U mbei a sö wan fasi taa u sa libi u teego

A dë wan föutu soni fuu pakisei sö wan libi ö? Na seei! Di Bëibel ta lei u taa Gadu buta di fii dë a u dendu (Peleikima 3:11). Di Bëibel ta taki tu taa ’Gadu da lobi’ (1 Johanisi 4:8). A bi o sa dë sö taa wan Gadu di lobi u bi o mbei u fuu kë libi u teego, hii fa a bi sabi taa wa bi o sa feni di libi dë nöiti ö?

Na wan sëmbë kë dëdë. Di Bëibel ta taki taa dëdë da wan „felantima” fuu (1 Kolenti 15:26). So sëmbë ta dëdë njönkunjönku, wotowan ta dëdë te de ko gaandi. Ma te u kaba fëën, hii sëmbë o dëdë. Sömëni sëmbë ta fëëë te de ta pakisei di dëdë di sëmbë ta dëdë. Soni dë di sa puu di felantima aki a u pasi ö? A sa puu a pasi seei ö?

SONI DI TA LEI TAA GADU KË FUU LIBI U TEEGO

A bi o foondo i ee i ko sabi taa Gadu an bi kë taa sëmbë musu ta dëdë u? Di Bëibel buku Kenesesi ta lei u taa Gadu bi kë taa sëmbë musu ta libi u teego a goonliba aki. Jehovah mbei di goonliba ku hii soni di libisëmbë abi fanöudu u de sa dë a libi, söseei u de sa ta dë waiwai. Baka di dë, a mbei di fosu womi, Adam, hën a butëën a wan paladëisi. Di Paladëisi dë bi dë a di djai u Eden. Hën „Gadu si taa hii dee soni dee a mbei, bunu seei.”​—Kenesesi 1:26, 31.

Gadu bi mbei Adam telutelu söndö föutu (Detolonomi 32:4). Di mujëë u Adam, de kai Eva seei bi dë telutelu söndö föutu. Jehovah bi piki de taa: „Un pai miii be un ko hia, be un fuu di goonliba, nöö un musu dë basi fëën e. Un musu dë basi u dee fisi u ze, dee libilibi soni dee ta buwa a liba ku hii libilibi soni di ta dë a tela.”​—Kenesesi 1:28.

A bi o tei ten u Adam ku Eva pai miii fuu di goonliba. Eva bi o pai miii, nöö dee mii fëën seei bi o pai miii tu, u te di goonliba bi ko fuu ku sëmbë kumafa Gadu bi kë (Jesaaja 45:18). Ee Adam ku Eva an bi o dë a libi möön u de si fa dee bakamii u dee mii kai de avo, bi o pai miii fuu di goonliba, nöö i si kuma Jehovah bi o piki de di soni dë u?

Pakisei di wooko di Gadu bi da Adam u dë basi u dee mbeti. Gadu bi piki Adam faa da dee mbeti në, nöö a bi o tei ten u da dee mbeti në (Kenesesi 2:19). Ma u Adam bi sa dë basi u dee mbeti, nöö a bi musu ko sabi soni u dee mbeti, a sö wan fasi a bi o sa sölugu de. Di soni dë bi o möön tei ten möön te a bi o da dee mbeti në.

Wë di piki di Gadu bi piki di fosu mama ku di fosu tata fuu u de pai miii fuu di goonliba, söseei u de dë basi u dee mbeti, ta lei taa Gadu bi mbei de u de libi longi. Te u luku ën bunu, nöö Adam bi libi longi seei.

DE BI LIBI LONGI SEEI

Di Bëibel ta lei u taa sëmbë bi ta libi longi möön fa u ko ta libi a di ten aki. Di Bëibel ta taki taa: „Hii dee jaa dee Adam bi libi, da 930 jaa.” Di Bëibel ta taki u sikisi woto womi di bi libi pasa 900 jaa! Dee womi dë da Seti, Enösi, Kenan, Jeleti, Metusela ku Noa. Hii dee womi aki bi libi ufö di Gaan Wata bi ko a goonliba. Noa bi abi 600 jaa ufö di Gaan Wata bi ko (Kenesesi 5:5-27; 7:6; 9:29). Unfa a du ko taa de bi sa libi sö longi?

De bi pai hii dee womi aki kölö sö baka di Adam ku Eva bi ko toon zöndu libisëmbë. A sa dë taa u di soni aki hedi mbei de bi sa libi sö longi. Ma faandi mbei u sa taki taa te wan sëmbë an abi zöndu, nöö a sa libi möön longi? Andi sa heepi u fu wa ta dëdë möön? Fuu ko sabi dee soni aki, nöö u musu ko fusutan fosu faandi mbei u ta gaandi ta dëdë.