Hyrje për t’u përdorur në shërbim

Komente: Që të përcaktosh se ç’hyrje duhet të përdorësh në shërbim, ki parasysh sidomos tri gjëra: (1) Mesazhi që na është ngarkuar të shpallim, është «ky lajm i mirë për mbretërinë». (Mat. 24:14) Edhe kur nuk flasim drejtpërdrejt për të, duhet të kemi ndër mend se si t’i ndihmojmë njerëzit të kuptojnë që kanë nevojë për lajmin e mirë, ose se si të kapërcejmë ato gjëra që mund të pengojnë dëshirën e tyre për të shqyrtuar lajmin e mirë. (2) Interesi i sinqertë për mirëqenien e njerëzve që takojmë, do të na ndihmojë, ashtu si ndihmoi edhe Jezuin, që t’u prekim zemrën. (Mar. 6:34) Këtë interes të sinqertë mund ta tregojmë me një buzëqeshje të ngrohtë dhe një sjellje miqësore, me gatishmërinë për t’i dëgjuar njerëzit kur flasin, duke i përshtatur pastaj fjalët tona me komentet e tyre, si dhe me anë të pyetjeve që i nxitin ata të shprehen, në mënyrë që t’i kuptojmë më mirë pikëpamjet e tyre. Letra e parë drejtuar korintasve, në kapitullin 1 Kor. 9:19-23, tregon se apostulli Pavël ua përshtaste prezantimin e lajmit të mirë rrethanave të njerëzve me të cilët fliste. (3) Në disa vende të botës, nga vizitorët pritet që të respektojnë disa formalitete para se të thonë për ç’arsye kanë ardhur. Kurse në vende të tjera, i zoti i shtëpisë pret që vizitori i paftuar të futet drejt e në temë.​—Krahaso Lukën 10:5.

Hyrjet që janë më poshtë, tregojnë se në ç’mënyrë i fillojnë bisedat disa lajmëtarë me përvojë. Nëse me hyrjet që po përdor tani rrallëherë arrin të hapësh biseda, atëherë provo disa nga këto sugjerime. Sigurisht që këtë do ta bësh duke përdorur fjalët e tua. Veç kësaj, sugjerime të dobishme mund të të japin edhe lajmëtarë të tjerë të kongregacionit, që kanë sukses në bisedat me njerëzit.

ARDHMJA (E)/​SIGURIA

● ‘Mirëmëngjes! Si jeni, mirë? . . . Po përpiqemi sot t’u tregojmë fqinjëve tanë një pikëpamje pozitive për të ardhmen. A përpiqeni edhe ju ta shihni jetën me këtë sy? . . . A mendoni se për shkak të disa rrethanave, është e vështirë të jemi optimistë? . . . Unë për vete kam parë që Bibla është një ndihmë e madhe në këtë drejtim. Ajo përshkruan me realizëm gjendjen e ditëve tona, na shpjegon çfarë do të thotë kjo gjendje, dhe tregon se cili do të jetë rezultati. (Luka 21:10, 11, 31)’

● ‘Si po ia kaloni, mirë? Mua më quajnë ​—​—, po juve? Sot po nxitja të rinjtë si ju, që të mendojnë për shpresën e madhe që përmban Bibla për ne. (Lexo një shkrim, si për shembull, Zbulesën 21:3, 4.) A ju pëlqen?’

BIBLA/PERËNDIA

● ‘Mirëdita! Kam ardhur t’ju bëj një vizitë të shkurtër, që t’ju jap edhe juve një lajm të rëndësishëm. Ju lutem, shikoni çfarë thuhet këtu në Bibël. (Lexo shkrimin, p.sh. Zbulesën 21:3, 4.) Si mendoni për këtë? A ju pëlqen?’

● ‘Po flasim me fqinjët se ku mund të gjejmë një ndihmë praktike për të përballuar problemet e jetës. Dikur, shumë njerëz i drejtoheshin Biblës. Kurse sot po jetojmë në një kohë kur shumë gjëra kanë ndryshuar. Si mendoni? A besoni që Bibla është Fjala e Perëndisë, apo mendoni se ajo është thjesht një libër i shkruar nga njerëzit? . . . Nëse është nga Perëndia, si mund të jemi të sigurt për këtë?’ (Shih faqet 52-61, te tema «Bibla».)

