ගණන් කතාව

16 ලෙවී ගෝත්‍රයට අයත් ඉෂ්හාර්ගේ පුත්‍රයා වන කෝරා+ නම් වූ මිනිසෙක් සිටියේය. ඉෂ්හාර්+ ලෙවීගේ+ පුත්‍රයා වූ කෝහාත්ගේ+ පුත්‍රයා විය. කෝරාද රූබෙන්+ ගෝත්‍රයට අයත් එලියාබ්ගේ+ පුත්‍රයන් වන දාතාන්+ හා අබිරාම්ද+ පෙලෙත්ගේ පුත්‍රයා වන ඕන්ද 2 ඊශ්‍රායෙල් සෙනඟ අතරේ සිටි අධිපතියෝ දෙසිය පනස්දෙනෙක්ද එකට එක් රැස් වී මෝසෙස්ට විරුද්ධව කතා කරන්න පටන්ගත්තෝය. සෙනඟව නියෝජනය කළ ඒ දෙසිය පනස්දෙනා යම් කාරණා සාකච්ඡා කිරීම සඳහා නිතරම කැඳවනු ලැබූ කීර්තිමත් මනුෂ්‍යයෝ වූහ. 3 ඔවුහු මෝසෙස් හා ආරොන් වෙතට ගොස් තම විරෝධය පළ කරමින්+ මෙසේ කීවෝය. “මේ මුළු සෙනඟම සිටින්නේ ශුද්ධ තත්වයකයි.+ යෙහෝවා දෙවිත් ඔවුන් අතරේ සිටිනවා.+ ඉතින් ඔබ දෙදෙනා විතරක් ඇයි යෙහෝවා දෙවිගේ සෙනඟට වඩා ඉහළින් යන්න හදන්නේ?+ අපිට දැන් නුඹලාව හොඳටම ඇති වෙලයි තියෙන්නේ.”

4 එය අසා මෝසෙස් දණින් වැටී පොළොව දෙසට තම හිස පහත් කරගත්තේය. 5 කෝරාට හා ඔහු සමඟ සිටි සෙනඟට මෝසෙස් මෙසේ කීවේය. “දෙවිගේ අනුමැතිය තිබෙන්නේ කාටද,+ ශුද්ධව සිටින්නේ කවුද,+ දෙවි ඉදිරියට පැමිණිය යුත්තේ කවුද+ කියා යෙහෝවා දෙවිම හෙට උදේට දන්වයි. දෙවි ඉදිරියට යා යුත්තේ ඔහු තෝරාගන්නා තැනැත්තායි.+ 6 කෝරා, ඔබ සහ ඔබ සමඟ ඉන්න අනික් හැමෝම+ සුවඳ ද්‍රව්‍ය ඔප්පු කරන භාජන රැගෙන+ 7 යෙහෝවා දෙවි ඉදිරියේ හෙට සුවඳ ද්‍රව්‍ය ඔප්පු කරන්න. යෙහෝවා දෙවි තෝරාගන්නේ කාවද කියා අපිට දැනගන්න පුළුවන් වෙයි.+ ශුද්ධ තත්වයක ඉන්නේ කවුද කියා දෙවිම අපිට පෙන්වයි. ලෙවීගේ පුත්‍රයෙනි,+ ඔබ මැසිවිලි නැඟුවා දැන් හොඳටම ඇති.”

8 මෝසෙස් ඔවුන්ට තවදුරටත් මෙසේ කීවේය. “ලෙවීගේ පුත්‍රයෙනි, මම කියන දේට හොඳින් ඇහුම්කන් දෙන්න. 9 මුළු ඊශ්‍රායෙල් සෙනඟ අතරින් ඊශ්‍රායෙල්ගේ දෙවි තමා ඉදිරියට කැඳවාගත්තේ ඔබව නොවේද?+ සෙනඟ වෙනුවෙන් සම්මුඛ වීමේ කූඩාරමේ සේවය කිරීම සඳහාත් යෙහෝවා දෙවි තෝරාගත්තේ ඔබව නොවේද? ඔබට භාර දුන් ඒ වගකීම සුළු එකක් කියාද ඔබ සිතන්නේ?+ 10 දෙවි, ලෙවී පුත්‍රයන් වන ඔබවයි ඔබේ සහෝදරයන්වයි තමා ළඟට කැඳවාගත්තා මදිවට දැන් ඔබ පූජකයන් වෙන්නත් හදනවාද?+ 11 ඔබ ආරොන්ට විරුද්ධව මැසිවිලි නඟන්නේ ඔහු කවුරු කියා හිතාගෙනද?+ ඇත්තටම ඔබත් ඔබ සමඟ සිටින මේ සියලුදෙනාත් මැසිවිලි නඟන්නේ යෙහෝවා දෙවිට විරුද්ධවයි.”+

