Dee baaa u Josëfu ta buuse ën

LUKU fa di njönku kijoo ta tjali. A djei kuma saanfa-u-du fëën kaba a mundu. Di kijoo aki da Josëfu. Dee baaa fëën hën ku de a’ wan tata, sei ën djunsu dë da wanlö womi nango a Egepiti köndë. Nöö ala Josëfu o toon saafu. Faandi mbei dee baaa fëën du di gaan hogi dë ku ën? Wë u di de ta haun ku Josëfu.

De tata Jakopu lobi Josëfu gaanfa. Fëën mbei a mbei wan gaan langa waiti djakiti dëën. Di dee woto 10 gaan baaa u Josëfu si fa Jakopu lobi ën tjika, hën de bigi ta haun ku Josëfu ta buuse ën tu. Ma wan woto soni bi dë tu di mbei taa de bi ta buuse ën sö.

Josëfu bi sunjan tu sunjan. Tu pasi a sunjan taa dee baaa fëën ta bendi hedi ta bigi ën. Di Josëfu konda da dee baaa fëën andi a sunjan, hën de bi ko ta buuse ën möön gaanfa seei.

Wan daka di dee baaa u Josëfu bi ta luku dee sikapu u de tata Jakopu, hën Jakopu manda Josëfu faa go luku ee hii soni ta waka bunu ku dee baaa fëën. Di dee baaa u Josëfu si taa a ta ko, hën so u de bai taa: ’Un boo kii ën!’ Ma Lubëni di möön gaanwan bai taa: ’Nönö, wan du di soni dë e!’ Hën wë de kisi Josëfu panjan gbaa hai tja go tuwë a wan dëëdëë wata baaku. Hën de go sindo pakisei andi de o du ku ën.

Te wan pisi wanlö Ismaëli sëmbë ko ta pasa. Hën wë Juda piki dee baaa fëën taa: ’Un boo sei ën da dee Ismaëli sëmbë.’ Sö wë de sei Josëfu u 20 pisi soofu möni. Wan gaan hogi wë de du dë e!

Andi dee baaa u Josëfu o piki de tata? I saandi de du ö? De kii wan kaabita hën de tuusi di waiti djakiti u Josëfu go a di buuu dendu wan tu pasi. Hën de tja di djakiti go a wosu go lei de tata Jakopu. De piki ën taa: ’Luku andi u feni. Na di djakiti u Josëfu disi ö?’

Jakopu si taa hën di dë tuu. Hën a bai taa: ’Ee Maingë ooo, wan taku mbeti kii Josëfu.’ Di soni dë dee baaa u Josëfu bi kë u de tata mëni. Jakopu ko ta tjali seei. A puu këë sömëni daka longi. Ma Josëfu an bi dëdë. Boo luku andi pasa ku ën a di kamian ka de tjëën go.