Dee sunjan u Falao

TU JAA pasa kaa, Josëfu dë fëën këdë a dunguwosu jeti. Di womi di ta kandi diingi da Falao fëëkëtëën. Hën wan ndeti Falao sunjan tu apaiti sunjan, ma an bi sabi andi dee sunjan fëën kë taki. I ta si ën ta duumi dë u? Di debooko fëën, hën Falao kai dee köni womi fëën ko, hën a konda da de andi a sunjan. Ma de an bi sa puu dee sunjan da Falao.

Awa ufö di womi di ta kandi diingi da Falao, ko mëni Josëfu. A piki Falao taa: ’Di mi bi dë a dunguwosu, wan womi bi dë ala di bi sa puu sunjan da sëmbë.’ Wantewante dë Falao mbei de puu Josëfu a dunguwosu.

Hën Falao piki Josëfu andi a sunjan. A piki ën taa: ’Mi si seibi fatu hanse kau logoo sö. Te wan pisi mi si seibi mangu kondjoo wan. Hën dee mangu kau bigi ta njan dee fatu wan.

A di u tu sunjan u mi, mi si seibi fuufuu lepi alisi di bi ta göö a wan alisi pau. Te wan pisi mi si seibi popo alisi. Hën dee seibi popo alisi bigi guli dee seibi fuufuu wan.’

Josëfu piki Falao taa: ’Di wan soni nöö dee tu sunjan fii kë taki. Dee seibi fatu kau ku dee seibi fuufuu alisi, da seibi jaa. Nöö dee seibi mangu kau ku dee seibi popo alisi da seibi jaa möön. Seibi jaa longi njanjan o göö hia a Egepiti köndë. Nöö seibi jaa longi njanjan an o göö hia.’

Fëën mbei Josëfu piki Falao taa: ’Tei wan köni womi, nöö be a lai njanjan a suwa a dee seibi bunu jaa dendu. Nöö dee sëmbë an o pena u hangi a dee seibi taku jaa te njanjan an o göö hia.’

Di taki bi kai ku Falao. Fëën mbei a buta Josëfu u lai njanjan a suwa. Baka Falao, nöö Josëfu bi dë di möön hei womi u Egepiti köndë.

Aiti jaa baka di dë, a di ten u di gaan hangi, Josëfu si wan tu womi ta ko a di köndë. I sa’ ambë da de u? Dee 10 gaan baaa fëën wë! De tata Jakopu manda de go a Egepiti u di de an bi abi njanjan a de köndë Kaana möön. Josëfu bi sabi taa dee baaa fëën di dë, ma de an bi sabi Josëfu möön. I sa’ faandi mbei ö? U di Josëfu bi ko gaan womi, nöö a bi bisi woto pei koosu tu.

Josëfu toona mëni baka taa di a bi dë piki mii, a bi sunjan taa dee baaa fëën bi ta bendi hedi ta bigi ën. I sa’ di woto dë jeti ö? Awaa Josëfu si taa Gadu hën wë bi mandëën go a Egepiti, nöö na u sösö a bi mandëën go naandë. Andi i mëni taa Josëfu du? Boo go luku.