12 පසුව මෝසෙස් එලියාබ්ගේ පුත්‍රයන් වන දාතාන්ට හා අබිරාම්ට+ තමා ළඟට එන මෙන් පණිවිඩයක් යැව්වේය. නමුත් ඔවුහු මෙසේ දන්වා එව්වෝය. “අපි එන්නේ නැහැ.+ 13 මේ පාළුකරයේ අපිව මරලා දාන්න+ කිරියෙන් හා පැණියෙන් ඉතිරී ගිය ඒ දේශයෙන් අපිව ගෙනාවා මදිවට ඔබ දැන් අපිව පාලනය කරන්නත් හදනවාද?+ 14 ඔබ අපිව කිරියෙන් හා පැණියෙන් ඉතිරෙන දේශයකට+ ගෙන යනවා කියා පැවසුවා නේද? කෙත්වතු හා මිදිවතු දෙනවා කියාත් පොරොන්දු වුණා නේද? කෝ දැන් ඒවා? ඔබ මේ මිනිසුන්ගේ ඇස් උගුල්ලලා දාන්නද හදන්නේ? දැන් නම් අපි කොහොමටවත් ඔබ ළඟට එන්නේ නැහැ.”

15 එය අසා මෝසෙස් මහත් සේ කෝප වී යෙහෝවා දෙවිට මෙසේ යාච්ඤා කළේය. “දෙවියනි, මේ සෙනඟ ඔප්පු කරන එක ධාන්‍ය පූජාවක්වත් පිළිගන්න එපා.+ මම ඔවුන්ගෙන් එක් කෙනෙකුටවත් කිසි හිරිහැරයක් කළේ නැහැ. ඔවුන්ට අයිති එක සතෙකුවත් මම ගත්තේ නැහැ.”+

16 ඉන්පසු මෝසෙස් කෝරාට+ මෙසේ කීවේය. “හෙට ඔබත් ඔබ සමඟ සිටින අනික් සියලුදෙනාත් යෙහෝවා දෙවි ඉදිරියට පැමිණිය යුතුයි.+ ආරොන්ද එතැනට එයි. 17 ඔබ එක් එක් කෙනා සුවඳ ද්‍රව්‍ය ඔප්පු කරන භාජනවලට සුගන්ධවත් ද්‍රව්‍ය දමා යෙහෝවා දෙවි ඉදිරියට ගොස් සුවඳ ද්‍රව්‍ය ඔප්පු කරන්න. ඔබ සහ ඔබ සමඟ සිටින දෙසිය පනස්දෙනාද ආරොන්ද එසේ කළ යුතුයි.” 18 එබැවින් ඔවුහු එක් එක් කෙනා සුවඳ ද්‍රව්‍ය ඔප්පු කරන භාජනවලට සුගන්ධවත් ද්‍රව්‍ය දමා සම්මුඛ වීමේ කූඩාරමට ඇතුල් වන ස්ථානයට ගියෝය. මෝසෙස් හා ආරොන්ද එතැන සිටියෝය. 19 කෝරා මුළු සෙනඟ+ මෝසෙස්ට හා ආරොන්ට විරුද්ධව උසිගන්වා සම්මුඛ වීමේ කූඩාරමට ඇතුල් වන ස්ථානයට ඔවුන්ව රැස් කළේය. එවිට යෙහෝවා දෙවිගේ තේජස මුළු ඊශ්‍රායෙල් සෙනඟ ඉදිරියේ දිස් විය.+

20 යෙහෝවා දෙවි මෝසෙස්ට හා ආරොන්ට මෙසේ කීවේය. 21 “මම දැන්ම මේ සෙනඟව විනාශ කර දමන්නෙමි.+ ඔබ දෙදෙනා ඉක්මනට ඔවුන් අතරෙන් ඉවත් වන්න.”+ 22 එය අසා ඔවුහු දණින් වැටී හිස නමා මෙසේ කන්නලව් කළෝය. “සියල්ලන්ට ජීවනය දෙන දෙවියනි,+ එක මනුෂ්‍යයෙකුගේ පාපය නිසා ඔබ මේ මුළු මහත් ජාතිය සමඟ උදහස් වන්නේ මන්ද?”+

23 එවිට යෙහෝවා දෙවි මෝසෙස්ට මෙසේ කීවේය. 24 “‘කෝරාගේ, දාතාන්ගේ හා අබිරාම්ගේ+ කූඩාරම් ළඟින් දැන්ම ඉවත් වන්න’ කියා සෙනඟට කියන්න.”

