«Për Perëndinë gjithçka është e mundur»

NË FUND të viteve 80, në mbledhjet tona vetëm drejtuesi i Kullës së Rojës kishte një kopje të revistës, zakonisht të shkruar me dorë. Iu afrova njërit prej pleqve, Genadi Gudadzes, dhe i sugjerova t’i shtypnim vetë revistat.

Deri atëherë, vëllezërit kishin përdorur një shaptilograf të bërë vetë që të siguronin një sasi të vogël botimesh. Atyre u duhej një shaptilograf më cilësor, një daktilografist me përvojë, një makinë shkrimi dhe lastra të mjaftueshme që të kishin revista rregullisht. Sidoqoftë, të gjitha pajisjet për shtypjen, madje edhe letra, regjistroheshin nga shteti dhe kontrolloheshin nga shërbimi sekret.

Mora një makinë shkrimi nga një i njohur, profesionist në fushën e daktilografisë, të cilit i binin në dorë makina të vjetra që nuk kontrolloheshin më nga shteti. Motra ime ishte daktilografiste, kështu që mund të na ndihmonte. Vëllezërit bënë një shaptilograf të ri dhe gjetën një vend për të blerë lastra. Çdo gjë shkoi siç duhej dhe shpejt doli numri i parë i Kullës së Rojës në gjeorgjisht.

Por hasëm një pengesë të re. Një herë, Genadi më tha: «Na duhet të gjejmë një vend tjetër për të blerë lastrat.» Në një zyrë shteti kishte parë pako me lastra, por nuk mund t’i blinte vetë, sepse ishte nën vëzhgimin e autoriteteve. Si do t’i gjenim? Thosha gjithë merak: «Është e pamundur!» Genadi m’u përgjigj gjithë siguri: «Mos thuaj: ‘Është e pamundur!’ ‘Për Perëndinë gjithçka është e mundur’.»​—Mat. 19:26.

Më rrinte mendja aty ndërsa ditën tjetër shkoja gjithë siklet drejt zyrës së shtetit. Jehovai më drejtoi tek një daktilografiste miqësore, e cila pranoi t’ia parashtronte kërkesën time shefit të zyrës. Ishte burri i saj. S’kaloi shumë dhe blija rregullisht lastra nga kjo zyrë. Pas kësaj, nuk patëm më probleme me to.