● ‘Gëzohem që po ju gjej në shtëpi. Sot po u tregoja fqinjëve një mendim inkurajues nga Bibla (ose nga Shkrimet e Shenjta). A keni menduar ndonjëherë: . . . ? (Bëj ndonjë pyetje që i hap rrugë argumentit që ke zgjedhur për të diskutuar.)’

● ‘Sot po i inkurajojmë njerëzit të lexojnë Biblën. Shpesh, ata habiten nga përgjigjet që u jep Bibla pyetjeve të rëndësishme. Për shembull: . . . (Psal. 104:5; ose Dan. 2:44; a ndonjë shkrim tjetër).’

● ‘Sot po u bëjmë nga një vizitë të shkurtër fqinjëve. Disa nga njerëzit me të cilët flasim, kanë besim te Perëndia. Disa të tjerë e kanë të vështirë të besojnë. Po ju, si mendoni? . . . Bibla na inkurajon të mendojmë për universin fizik. (Psal. 19:1) Ai që ka vendosur ligje për të kontrolluar këta trupa qiellorë, ka dhënë drejtim të çmuar edhe për ne njerëzit. (Psal. 19:7-9)’ (Shih edhe faqet 278-285, 205-210, te temat «Perëndia» dhe «Krijimi».)

DASHURIA/DASHAMIRËSIA

● ‘Kemi parë se shumë njerëz janë mjaft të shqetësuar nga mungesa e dashurisë së vërtetë në botë. A ndiheni edhe ju kështu? . . . Si mendoni, përse njerëzit janë bërë kaq të ftohtë? . . . A e dinit se Bibla e kishte parathënë këtë situatë? (2 Tim. 3:1-4) Ajo shpjegon edhe arsyen. (1 Gjon. 4:8)’

● ‘Mua më quajnë ​—​—, dhe banoj në lagjen tuaj. Po u bëja një vizitë të shkurtër fqinjëve për t’u folur për diçka që mua më shqetëson së tepërmi, por që jam i sigurt se edhe ju do ta keni vërejtur. Nuk na kushton shumë të shfaqim dashamirësi, mirëpo, me sa duket, sot kjo cilësi është e rrallë. A keni menduar ndonjëherë përse kemi arritur deri këtu? . . . (Mat. 24:12; 1 Gjon. 4:8)’

DITËT E FUNDIT

● ‘Qëllimi i vizitës sonë është të flasim për domethënien e ngjarjeve që po ndodhin sot në botë. Vërehet se shumë njerëz nuk kanë më interes për Perëndinë dhe për normat e jetesës, që ai ka shprehur në Shkrimet e Shenjta. Kjo ka ndikuar shumë në qëndrimin e njerëzve ndaj njëri-tjetrit. Ju lutem, a mund të lexojmë së bashku këtë përshkrim te 2 Timoteut 3:1-5, dhe të më thoni nëse përshtatet me botën e sotme? (Lexoje) . . . A kemi arsye të vlefshme për të pritur përmirësimin e kushteve në të ardhmen? (2 Pjet. 3:13)’

● ‘Shumë njerëz besojnë se kjo botë i ka ditët e numëruara. Ata flasin për kohën në të cilën jetojmë, si për «ditët e fundit». Por, a e dinit që Bibla thotë se si mund të mbijetojmë, kur të vijë fundi i kësaj bote, dhe të jetojmë në një tokë të kthyer në parajsë? (Sof. 2:2, 3)’ (Shih edhe faqet 82-90, te tema «Ditët e fundit».)

Shih edhe pjesën «Ngjarjet e fundit», në këtë listë me sugjerime për hyrje.

FAMILJA/FËMIJËT

● ‘Po flasim me ata njerëz që interesohen se si t’i përballojnë më mirë problemet e jetës familjare. Edhe pse të gjithë përpiqemi të bëjmë më të mirën që mundemi, na intereson të dimë a ka diçka që mund të na ndihmojë të kemi më shumë sukses, apo jo? . . . (Kolos. 3:12, 18-21) Bibla përmban një shpresë, që ofron një të ardhme të vërtetë për familjet tona. (Zbul. 21:3, 4)’