25 මෝසෙස් එතැනින් නැඟිට ඊශ්‍රායෙල්හි වැඩිමහල්ලන්+ සමඟ දාතාන් හා අබිරාම් සිටි ස්ථානයට ගියේය. 26 මෝසෙස් සෙනඟට මෙසේ කීවේය. “මේ දුෂ්ට මිනිසුන්ගේ කූඩාරම් ළඟින් අහක් වෙන්න. ඔවුන්ට අයිති කිසිම දෙයකට අත තබන්න එපා.+ නැත්නම් ඔවුන්ගේ පාපය නිසා ඔබත් විනාශ වෙයි.” 27 එය ඇසූ විගස සෙනඟ කෝරාගේ, දාතාන්ගේ හා අබිරාම්ගේ කූඩාරම් ළඟින් ඉවත්ව ගියෝය. ඉන්පසු දාතාන් හා අබිරාම් තමන්ගේ භාර්යාවන්, දරුවන් හා ළදරුවන් සමඟ පිටතට ඇවිත් තම කූඩාරම් ළඟ සිටගත්තෝය.+

28 එවිට මෝසෙස් මෙසේ කීවේය. “මම කිසි දෙයක් මගේ හිතුමතේට කළේ නැහැ.+ මාව ඔබ ඉදිරියට එව්වේ යෙහෝවා දෙවියි.+ දැන් මේ වෙන්න යන දෙයින් ඔබට එය පැහැදිලි වෙයි. 29 මේ මනුෂ්‍යයන් දෙවිගෙන් දඬුවමක් නොවිඳ මිනිසුන් පොදුවේ මැරෙන ආකාරයට මැරුණොත්+ මාව එවා තිබෙන්නේ යෙහෝවා දෙවි නොවෙයි.+ 30 නමුත් යෙහෝවා දෙවි අසාමාන්‍ය දෙයක් කළොත්+ එනම්, ඔහු පොළොව විවර කර ඔවුන් සතු සෑම දෙයක් සමඟම ඔවුන්ව පණපිටින් පොළොවට*+ ඇදගත්තොත්+ ඔවුන් අගෞරව කළේ යෙහෝවා දෙවිට කියා ඔබට එයින් දැනගන්න ලැබෙයි.”+

31 මෝසෙස් එසේ කියා අවසන් වනවාත් සමඟම පොළොව විවර වෙන්න පටන්ගත්තේය.+ 32 මෙසේ පොළොව එහි කට ඇර ඔවුන්වද ඔවුන් සමඟ සිටි ඔවුන්ගේ ගෙයි වැසියන්වද කෝරාගේ ගෙයි වැසියන්වද ඔවුන්ගේ බඩු බාහිරාදියද ගිලගත්තේය.+ 33 ඔවුහුද ඔවුන්ගේ ගෙයි වැසියෝද පණපිටින්ම මිනී වළට ගියෝය. ඉන්පසු පොළොව ඔවුන්ව වසාගත්තේය.+ මෙසේ ඔවුහු ඊශ්‍රායෙල් සෙනඟ අතරින් විනාශ වී ගියෝය.+ 34 ඔවුන් කෑ මොර ගසන ශබ්දය ඇසී ඔවුන් අවට සිටි සෙනඟද, “මෙතැනින් දුවමු. නැත්නම් පොළොව අපවත් ගිලගනී”+ කියමින් එතැනින් පලා ගියෝය. 35 පසුව යෙහෝවා දෙවි ගින්නක් එවා+ සුවඳ ද්‍රව්‍ය ඔප්පු කරමින් සිටි මනුෂ්‍යයන් දෙසිය පනස්දෙනාවම දවා දැමීය.+

