Si ta shmangësh «divorcin gri»?

Nga 1990-a deri në 2015-n, në Shtetet e Bashkuara u dyfishua numri i divorceve për moshat mbi 50 vjeç dhe u trefishua për ato mbi 65 vjeç. Situata është e ngjashme edhe në shumë vende të Evropës. Studiuesit kanë krijuar shprehjen «divorci gri» për të përshkruar numrin gjithnjë e në rritje të divorceve mes personave të njëfarë moshe. Cilat janë shkaqet e «divorcit gri»? Ç’mund të bësh që ky fenomen të mos infektojë martesën tënde?

Në këtë artikull

• Cilat janë shkaqet e divorcit gri?

• Ç’mund të bësh?

• Pyetje për diskutim

Cilat janë shkaqet e divorcit gri?

• Shpesh, çiftet në moshë divorcohen thjesht sepse, ndër vite, marrëdhënia mes tyre është ftohur. Me kalimin e kohës, disa burra e gra kanë zhvilluar interesa të ndryshme dhe duket sikur nuk kanë më shumë gjëra të përbashkëta. Në raste të tjera, pasi fëmijët kanë dalë në shtëpi më vete, bashkëshortët mund të kuptojnë se kanë qenë të përqendruar për një kohë kaq të gjatë te roli si baba dhe nënë, sa kanë harruar ç’do të thotë të jesh burrë e grua.

• Dekadat e fundit, ata që konsiderohen ekspertë në fushën e martesës i kanë këshilluar bashkëshortët të përqendrohen te nevojat individuale. «A më bën të lumtur martesa?» «A po më bën një person më të mirë?» «A m’i plotëson bashkëshorti nevojat emocionale?» Nëse përgjigjja për këto pyetje është jo, atëherë, sipas mentalitetit të sotëm, duhet të bësh atë që është më e mira për ty, pra të divorcohesh dhe të fillosh një jetë të re.

• Divorci e ka humbur stigmën që kishte dikur. Sociologu Erik Klajnenberg shkruan: «Jo shumë kohë më parë, dikush që ishte i pakënaqur me bashkëshortin dhe donte të divorcohej, duhej ta justifikonte këtë vendim. Kurse sot ndodh e kundërta: nëse nuk ndihesh i plotësuar në martesë, duhet të japësh justifikime pse nuk po divorcohesh, ngaqë presioni social për të qenë i mirë me veten është shumë i madh.»a

E vërteta është se shpesh divorci thjesht të heq disa probleme, ama të sjell të tjera. Për shembull, një studim zbuloi se «divorci gri shpesh shkakton probleme të mëdha financiare, sidomos për gratë».

Ka edhe diçka tjetër që duhet marrë parasysh. «Edhe nëse po mendon të ndryshosh jetën tënde, mos harro se ti je po i njëjti,—thotë një libër.—Çfarë ke bërë për të ndryshuar mënyrën e komunikimit që nuk funksionon me bashkëshortin? Çfarë ke bërë për të ndryshuar mënyrën si i trajton mosmarrëveshjet?»b—Libri Don’t Divorce (Mos u divorco).

Ç’mund të bësh?

• Prano faktin që gjërat ndryshojnë. Asnjë marrëdhënie nuk qëndron gjithmonë njësoj. Marrëdhënia me bashkëshortin mund të ketë ndryshuar ngaqë fëmijët janë larguar ose ngaqë keni zhvilluar interesa të ndryshme. Në vend që të përqendroheni si ishin gjërat në të kaluarën, mendoni si t’i përmirësoni gjërat tani e tutje.

  

  Parim nga Bibla: «Mos thuaj: ‘Si ka mundësi që ditët e kaluara ishin më të mira se të tanishmet?’, sepse kjo pyetje nuk është aspak e mençur.»—Eklisiastiu 7:10.

• Forconi miqësinë me njëri-tjetrin. A mund të zhvillosh interes për diçka që i intereson bashkëshortit tënd, ose a mund ta përfshish në gjëra që të pëlqejnë ty? A mund të krijoni hapësirë për aktivitete të reja që ju pëlqejnë të dyve? Synimi duhet të jetë të kaloni më shumë kohë së bashku, me qëllim që të ndiheni më shumë si burrë e grua, sesa si dy njerëz që thjesht banojnë në të njëjtën shtëpi.

  

  Parim nga Bibla: «Secili të vazhdojë të kërkojë jo interesin e vet, por atë të tjetrit.»—1 Korintasve 10:24.

• Mos i harroni rregullat e mirësjelljes. Edhe nëse keni vite martesë, vazhdoni të bëni gjeste kortezie. Flitini me respekt njëri-tjetrit dhe përpiquni të jeni të sjellshëm siç ishit kur po njiheshit. Thoni «të lutem» dhe «faleminderit». Shpreheni rregullisht dashurinë dhe tregoni mirënjohje për gjërat që bën bashkëshorti për ju.

  

  Parim nga Bibla: «Jini zemërmirë me njëri-tjetrin [dhe] zemërdhembshur.»—Efesianëve 4:32.

• Kujtoni kohët e bukura. Shihni së bashku fotografitë e dasmës ose të momenteve të tjera të bukura që keni kaluar të dy. Kjo mund t’ju ndihmojë të ruani e madje të rindizni dashurinë dhe respektin për njëri-tjetrin.

  

  Parim nga Bibla: «Secili nga ju duhet ta dojë gruan si veten, dhe gruaja duhet të ketë respekt të thellë për burrin.»—Efesianëve 5:33.