja e vendimeve

«Naivët i besojnë çdo fjale, por mendjemprehtët matin çdo hap që hedhin.»—Proverbat 14:15.
«Mendjemprehti e dallon rrezikun dhe fshihet, kurse i papërvoji shkon përpara dhe vuan pasojat.»—Proverbat 22:3.