Wan hogihati könu ta tii Egepiti

DEE womi aki ta musu dee sëmbë u de wooko taanga. Luku fa di womi ta hupi wan u dee wookoma! Dee wookoma da famii u Jakopu, nöö de ta kai de Isaëli sëmbë. Nöö dee womi dee ta musu de u wooko taanga da Egepiti sëmbë. Dee Isaëli sëmbë toon saafuma u dee Egepiti sëmbë. Unfa di soni aki du pasa?

Sömëni jaa longi di gaan famii u Jakopu bi ta libi bööböö a Egepiti köndë. Josëfu di bi dë di möön hei womi a Egepiti, baka di könu Falao, bi ta luku de. Ma bakaten Josëfu ko dëdë. Hën wan njunjun Falao bigi tii Egepiti, nöö an bi lobi dee Isaëli sëmbë seei.

Fëën mbei di hogihati Falao aki mbei dee Isaëli sëmbë toon saafuma. Hën a buta wanlö hogihati ku takuhati womi u luku de. Nöö de bi ta musu de u wooko taanga u mbei foto da Falao. Ma tökuseei dee Isaëli sëmbë bi ta ko möön hia. Baka wan pisiten dee Egepiti sëmbë ko fëëë taa dee Isaëli sëmbë o ko hia tumisi, nöö de o taanga poi.

I saandi Falao du ö? A piki dee mujëë dee ta pai ku dee Isaëli mujëë taa: ’Un musu kii hii dee womi mii te de pai de.’ Ma dee mujëë bi a’ bunuhati, nöö de an bi kë kii dee piki mii.

Fëën mbei Falao piki hii dee sëmbë fëën taa: ’Un kii hii dee piki womi mii u dee Isaëli sëmbë tuu puu. Ma un sa disa dee mujëë wan ku libi.’ Na wan hogihati soni di dë u? Boo go luku unfa de bi tjubi wan u dee piki womi mii.