යොෂුවා
16 දාදු දමා+ යෝසෙප්ගේ පුත්‍රයන්ට+ උරුම වූ ප්‍රදේශය මෙයයි. ඔවුන්ගේ දේශ සීමාව යොර්දාන් ගඟ+ යෙරිකෝව අසලින් ගලා යන ස්ථානයෙන් පටන්ගෙන යෙරිකෝවේ දිය උල්පත්වලට නැඟෙනහිරෙන් ගොස් යෙරිකෝවට ඉදිරියෙන් තිබෙන පාළුකරය හරහාද බෙතෙල්හි කඳුකර පළාත හරහාද දිව ගියේය.+ 2 ඒ මායිම ලූෂ් නගරය+ අසල තිබෙන බෙතෙල් සිට අර්කීවරුන්ගේ+ දේශ සීමාව වන අටාරොත් නගරය දක්වා දිව ගියේය. 3 එතැන් සිට එය බස්නාහිර දෙසට හැරී යප්ලේතිවරුන්ගේ දේශ සීමාව දෙසට විහිදී ගියේය. එය පහළ බෙත්-හෝරොන්හි+ දේශ සීමාව දක්වාද ගෙෂෙර් නගර+ දක්වාද ගොස් මහ මුහුදෙන් කෙළවර විය.+
4 යෝසෙප්ගේ පුත්‍රයන්ගෙන්+ පැවත ආ මනස්සේ ගෝත්‍රයේ අය සහ එෆ්‍රායිම් ගෝත්‍රයේ+ අය තමන්ට උරුම වූ දේශයේ පදිංචි වූහ.+ 5 එෆ්‍රායිම් ගෝත්‍රයට අයත් පවුල්වලට උරුම වූ දේශයේ සීමාව නැඟෙනහිර දෙසින් පිහිටි අටාරොත්-අද්දර් නගරයේ+ සිට ඉහළ බෙත්-හෝරොන්+ දක්වාම විහිදී ගියේය. 6 එය මහ මුහුද දක්වාද විහිදී ගොස් එතැනින් කෙළවර විය. එය උතුරු දෙසින් පිහිටි මික්මෙතාත්+ සිට නැඟෙනහිර දෙසින් පිහිටි තයනත්-ෂීලෝ දක්වාද යනෝවා දක්වාද විහිදී ගියේය. 7 යනෝවා සිට අටාරොත් නගරය දක්වාද එතැනින් නයරා නගරය දක්වාද යෙරිකෝව+ දක්වාද ගොස් යොර්දාන් ගඟෙන් කෙළවර විය. 8 ඔවුන්ගේ දේශ සීමාවට තප්පුවා නගරයද+ අයත් විය. දේශ සීමාව තප්පුවා සිට බස්නාහිර දෙසට දිව ගොස් කානාහ් ඔය+ දිගේ මහ මුහුදෙන් කෙළවර විය.+ එෆ්‍රායිම් ගෝත්‍රයේ පවුල්වලට ලැබුණු උරුමය එයයි. 9 ඊට අමතරව මනස්සේ ගෝත්‍රයට ලැබුණු ප්‍රදේශයේ තිබූ සමහර නගරද එෆ්‍රායිම් ගෝත්‍රය සඳහා වෙන් කරන ලදි.+ එම නගරද ඒවාට අයිති ගම්මානද ඔවුන්ට ලැබිණ.
10 ඔවුහු ගෙෂෙර් නගරයේ+ වාසය කළ කානානිවරුන්ව පන්නා දැමුවේ නැත.+ ඒ වෙනුවට ඔවුන්ව මෙහෙකාරකම සඳහා තබාගත්තෝය.+ කානානිවරු අද වන තුරු එෆ්‍රායිම්වරුන් අතරේ වාසය කරති.+