Një botë e re sipas premtimit të Perëndisë

BIBLA, Fjala e shkruar e Perëndisë, na mbush plot me shpresë kur thotë: «Sipas premtimit të tij, ne presim qiej të rinj e një tokë të re dhe në ta ka për të banuar drejtësia.»​—2 Pjetrit 3:13.

Çfarë janë ‘qiejt e rinj’? Bibla e lidh qiellin me sundimin. (Veprat 7:49) ‘Qiejt e rinj’ përbëjnë një qeveri të re që do të sundojë mbi tokën. Është e re sepse do të zëvendësojë sistemin e tanishëm të sundimit; është po ashtu një zhvillim i ri në përmbushjen e qëllimit të Perëndisë. Kjo është Mbretëria për të cilën Jezui na mësoi të lutemi. (Mateu 6:10) Meqë Nismëtari i saj është Perëndia dhe ai banon në qiell, është quajtur ‘mbretëria e qiejve’.​—Mateu 7:21.

Çfarë është ‘toka e re’? Nuk është një planet i ri, sepse Bibla thotë me qartësi që toka do të banohet përgjithnjë. ‘Toka e re’ është një shoqëri e re njerëzore. Do të jetë e re, sepse njerëzit e ligj do të jenë shfarosur. (Fjalët e urta 2:21, 22) Të gjithë ata që do të jetojnë në atë kohë do ta nderojnë Krijuesin, do t’i binden atij dhe do të jetojnë në harmoni me kërkesat e tij. (Psalmi 22:27) Ftesa për të mësuar këto kërkesa dhe për të jetuar që tani në harmoni me to po u bëhet njerëzve të të gjitha kombeve. Ti, a po vepron kështu?

Në botën e re të Perëndisë, të gjithë do ta respektojnë sundimin e Tij. A të nxit dashuria për Perëndinë që t’i bindesh? (1 Gjonit 5:3) A është e dukshme kjo në shtëpinë tënde? Në punë a në shkollë? Në mënyrën si po jeton?

Në këtë botë të re, shoqëria njerëzore do të jetë e bashkuar në adhurimin e Perëndisë së vërtetë. A e adhuron Krijuesin e qiellit dhe të tokës? A të bashkon vërtet adhurimi yt me bashkadhuruesit e tjerë nga të gjitha kombet, racat dhe gjuhët?​—Psalmi 86:9, 10; Isaia 2:2-4; Sofonia 3:9.

[Kutia në faqen 17]

Perëndia që i premton këto gjëra

Është Krijuesi i qiejve fizikë dhe i planetit Tokë. Është ai të cilin Jezu Krishti e identifikoi si ‘i vetmi Perëndi i vërtetë’.​—Gjoni 17:3.

Shumica e njerëzve sot nderojnë perëndi që i kanë bërë vetë. Miliona veta përkulen para shëmbëlltyrave të pajeta. Të tjerë ngrenë lart institucionet njerëzore, filozofitë materialiste ose vetë dëshirat e tyre. Edhe ndër ata që thonë se bazohen te Bibla, jo të gjithë e nderojnë emrin e atij që Bibla e identifikon si ‘Perëndia i vërtetë’.​—Ligji i përtërirë 4:35, BR.

Krijuesi thotë për veten e tij: «Unë jam Jehovai. Ky është emri im.» (Isaia 42:5, 8, BR) Emri i tij përsëritet rreth 7.000 herë në Bibël, në gjuhët origjinale. Jezu Krishti u mësoi ithtarëve të luten: «Ati ynë që je në qiej, u shenjtëroftë emri yt.»​—Mateu 6:9.

Ç’lloj personi është Perëndia i vërtetë? Ai e përshkruan veten si një person «i mëshirshëm dhe i dhembshur, i ngadalshëm në zemërim, i pasur në mirësi dhe në besnikëri», por edhe si një person që nuk i lë pa ndëshkuar ata që me dashje shkelin urdhërimet e tij. (Eksodi 34:6, 7) Mënyra si ka vepruar me njerëzimin gjatë historisë e vërteton këtë përshkrim.

Emri, si edhe personi të cilin paraqet ky emër, duhen shenjtëruar ose trajtuar si të shenjtë. Duke qenë Krijuesi dhe Sovrani Universal, ai e meriton t’i bindemi dhe ta adhurojmë. A i bën ti këto?

[Kutia dhe figura në faqen 18]

Ç’ndryshime do të sjellin ‘qiejt e rinj dhe toka e re’?

Toka do të kthehet në parajsë Luka 23:43

[Kutia dhe figurat në faqen 19]

A do të nxjerrësh dobi?

Perëndia nuk mund të gënjejë!​—Titit 1:2.

Jehovai thotë: «Fjala ime . . . nuk do të më kthehet bosh mua, pa kryer atë që dëshiroj dhe pa realizuar plotësisht atë për të cilën e dërgova.»​—Isaia 55:11.

Jehovai ka filluar tashmë të krijojë ‘qiejt e rinj dhe tokën e re’. Qeveria qiellore tashmë është duke vepruar. Themeli për ‘tokën e re’ tashmë është hedhur.

Pasi tregon disa nga gjërat e mrekullueshme që do të bëjnë ‘qielli i ri dhe toka e re’ për njerëzimin, libri i Zbulesës citon vetë fjalët e Perëndisë si Sovrani Universal: «Ja, unë po bëj çdo gjë të re.» Ai thotë gjithashtu: «Shkruaj, sepse këto fjalë janë të besueshme dhe të vërteta.»​—Zbulesa 21:1, 5.

Pyetja thelbësore është: A po i bëjmë ndryshimet e nevojshme që të llogaritemi të denjë për të qenë pjesë e ‘tokës së re’ nën sundimin e ‘qiejve të rinj’?