Unfa i sa ko abi wan möön bunu libi?

DI LIBI di u ta libi nöunöu an dë kumafa Gadu bi abi a pakisei. Di goonliba bi musu ko fuu ku sëmbë di bi o kë u Gadu tii de, a bi musu fuu ku sëmbë di ta haikëën, söseei di ta djeesi ën a dee fasi dee a abi. Gadu bi kë taa de bi musu ta libi fiifii makandi, söseei taa de bi musu kiija dee mii u de makandi. Gadu bi kë tu taa de bi musu ko ta lei njunjun soni, söseei taa de bi musu mbei hii di goonliba ko toon wan paladëisi.

GADU PAAMUSI U TAA A O MBEI DI GOONLIBA KO DË KUMAFA A BI ABI A PAKISEI

• „Gadu ta mbei feti kaba a goonliba palalaa te dou.”​—Psalöm 46:9.

• „Dee sëmbë dee [ta] poi di goonliba fii kaba a sösö, nöö awaa juu fii kisi fii poi de kaba a sösö tu.”​—Akoalimbo 11:18.

• „Na wan hojo sëmbë o taki taa: ’Mi suwaki.’”​—Jesaaja 33:24.

• „Dee sëmbë dee mi tei, o feni wini u di wooko u de.”​—Jesaaja 65:22.

Unfa dee soni di di Bëibel ta taki aki o pasa tuutuu? Gadu tei di Womi Mii fëën, Jesosi, buta Könu u wan bumbuu tii di dë a liba ala, nöö a o tii goonliba aki. Di Bëibel ta kai di tii dë, di Könuköndë u Gadu (Daniëli 2:44). Di Bëibel ta taki u Jesosi taa: „Gadu o butëën ko könu.”​—Lukasi 1:32, 33.

Di Jesosi bi dë a goonliba aki, nöö a bi du foombo wooko u lei taa a o mbei di libi ko möön suti da u möön fa a dë nöunöu aki, te a o ta tii.

JESOSI BI LEI U DEE BUNU SONI DEE A O DU DA LIBISËMBË

• A bi ta kula hii sootu pei siki di sëmbë bi abi, u lei fa a o puu dee siki dee ta toobi libisëmbë.​—Mateosi 9:35.

• A bi piki di ze faa tan pii, u lei fa a o heepi sëmbë tjika u soni kuma gaan ventu nasö gaan wata an du hogi ku de möön.​—Maikusi 4:36-39.

• A bi da dusudusu sëmbë soni u njan, u lei fa a o ta da sëmbë hii dee soni di de abi fanöudu.​—Maikusi 6:41-44.

• A bi mbei wata ko toon win a wan tööu piizii, u lei fa a o heepi sëmbë tjika u di libi ta suti da de.​—Johanisi 2:7-11.

Andi i sa du fii sa feni di libi di Gadu ta seeka faa da dee sëmbë dee lobi ën? Wë wan „pasi” dë ka i musu waka. Di Bëibel ta taki taa hën da „di pasi di ta tja sëmbë go feni libi, . . . [di] biti sëmbë ta feni”.​—Mateosi 7:14, NW.

DI PASI DI TA TJA SËMBË GO A WAN MÖÖN BUNU LIBI

Andi da di pasi di ta tja sëmbë go feni libi? Gadu taki taa: „Mi Jehovah, da i Gadu. Mi da di sëmbë di ta lei i sö taa i sa feni bunu. Mi da di sëmbë di ta tii i ka i musu waka” (Jesaaja 48:17). Te i ta waka a di pasi aki, nöö joo ko abi wan möön bunu libi.

Jesosi bi taki taa: „Miseei wë da di pasi ku di tuu, ku di libi” (Johanisi 14:6). Ee u ta du dee soni di Jesosi bi taki, söseei ee u ta djeesi ën a di fasi fa a bi ta du soni, nöö u ku Gadu o sa ko dë mati, nöö woo ko abi wan möön bunu libi.

Unfa i sa feni di pasi di ta tja sëmbë go feni libi? Gaan hia keiki dë, ma Jesosi bi taki taa: „Na hii sëmbë di ta kai mi ’Masa, Masa’ o denda a di Könuköndë u liba ala. Ma di sëmbë di ta du dee soni dee mi Tata kë, hën o denda nëën” (Mateosi 7:21, NW). Söseei a bi taki taa: „Joo si a di libi u de taa ganjansëmbëma de dë” (Mateosi 7:16). Di Bëibel sa heepi i fii ko feni di tuutuu biibi.​—Johanisi 17:17.

Unfa i sa bigi waka a di pasi di ta tja sëmbë go feni libi? I musu ko sabi soni u di sëmbë di da hii u tuu libi: Ambë dëën? Unfa de ta kai ën? Un pei sëmbë a dë? Andi a ta du da u? Andi a kë taa u musu du?a

Gadu an kë taa libisëmbë musu ta wooko nöö, ta njan nöö, ta pëë nöö, ta pai miii nöö a kaba. U sa lei soni u di Gadu di mbei u, nöö u ku ën sa ko dë mati. U sa lei taa u lobi ën te u ta du andi a taki. Jesosi bi taki taa: „Andi da di libi u teego? Hën da u de ko sabi i, di wan kodo tuutuu Gadu u mundu.”​—Johanisi 17:3.

DI FOSU SONI DI I MUSU DU

Te i ko sabi andi Gadu kë taa i musu du, nöö kandë joo ko si taa i musu tooka so soni a i libi. Kandë joo si kuma a dë wan taanga soni fii du. Ma fuu taki ën kumafa a dë, joo ko abi wan möön bunu libi te i bigi ta waka a di pasi di ta tja sëmbë go feni libi. Dee Jehovah Kotoigi sa heepi i fii ko sabi fanöudu soni di nama ku Gadu. De sa ko lei i soni u Bëibel söndö fii paka, a di juu ku di kamian di möön bunu da i. I sa manda wan bosikopu da u te i go a di website fuu www.jw.org.