De aba di Bë Ze

LUKU andi ta pasa aki! Mosesi wë ta tëndë di pau fëën a di Bë Ze liba dë e. Dee sëmbë dee dë ku ën a woto banda dë da dee Isaëli sëmbë. Ma Falao ku hii dee sodati fëën ta dëdë a di ze. Boo go luku unfa di soni aki du ko.

Kumafa u bi lei, Falao bi piki dee Isaëli sëmbë u go kumutu a Egepiti baka di Gadu bi tja di u 10 sitaafu ko a dee Egepiti sëmbë liba. Söwan 600.000 Isaëli womi go, ku sömëni mujëë ku miii. Söseei gaan hia woto sëmbë di toon biibima u Jehovah, go ku dee Isaëli sëmbë tu. Hii de tuu tja dee sikapu u de, dee kaabita ku dee kau u de.

Ufö dee Isaëli sëmbë go, de hakisi dee Egepiti sëmbë u de da de bisi ku soni di mbei ku goutu nasö soofu. Di lasiti sitaafu di bi ko a dee Egepiti sëmbë liba, bi mbei de fëëë te na soni. Fëën mbei de da dee Isaëli sëmbë hii soni de bi hakisi de.

Baka wan tu daka dee Isaëli sëmbë ko dou a di Bë Ze. Naandë de sindo böö. A di ten dë seei, a ko hati Falao ku dee womi fëën taa de manda dee Isaëli sëmbë go. Hën de bai taa: ’Hooo! U tuwë dee saafu fuu go!’

Hën Falao tooka pakisei möön. Hesihesi a seeka di feti wagi fëën ku dee sodati fëën. Hën de bigi faaka dee Isaëli sëmbë ku 600 apaiti feti wagi, ku hii dee woto feti wagi u Egepiti.

Di dee Isaëli sëmbë si Falao ku dee sodati fëën ta ko a de baka, hën de fëëë te na soni. De an bi a’ kamian u go möön. Di Bë Ze bi tapa de a wan së, nöö dee Egepiti sëmbë bi kumutu a di woto së ta ko. Ma Jehovah bi buta wan bundji a dee Egepiti sëmbë ku dee sëmbë fëën mindi. Fëën mbei dee Egepiti sëmbë an bi sa si u go feti ku dee Isaëli sëmbë.

Hën Jehovah piki Mosesi be a tëndë hën pau go a di Bë Ze liba. Di a du sö kaa, hën Jehovah mbei wan gaan ventu ta böö ta ko a di së u sonu kumutu. Hën di wata u di lio ko paati a tu, nöö a taanpu a pë a dee tu së tuu.

Hën dee Isaëli sëmbë bigi waka pasa a di dëëdëë goon a di ze mindi. A bi tei sömëni juu u hii dee milionmilion sëmbë dë ku hii dee mbeti u de pasa söndö u wan soni du de, go a di woto së banda u di ze. Te u kaba fëën dee Egepiti sëmbë bi sa si dee Isaëli sëmbë baka. Dee saafu u de bi nango! Fëën mbei de biinga go a de baka a di ze dendu.

Di de denda a di ze dendu kaa, hën Gadu mbei dee banti u dee feti wagi u de booko. Dee Egepiti sëmbë ko fëëë seei te na soni, hën de bigi ta bai këë taa: ’Jehovah ta feti da dee Isaëli sëmbë. Un boo go kumutu aki ooo!’ Ma a bi lati kaa.

A di ten dë Jehovah piki Mosesi faa tëndë di pau fëën go a di Bë Ze liba, kumafa i ta si a di peentje aki. Di Mosesi tëndë di pau fëën kaa, hën di wata di bi taanpu a pë bigi ko baka, hën a kai ko tapa dee Egepiti sëmbë ku dee feti wagi u de. Hii dee sodati dee bi faaka dee Isaëli sëmbë dëdë fiaa kaba a sösö a di ze. Na wan u dee Egepiti sëmbë bi kumutu libilibi!

Dee sëmbë u Gadu bi wai seei taa a bi tjubi de! Dee womi kanda wan kanda u da Jehovah tangi. De kanda taa: ’Jehovah wini wan gaan wini. A tuwë dee hasi ku dee sëmbë dee ta tja de a di ze.’ Mosesi sisa, Melijam tei tjaka, hën hii dee woto mujëë tei u de tu ta waka nëën baka. Hii di de ta baja ta piizii, de bi ta kanda di wan seei kanda di dee womi bi ta kanda taa: ’Jehovah wini wan gaan wini. A tuwë dee hasi ku dee sëmbë dee ta tja de a di ze.’