Unfa u sa du di diniwooko fuu möön bunu—Buta wan hakisi da di sëmbë fii sa toona go nëën

Faandi mbei a dë fanöudu: Te u feni wan sëmbë di kë sabi möön, nöö u kë toona go nëën, sö taa u sa munja di sii u di tuutuu lei di u paandi (1 Kol. 3:6). Hën da te u fan ku wan sëmbë, nöö ufö u go, u musu hakisi di sëmbë na un ten u sa toona ko nëën. Boiti di dë, a bi o bunu u buta wan hakisi dëën, di u sa piki te woo toona go nëën. Di soni aki o mbei di sëmbë sabi faandi woo taki te woo toona ko nëën, nöö ee di buku di u disa dëën ta piki di hakisi, nöö a o kë lesi ën seei. Te u buta wan hakisi da di sëmbë, nöö i ku ën sabi kaa faandi woon taki di woto pasi. Te u toona go nëën, nöö u sa piki ën taa u ko u piki di hakisi di u bi buta dëën, nöö a sö wan fasi u sa fan ku ën go dou.

Fa u musu du ën:

Te i ta seeka iseei da di peleikiwooko, nöö seeka wan hakisi tu di i sa buta da sëmbë, di joo sa piki te i toona go a de baka. A sa dë wan hakisi di nama ku wan woto u di buku nasö di talakitaati di joo dëën di daka dë. Nasö a sa dë wan hakisi di i sa piki ku wan u dee buku fuu di u ta lei sëmbë soni. Nöö i sa lei di sëmbë di buku dë te i toona go nëën.
Ufö i kaba fan ku wan sëmbë di bi kë sabi möön soni, piki ën taa i bi o kë fan ku hën wan pasi möön. Nöö awaa ufö i sa buta di hakisi dëën di i bi seeka. A so kamian sëmbë taa hia soni u du seei, nöö de an ta kë fii toona go a de. Ee sö, nöö kandë i sa taki wan soni kuma: „A dee lö juu aki i ta dë a wosu ö? [Da di sëmbë pasi faa piki] Woto wiki mi bi o kë pasa a i kölö sö u piki di hakisi aki . . . Ee i abi hia soni u du te mi ko, nöö i sa piki mi.”
Ee i da di sëmbë wan juu di joo toona go nëën, nöö i musu hoi iseei a di juu dë (Mat. 5:37). Te i toona go nëën, nöö toona buta wan hakisi dëën fii sa go nëën möön.

Pooba di soni aki di liba aki:

Te i ta seeka iseei da di peleikiwooko, nöö seeka wan hakisi di i sa buta da sëmbë, fii piki te i toona go a de. Piki dee woto peleikima di i ku de ta wooko di soni di i seeka.