36 ඉන්පසු යෙහෝවා දෙවි මෝසෙස්ට මෙසේ කීවේය. 37 “ගිනි අඟුරු අතරේ තිබෙන සුවඳ ද්‍රව්‍ය ඔප්පු කරන භාජන ටික එකතු කරගෙන+ අඟුරු ඒ මේ අත විසුරුවන්න කියා පූජක ආරොන්ගේ පුත්‍රයා වන එලියාසර්ට කියන්න. මන්ද එම භාජන ශුද්ධය. 38 එම භාජන යෙහෝවා දෙවි වන මා ඉදිරියට රැගෙන ආ නිසා ඒවා ශුද්ධය. පව් කර තමන් පිටට විනාශය පමුණුවාගත්+ ඒ මනුෂ්‍යයන් ගෙනා සුවඳ ද්‍රව්‍ය ඔප්පු කරන භාජන අහුලාගෙන ඒවා තළා තුනී තහඩු සාදන්න. සිදු වූ දේ ඊශ්‍රායෙල් සෙනඟට සිහි වන පිණිස+ ඒ තහඩු පූජාසනය+ වටා සවි කරන්න.” 39 පූජක එලියාසර්, ගින්නෙන් විනාශ වූ ඒ මනුෂ්‍යයන් සුවඳ ද්‍රව්‍ය ඔප්පු කරන පිණිස ගෙනා තඹ භාජන එකතු කරගෙන+ ඒවා තළා තුනී තහඩු සෑදුවේය. ඉන්පසු ඒ තහඩු පූජාසනය වටා සවි කරන ලදි. 40 එසේ කළේ ආරොන්ගේ පවුලට අයිති නොවන කිසිවෙකු+ සුවඳ ද්‍රව්‍ය ඔප්පු කිරීම සඳහා යෙහෝවා දෙවි ඉදිරියට නොපැමිණිය යුතු බවත්+ කෝරා සහ ඔහු සමඟ සිටි සෙනඟ මෙන් කිසිවෙකු ක්‍රියා නොකළ යුතු බවත්+ ඊශ්‍රායෙල් සෙනඟට සිහිගැන්වීමටය. යෙහෝවා දෙවි මෝසෙස් මාර්ගයෙන් අණ කළ සියල්ල එලියාසර් කළේය.

41 පසුවදා ඊශ්‍රායෙල් සෙනඟ නැවත මෝසෙස්ට හා ආරොන්ට විරුද්ධව මැසිවිලි නඟමින් මෙසේ චෝදනා කළෝය.+ “ඔබ දෙදෙනා යෙහෝවා දෙවිගේ සෙනඟව මරා දැමුවා.” 42 සෙනඟ මෝසෙස්ට හා ආරොන්ට විරුද්ධව එක් රොක් වූහ. එවිට ඔවුන් සම්මුඛ වීමේ කූඩාරම දෙස බලා සිටියදී වලා ටැඹ මුළු කූඩාරමම වසාගත්තේය. යෙහෝවා දෙවිගේ තේජසද ඔවුන් ඉදිරියේ දිස් විය.+

43 මෝසෙස් හා ආරොන් සම්මුඛ වීමේ කූඩාරම ළඟට පැමිණියෝය.+ 44 එවිට යෙහෝවා දෙවි මෝසෙස්ට මෙසේ කීවේය. 45 “මම දැන්ම මේ සෙනඟව විනාශ කරන්නෙමි. ඔබ ඉක්මනට ඔවුන් අතරෙන් ඉවත් වන්න.”+ එය අසා මෝසෙස් හා ආරොන් දණින් වැටී තම මුහුණු පොළොව දෙසට පහත් කරගත්තෝය.+ 46 ඉන්පසු මෝසෙස් ආරොන්ට මෙසේ කීවේය. “සුවඳ ද්‍රව්‍ය ඔප්පු කරන භාජනයකට පූජාසනයේ දැවෙන අඟුරු ටිකක් දමන්න.+ එයට සුගන්ධවත් ද්‍රව්‍යද දමා ඉක්මනට සෙනඟ අතරට ගොස් එය ඔප්පු කරමින් ඔවුන්ගේ පාප වෙනුවෙන් සමාව අයැදින්න.+ මන්ද යෙහෝවා දෙවි සිටින්නේ මහත් උදහසින්.+ දෙවි ඔවුන්ට වසංගතයකින් පහර දෙන්න දැනටමත් පටන් අරගෙන.” 47 මෝසෙස් පැවසූ ලෙස ආරොන් විගස සෙනඟ අතරට දුව ගොස් ඔවුන්ගේ පාපයට සමාව ලබාගන්නා පිණිස සුවඳ ද්‍රව්‍ය ඔප්පු කළේය. ඒ වන විටත් සෙනඟ පිටට වසංගතය පැමිණ තිබිණ. 48 ඔහු මළ අය හා ජීවත්ව සිටි අය අතරේ සිටගත්තේය.+ එවිට වසංගතය ක්‍රමක්‍රමයෙන් නතර විය.+ 49 කෝරාගේ කැරැල්ල නිසා මිය ගිය අයට අමතරව වසංගතයෙන් දාහතරදහස් හත්සියදෙනෙක් මිය ගියෝය. 50 වසංගතය නතර වූ පසු ආරොන් සම්මුඛ වීමේ කූඩාරම ළඟට පැමිණියේය. මෝසෙස් එතැන සිටියේය.