Josëfu dë a dunguwosu

JOSËFU bi a’ 17 jaa nöö di de tjëën go a Egepiti köndë. Naandë de sei ën baka da wan womi de kai Potifali. Nöö Potifali ta wooko da di könu u Egepiti de bi ta kai Falao.

Josëfu ta wooko taanga da Potifali, di masa fëën. Fëën mbei di Josëfu ko möön bigi, Potifali butëën faa dë hedima u di wosu fëën. Nöö faandi mbei Josëfu dë a dunguwosu aki? Di mujëë u Potifali hën wë mbei.

Di Josëfu ko bigi, nöö a bi dë wan gaan hanse womi seei. Fëën mbei di mujëë u Potifali bi kë u Josëfu duumi ku ën. Ma Josëfu bi sabi taa di soni dë an bunu, nöö an bi o du ën tu. Potifali mujëë hati boonu seei. Hën wë di hën manu ko a wosu, hën a go mindi soni da Josëfu. A piki hën manu taa: ’Josëfu dë hogi e, a pooba u ko duumi ku mi!’ Potifali biibi di mujëë fëën, hën hati fëën ko boonu ku Josëfu. Fëën mbei a mbei de buta Josëfu a dunguwosu.

An tei longi ufö di hedima u di dunguwosu ko si taa Josëfu da wan bumbuu womi. Fëën mbei a buta Josëfu u dë basi u dee woto saafuma. Bakaten Falao hati bi boonu ku di womi di ta kandi diingi dëën ku di womi di ta jasa soni dëën. Fëën mbei a buta de a dunguwosu. Wan ndeti hën dee tu womi aki sunjan wan apaiti sunjan, ma de an bi saandi di sunjan u de kë taki. Hën wë di woto daka, Josëfu hakisi de taa: ’Un konda da mi andi un sunjan.’ Di de konda hii soni te de kaba, hën Josëfu konda da de andi dee sunjan u de kë taki, biga Gadu bi dë ku Josëfu.

Josëfu piki di womi di ta kandi diingi da Falao taa: ’Baka dii daka, joo kumutu a dunguwosu, nöö Falao o tei i baka fii kandi diingi dëën.’ Josëfu piki ën tu taa: ’Te i go kumutu aki, i musu konda soni u mi da Falao, nöö i musu heepi mi u kumutu a di kamian aki.’ Ma Josëfu piki di womi di ta jasa soni da Falao taa: ’A fika dii daka, nöö Falao o koti i hedi puu.’

Baka dii daka a pasa leti sö kumafa Josëfu bi taki. Falao koti di hedi u di womi di bi ta jasa soni dëën. Ma a lusu di womi di bi ta kandi diingi dëën puu a dunguwosu, nöö a bigi wooko da di könu baka. Ma di womi aki fëëkëtë hii soni u Josëfu! An konda na wan soni u Josëfu da Falao. Sö wë Josëfu fika fëën a dunguwosu.