● ‘Të gjithë dëshirojmë që fëmijët tanë të kenë një jetë të lumtur. Por, a mendoni se kemi arsye të vlefshme të besojmë se problemet që ka sot bota do të zgjidhen për mirë? . . . Si mendoni, në ç’botë do të jetojnë fëmijët tanë kur të rriten? . . . Bibla tregon që Perëndia do ta kthejë tokën në një vend të mrekullueshëm për të jetuar. (Psal. 37:10, 11) Megjithatë, nëse fëmijët tanë do të jenë atje apo jo, varet në një masë të madhe nga zgjedhjet që bëjmë ne. (Ligj. 30:19)’

HARMAGEDONI

● ‘Shumë njerëz i tremb fjala Harmagedon. Ata i kanë dëgjuar udhëheqësit botërorë ta përdorin këtë term kur flasin për një luftë të përgjithshme bërthamore. Si mendoni ju, ç’do të sjellë Harmagedoni për njerëzimin? . . . Në fakt, termi Harmagedon është marrë nga Bibla, dhe ka të bëjë me diçka krejt të ndryshme nga kuptimi që përdoret zakonisht. (Zbul. 16:14, 16) Po ashtu, Bibla na tregon edhe se çfarë mund të bëjmë personalisht që të mbijetojmë. (Sof. 2:2, 3)’ (Shih edhe faqet 167-172, te tema «Harmagedoni»)

JETA/LUMTURIA

● ‘Po u bëjmë një vizitë fqinjëve tanë për të gjetur ata njerëz që janë thellësisht të interesuar për domethënien e jetës. Shumë veta gëzojnë njëfarë lumturie. Megjithatë, hasin edhe mjaft probleme. Me kalimin e viteve, e kuptojmë se jeta është e shkurtër. Si mendoni, kaq është gjithë jeta? . . . (Komento për qëllimin fillestar të Perëndisë në Eden, dhe pastaj për Gjonin 17:3 dhe Zbulesën 21:3, 4.)’ (Shih edhe faqet 183-188, te tema «Jeta».)

● ‘Pyetja që po u bëjmë sot fqinjëve tanë, është se çfarë mendojnë kur lexojnë në Bibël shprehjen “jetë e përhershme”. Është mjaft interesante, sepse kjo shprehje del pothuajse 40 herë në Bibël. Ç’domethënie mund të ketë për ne jeta e përhershme? . . . Si mund ta arrijmë? (Gjoni 17:3; Zbul. 21:4)’

● ‘Sot po flasim me ata njerëz që janë vërtet të interesuar për cilësinë e jetës. Shumë nga ne jemi të lumtur që jetojmë, megjithatë, shumë të tjerë pyesin veten nëse është e mundur një jetë vërtet e lumtur. Si mendoni ju për këtë? . . . Sipas jush, cila është sot një nga pengesat më të mëdha për lumturinë? . . . (Psal. 1:1, 2; ose shkrime të tjera që përputhen me shqetësimin e të zotit të shtëpisë)’

KRIMI/SIGURIA

● ‘Mirëmbrëma! Sot po flasim me njerëzit për çështjet e sigurisë së individit. Ndodhin plot krime përreth nesh, dhe këto ndikojnë në jetën tonë. A mendoni se do të vijë ndonjëherë koha kur njerëzit si ju dhe unë, të ecin të sigurt rrugëve edhe natën? (Ose: A mendoni se dikush ka një zgjidhje të vërtetë për këtë problem?) . . . (Prov. 15:2; Psal. 37:10, 11)’

● ‘Më quajnë ​—​—, dhe banoj këtu afër. Sot në mëngjes po dëgjoja rrugës që të gjithë njerëzit flitnin për (përmend ndonjë krim që ka ndodhur kohët e fundit në lagje ose ndonjë çështje me interes për atë zonë). Ç’mendoni për këtë? . . . A mendoni se ka ndonjë gjë që mund të na e bëjë jetën më të sigurt? . . . (Prov. 1:33; 3:5, 6)’

LUFTA/PAQJA

● ‘Pothuajse të gjithë sot janë të shqetësuar për rrezikun e një lufte bërthamore. A mendoni se do të shohim ndonjëherë paqe të vërtetë në tokë? . . . (Psal. 46:8, 9; Isa. 9:6, 7)’

● ‘Sot po kërkoj njerëz që kanë qejf të jetojnë në një botë pa luftë. Vetëm në shekullin e kaluar ka pasur me qindra luftëra, duke përfshirë edhe dy luftëra botërore. Sot kërcënohemi nga rreziku i një konflikti bërthamor. Ju si mendoni, çfarë duhet bërë që të shmanget një luftë e tillë? . . . Kush është në gjendje të sjellë një botë paqësore? . . . (Mik. 4:2-4)’

