PIKI U HAKISI DI NAMA KU BËIBEL
Dëdë sëmbë o toona libi baka u?
U dë seiki taa di Gadu di mbei hii soni di ta libi, sa mbei wan sëmbë di dëdë toona libi baka
Jehovah Gadu da di sëmbë di ta da libi (Psalöm 36:9). U di soni aki mbei i sa biibi taa di wan seei Gadu aki sa weki dee sëmbë dee dëdë, ko a libi baka, na sö nö? Di Bëibel ta lei u taa u sa dë seiki taa di soni dë a o du a di ten di ta ko. (Lesi Tjabukama 24:15.) Ma faandi mbei a o du ën?
Di Gadu mbei libisëmbë, a bi kë u de libi u teego a goonliba (Kenesesi 1:31; 2:15-17). Di soni dë a abi a pakisei da libisëmbë jeti. A ta hati ën te a ta si fa libisëmbë ta pena nöunöu, ku fa de ta dëdë sö hesi.—Lesi Jöpu 14:1, 14, 15.
Naasë dee sëmbë dee bi dëdë o libi te Gadu o toona weki de?
Gadu bi mbei libisëmbë u de libi a Gadu Köndë ala u? Wë nönö. Gadu bi mbei dee ëngëli u libi a Gadu Köndë ala. A bi mbei libisëmbë u libi a goonliba aki (Kenesesi 1:28; Jöpu 38:4, 7). Hoi dee soni aki a pakisei, nöö buta mëni a dee sëmbë dee Jesosi bi weki ko a libi baka. A bi weki de u de toona ko libi a goonliba aki baka. Sö nöö a o dë a di ten di ta ko tu. Gaansë u dee sëmbë dee Gadu o weki baka, o toona ko libi a goonliba aki.—Lesi Johanisi 5:28, 29; 11:44.
Ma Gadu tei wan tu sëmbë u go libi nëën köndë ala. De o libi ala te a toona weki de baka. De an o abi libisëmbë sinkii möön, ma de o toon jeje (Lukasi 12:32; 1 Kolenti 15:49, 50). Dee sëmbë dee Gadu o weki u go libi ala, o ko dë könu di o tii di goonliba makandi ku Keesitu.—Lesi Akoalimbo 5:9, 10.