**Si të mprehim aftësitë në shërbim?—Të demonstrojmë një studim biblik me librin Çfarë mëson vërtet Bibla?**

Pse ka rëndësi? Shumë njerëz mund të mos e kuptojnë ku e kemi fjalën kur themi se ofrojmë studime biblike falas në shtëpi. Ndoshta mendojnë se duhet të bashkohen me ndonjë klasë studimi ose të bëjnë ndonjë kurs me korrespondencë. Në vend që thjesht t’u ofrojmë një studim biblik, pse të mos u demonstrojmë si bëhet një studim? Vetëm në pak minuta, madje edhe te dera, mund t’u tregosh sa e lehtë dhe e dobishme mund të jetë të studiosh Biblën.

Si ta zbatosh?

Pasi të prezantohesh, pyete të zotin e shtëpisë nëse shqetësohet për të ardhmen.
Thuaji se shumë njerëz janë të shqetësuar ashtu si ai dhe tregoji tabelën e përmbajtjes të librit Çfarë mëson vërtet Bibla? Shpjegoji se ky libër përmban mësime të lehta për t’u kuptuar që tregojnë se çfarë mëson Bibla për të ardhmen e për tema të tjera dhe pyete çfarë kapitulli i intereson.
Jepi një kopje të librit dhe drejtoje te kapitulli që zgjodhi. Shpjegoji se pyetjet në fillim të kapitullit marrin përgjigje në paragrafët pas tyre.
Kërkoji të zotit të shtëpisë të lexojë paragrafin e parë, nëse ka dëshirë. Pastaj lexo pyetjen për atë paragraf dhe shqyrtoni përgjigjen së bashku. Lexoni në Bibël dhe diskutoni shkrime të përmendura që mbështetin përgjigjen. Tregoji si e ke nënvizuar përgjigjen në librin tënd.
Shqyrtoni paragrafin tjetër, por këtë herë kërkoji të zotit të shtëpisë të përpiqet të përgjigjet me fjalët e veta.
Lavdëroje dhe lër takim që të kthehesh për të përfunduar mësimin.
Nëse është e përshtatshme, drejtoja vëmendjen te videoja me titull Si zhvillohet një studim biblik? në jw.org

Gjatë muajit provo këtë:

Lutu që Jehovai t’i bekojë përpjekjet e tua dhe të fillosh një studim biblik të ri.—Filip. 2:13.
Kur je në shërbim përpiqu që, të paktën një herë, të demonstrosh një studim biblik duke përdorur librin Çfarë mëson vërtet Bibla? ose të tregosh videon Si zhvillohet një studim biblik?