Unfa de o puu di gaan felantima fuu de kai dëdë a u pasi?
DI FOSU tata ku di fosu mama fuu, Adam ku Eva, an bi piki Gadu buka, nöö fëën mbei libisëmbë ko abi zöndu, söseei de ta dëdë. Ma di soni dë an bi puu di soni di Gadu bi abi a pakisei da libisëmbë. U ta lesi soni u di soni dë a di Wöutu u Gadu de ta kai di Bëibel, di a mbei sëmbë sikifi. Naandë a ta konda sömëni pasi da u taa a o du dee soni dee a bi kë du da libisëmbë jeti.
„Dee sëmbë dee ta libi a wan leti fasi, de o feni di goonliba, nöö naandë de o ta libi u teego.”—Psalöm 37:29.
„Di Möön Hei Masa Jehovah o puu dëdë u teego, söseei a o feki dee wojowata u hii sëmbë puu a de fesi.”—Jesaaja 25:8.
„Di dëdë di ta kii u aki, hën da di lasiti felantima di o kaba a mundu fiaa.”—1 Kolenti 15:26.
„Dëdë ku tjali ku kusumi an o dë a de dendu möön tu. Söseei sinkii hati an o dë möön seei, kwetikweti, biga dee awoo soni dee bi dë tuu pasa go kaa.”—Akoalimbo 21:4.
Unfa Gadu o „puu dëdë”, di gaan felantima fuu? Di Bëibel ta piki u gbelingbelin taa: „Dee sëmbë dee ta libi a wan leti fasi . . . o ta libi u teego.” Ma a ta taki tu taa „na wan bunuhati sëmbë dë a goonliba di ta du bunu soni hii juu, söseei di an ta du zöndu” (Peleikima 7:20). Di soni aki kë taki taa Gadu an o luku möön taa u musu sa hoi dee wëti fëën, ufö u sa libi u teego u? Na seei! An o du di soni dë wan daka, u di ’Gadu . . . an sa ganjan sëmbë’ (Titusi 1:2). Wë, nöö andi Gadu o du faa mbei libisëmbë feni di libi di a bi kë da de bigibigi?
GADU „O PUU DËDË U TEEGO”—JESAAJA 25:8
GADU PAKA WAN LUSUPAIMA FUU SA KUMUTU A DËDË BASU
U di Jehovah Gadu lobi libisëmbë, mbei a seeka wan soni u paka puu u a dëdë basu. A paka wan lusupaima. Te u ta jei lusupaima, nöö a ta mbei u mëni wan soni di i ta paka u di i poi wan soni, nöö di soni di i ta paka dë dii kuma di soni di i poi. Nasö wan soni di i musu du u soni waka a wan leti fasi. U di hii libisëmbë ta du zöndu, söseei u di hii u tuu musu kisi dëdë sitaafu, mbei di Bëibel ta taki taa: „Na wan u de sa mbei wan woto sëmbë ko fii, aantoobi andi de o du, söseei de an sa paka Gadu u di sëmbë aki sö ko fii, (di paima di musu paka u wan sëmbë ko fii, hia sö tee taa na wan libisëmbë sa pakëën).”—Psalöm 49:7, 8.
Te wan sëmbë di abi zöndu dëdë, nöö a ta dëdë paka da dee zöndu fëën seei nöö. An sa paka puu hënseei fu an dëdë, söseei an sa paka da dee zöndu u wan woto sëmbë tu (Loomë 6:7). U bi abi wan sëmbë fanöudu di bi o sa dëdë da u, nöö a bi musu dë telutelu söndö föutu, söseei an bi musu du zöndu wan daka. Nöö an bi o dëdë u paka fëën seei zöndu, ma a bi o dëdë paka u dee zöndu fuu.—Hebelejën 10:1-4.
Di soni dë hën Gadu seeka da u. A manda di Womi Mii fëën de kai Jesosi, di bi dë ku ën a liba ala, ko a goonliba aki. Nöö de bi pai ën kuma wan libisëmbë di bi dë telutelu a hii futu, söseei an bi abi zöndu (1 Petuisi 2:22). Jesosi bi taki taa a bi ko ’paka hën libi kuma paima fu sömëni hia sëmbë sa ko bunu ku Gadu’ (Maikusi 10:45). A dëdë faa paka u dee zöndu fuu, söseei faa puu u a dëdë basu, nöö a sö wan fasi u sa feni libi.—Johanisi 3:16.
NA UN TEN SËMBË AN O TA DËDË MÖÖN?
A di ten aki, u ta libi a „wan tumisi hogi ten”, kumafa di Bëibel bi taki a fesi. Nöö di soni aki ta lei taa u ta libi a dee „lasiti daka” u di hogi goonliba aki (2 Timoteo 3:1). Dee lasiti daka o kaba te di „daka dou te [Gadu] o kuutu dee hogi sëmbë, söseei te a o kii de tuu puu” (2 Petuisi 3:3, 7, NW). Ma dee sëmbë dee lobi Gadu o fika a libi, söseei de o feni di „libi u teego.”—Mateosi 25:46.
Jesosi bi ko paka ku hën „libi kuma paima fu sömëni hia sëmbë sa ko bunu ku Gadu.”—Maikusi 10:45
Milionmilion sëmbë o sa feni pasi u libi u teego te Gadu o weki de ko a libi baka. Jesosi bi lei taa sëmbë di dëdë sa toona ko a libi baka, di a bi weki wan womi mii di bi dëdë, di a bi go a di foto de kai Nain. A bi dë di wan kodo womi mii u wan mujëë di manu fëën bi dëdë, nöö „tjali” u di mujëë bi kisi Jesosi. Fëën mbei Jesosi bi weki di womi mii ko a libi baka (Lukasi 7:11-15). Söseei apösutu Paulosu bi taki taa: „Mi ta biibi tu taa te sëmbë dëdë de o toona weki baka, dee bi libi bunu a Masa Gadu wojo ku dee an bi libi bunu tuu.” U sa dë seiki taa di soni aki o pasa tuutuu. Di soni aki ta lei u unfa Gadu lobi libisëmbë tjika.—Tjabukama 24:15.
Milionmilion sëmbë o sa libi u teego a goonliba aki. Di Bëibel ta taki taa: „Dee sëmbë dee ta libi a wan leti fasi, de o feni di goonliba, nöö naandë de o ta libi u teego” (Psalöm 37:29). A di ten dë, de o ta wai seei, nöö de o ta fii bunu te de si fa dee soni di apösutu Paulosu bi sikifi söwan 2000 jaa pasa, o pasa tuutuu. A bi sikifi taa: „Wë Dëdë oo, andi seei i wini? Naasë di poosian fii dë möön?” (1 Kolenti 15:55) Di gan felantima u libisëmbë de kai dëdë an o dë möön!