Një Bibël që i reziston kohës

PËR Dëshmitarët e Jehovait nuk ka libër më të rëndësishëm se Bibla. E studiojmë rregullisht dhe e përdorim që t’u mësojnë të tjerëve lajmin e mirë për Mbretërinë e Perëndisë. (Mat. 24:14) Prandaj, Dëshmitarët bënë të pamundurën që botimi i rishikuar i 2013-s i Shkrimeve të Shenjta—Përkthimi Bota e Re të ishte edhe me pamje dinjitoze, edhe t’i rezistonte kohës.

Kur përfaqësues të personelit të shtypshkronjës sonë në Uollkill, Nju-Jork, SHBA, i diskutuan planet me shefin e një kompanie libralidhjeje, ai u tha: «S’ka si të bëhet një Bibël siç e doni ju.» Pastaj shtoi: «Është një e vërtetë e hidhur, por shumica e Biblave bëhen enkas për të zbukuruar një tryezë a një raft, jo që të jenë shumë rezistente.»

Disa botime të mëparshme të Përkthimit Bota e Re prisheshin kollaj. Teksa përpiqeshin të prodhonin një Bibël që t’i bënte ballë përdorimit të shpeshtë në çdo lloj moti, punonjësit e shtypshkronjës analizuan materialet për kapakun, ngjitësit dhe metodat e libralidhjes. Bazuar te rezultatet e kërkimeve, prodhuan mostra të Biblës dhe ua dërguan për provë në terren Dëshmitarëve në vende me klimë nga më ekstremet.

Pas gjashtë muajsh, Biblat i kthyen për t’i analizuar dhe vëllezërit bënë ca përmirësime e dërguan një sasi tjetër mostrash. U provuan më shumë se 1.690 Bibla. Disa prej tyre u keqtrajtuan pa dashje. Për shembull, njërën e shtypi një makinë, një tjetër e harruan tërë natën jashtë në shi dhe një tjetër akoma e përmbytën ujërat e një uragani.

Më 2011, ndërsa bëheshin provat në terren, u ble një pajisje e re libralidhjeje me shpejtësi të madhe për shtypshkronjat në Uollkill dhe në Ebinë, Japoni. Kështu jo vetëm që duhej prodhuar sasia e nevojshme për tirazhin e parë, por duhej edhe që Biblat në të dy shtypshkronjat të ngjanin fiks njësoj.

Probleme me kapakët që përthyheshin

Në fillim të 2012-s dy shtypshkronjat nisën shtypjen e botimit të 1984-s të Përkthimit Bota e Re, duke përdorur material të ri për kapakun. Mirëpo, pajisjet e reja përdornin për veshjen e brendshme të kapakut një material dhe një ngjitës të paprovuar në terren. Këta kapakë përthyheshin tepër, ndaj shtypja e tyre u ndërpre.

Prodhuesit e njërit prej materialeve thanë se përthyerja ishte problem i njohur në industrinë e libralidhjes, prandaj mendonin se s’kishte zgjidhje. Megjithatë, në vend që të ktheheshin te kapaku i ngurtë, vëllezërit ishin të vendosur të prodhonin një Bibël me kapak elastik, rezistent e me pamje dinjitoze. Pasi provuan për katër muaj gjithfarë kombinimesh të ngjitësit dhe të materialit për veshjen e brendshme, gjetën një kombinim me të cilin mund të rifillonte prodhimi—kësaj here për Bibla me kapak elastik që nuk do të dëmtoheshin.

Ishte programuar që botimi i rishikuar i Përkthimit Bota e Re të dilte më 5 tetor 2013, në mbledhjen vjetore të Watch Tower Bible and Tract Society of Pennsylvania. Shtypshkronjat e morën materialin elektronik përfundimtar për Biblën e re të premten, më 9 gusht 2013 dhe shtypja nisi të nesërmen. Bibla e parë e plotë u prodhua më 15 gusht. Gjatë shtatë javëve vijuese, shtypshkronjat në Uollkill dhe Ebinë punuan ditë e natë që të prodhonin e të transportonin mbi 1.600.000 Bibla. Kështu, çdokush që do të ndiqte mbledhjen vjetore do të merrte një kopje.

Bibla e re është e bukur dhe rezistente, por mesazhi i saj jetëdhënës është akoma më tërheqës. Një ditë pasi mori Biblën e re, një motër nga Shtetet e Bashkuara shkroi: «Falë botimit të ri, arrij ta kuptoj më mirë Biblën.»