● ‘Pothuajse çdokush thotë se dëshiron paqe botërore. Të njëjtën gjë thonë edhe pjesa më e madhe e udhëheqësve të botës. Përse, atëherë, është kaq e vështirë të vendoset paqja? . . . (Zbul. 12:7-12)’

MBRETËRIA

● ‘Duke folur me fqinjët e mi, kam vërejtur se shumë prej tyre dëshirojnë të jetojnë nën një qeveri që mund t’i zgjidhë vërtet problemet e mëdha që hasim sot: krimin dhe koston e lartë të jetesës (ose ndonjë gjë tjetër, që është e freskët në mendjet e njerëzve). Do të ishte diçka e bukur, apo jo? . . . A ka sot ndonjë qeveri të tillë? . . . Faktikisht, shumë veta janë lutur për një qeveri që mund t’i bëjë këto gjëra. Ndoshta edhe ju jeni lutur, por problemi është se pak veta e konsiderojnë atë si një qeveri të vërtetë. (Dan. 2:44; Psal. 67:6, 7; Mik. 4:4)’ (Shih edhe faqet 245-253 dhe 303-307, te temat «Mbretëria» dhe «Qeveria».)

● ‘Po u bënim një pyetje fqinjëve, dhe do ta vlerësonim edhe komentin tuaj për të. Ndoshta e dini se Jezui na mësoi të lutemi që të vijë Mbretëria e Perëndisë dhe që vullneti i Tij të bëhet edhe në tokë si në qiell. A mendoni se kjo lutje do të plotësohet ndonjëherë, dhe se vullneti i Perëndisë do të bëhet vërtet këtu në tokë? . . . (Isa. 55:10, 11; Zbul. 21:3-5)’

● ‘Po bisedoja me fqinjët për një çështje me të cilën duhet të përballemi të gjithë: a na pëlqen më shumë një qeveri nga Perëndia, apo sundimi njerëzor? Duke parë kushtet e sotme botërore, a mendoni se kemi nevojë për diçka të ndryshme nga ajo që kanë arritur të bëjnë njerëzit? . . . (Mat. 6:9, 10; Psal. 146:3-5)’

NGJARJET E FUNDIT

● ‘Mirëmëngjes! Mua më quajnë ​—​—, dhe banoj në (emri i rrugës ose lagjja). A i patë lajmet mbrëmë? . . . Ç’mendoni për atë lajmin që fliste për (përmend ndonjë ngjarje të fundit me interes). Nuk është e pazakontë që njerëzit të pyesin: “Ku po shkon kështu kjo botë?” Si Dëshmitarë të Jehovait, ne besojmë se po jetojmë në kohën që Bibla e quan «ditët e fundit». Shikoni këtë përshkrim të hollësishëm në shkrimin e 2 Timoteut 3:1-5.’ (Shih edhe faqet 82-90.)

● ‘A e keni lexuar këtë lajm në gazetat e kësaj jave? (Trego ndonjë pjesë gazete të prerë.) Çfarë mendoni? . . . ?’

● ‘Doja t’ju bëja një pyetje. Sikur të kishit mundësi, cilin nga problemet e shumta të botës do të zgjidhnit të parin?’ (Pasi të kesh parë se çfarë e shqetëson më tepër të zotin e shtëpisë, përdore argumentin si bazë për bisedën.)

PADREJTËSITË/VUAJTJET

● ‘A e keni pyetur ndonjëherë veten, nëse Perëndia interesohet për padrejtësitë dhe vuajtjet që kalojnë njerëzit? . . . (Ekl. 4:1; Psal. 72:12-14)’ (Shih edhe temat «Vuajtjet» dhe «Inkurajimi».)

PLEQËRIA/VDEKJA

● ‘A e keni pyetur ndonjëherë veten përse plakemi dhe vdesim? Disa breshka deti jetojnë me qindra vjet. Disa pemë jetojnë me mijëra vjet. Kurse ne njerëzit jetojmë 70 a 80 vjet, e pastaj vdesim. A keni menduar ndonjëherë përse? . . . (Rom. 5:12) A do të ndryshojë ndonjë ditë kjo gjendje? . . . (Zbul. 21:3, 4)’

● ‘A keni menduar ndonjëherë nëse vdekja është fundi i gjithçkaje? Apo ka ndonjë gjë tjetër pas vdekjes? . . . Bibla na sqaron çdo pyetje që mund të kemi për vdekjen. (Ekl. 9:5, 10) Ajo tregon, gjithashtu, se për njerëzit me besim, ekziston një shpresë e vërtetë. (Gjoni 11:25)’ (Shih edhe faqet 425-431 dhe 173, te temat «Vdekja» dhe «Inkurajimi».)

PUNA/STREHIMI

● ‘Po bisedonim me fqinjët se ç’mund të bëhet që gjithkush të ketë punë dhe strehim. A besoni që është e arsyeshme ta presim realizimin e këtyre gjërave nga qeveritë njerëzore? . . . Është dikush që e di se si t’i zgjidhë këto probleme; ky është Krijuesi i njerëzimit. (Isa. 65:21-23)’

● ‘Sot po shkëmbejmë disa mendime me njerëzit për qeverisjen e mirë. Shumica e njerëzve dëshirojnë të kenë një qeveri të pakorruptuar, që t’u sigurojë punë dhe strehim të mirë të gjithëve. Ju si mendoni, ç’lloj qeverie mund t’i bëjë këto? . . . (Psal. 97:1, 2; Isa. 65:21-23)’ (Shih edhe faqet 303-307, te tema «Qeveria».)

STUDIME BIBLIKE NË SHTËPI

● ‘Arsyeja e vizitës sime është që t’ju ofroj një kurs biblik falas. Po të ishte e mundur, për pak minuta do t’ju tregoja se si njerëz në pothuajse 200 vende diskutojnë për Biblën së bashku si familje. Mund të përdorim si bazë për bisedën secilën nga këto tema. (Tregoji tabelën e përmbajtjes së librit të studimit.) Cila ju tërheq veçanërisht?’

● ‘Po u tregonim fqinjve këtë botim ndihmës për studimin e Biblës. (Tregoja.) A e keni parë ndonjëherë? . . . Nëse keni pak minuta, doja t’ju tregoja se si mund ta përdorni bashkë me Biblën tuaj.’

KUR SHUMË NJERËZ THONË: ‘KAM FENË TIME’

● ‘Mirëmëngjes! Sot po vizitojmë të gjitha familjet e kësaj shkalle (lagjeje), dhe kemi parë se shumë kanë fenë e tyre. Pa dyshim që edhe ju keni fenë tuaj. . . . Megjithatë, pavarësisht nga feja që kemi, të gjithë prekemi nga të njëjtat probleme: kostoja e lartë e jetesës, kriminaliteti dhe sëmundjet, apo jo? . . . A mendoni se ka ndonjë zgjidhje të vërtetë për këto probleme? . . . (2 Pjet. 3:13; etj.)’

KUR SHUMË NJERËZ THONË: ‘JAM I ZËNË’

● ‘Si jeni? Sot po flasim me banorët e lagjes për një lajm të rëndësishëm. Besoj se ju jeni mjaft i zënë me punë, prandaj do t’i bie shumë shkurt.’

● ‘Mirëdita! Mua më quajnë ​—​—, dhe sot kam ardhur të bisedoj me ju për bekimet e Mbretërisë së Perëndisë, dhe se si mund të përfitojmë nga ato. Por me sa shoh qenkeni i zënë (ose: jeni duke dalë). A mund t’ju them diçka shkurtimisht para se të shkoj?’

NË NJË TERRITOR QË PREDIKOHET SHPESH

● ‘Më bëhet qejfi që ju gjej në shtëpi. Si çdo javë, edhe sot po u bëjmë një vizitë banorëve të lagjes, dhe kemi dëshirë të flasim me ju për disa gjëra të mrekullueshme që do të bëjë Mbretëria e Perëndisë për njerëzit.’

● ‘Si po ia kaloni? Sa mirë që po takohemi përsëri! . . . Shpresoj të keni qenë të gjithë mirë me shëndet. . . . Sot kalova që të flitja pak me ju për . . . ’

● ‘Mirëmëngjes! Si jeni? . . . Mezi kam pritur të flitja përsëri me ju. (Pastaj përmend argumentin për të cilin do të bisedosh.)’