Ko dë mati u Jehovah baka

HINIWAN jaa sömëni baaa ku sisa di de bi puu a di kemeente, ta toona ko a Jehovah. Te de toona ko a Jehovah, nöö Jehovah ku dee ëngëli ta wai seei! (Luk. 15:7, 10) Ee i da wan sëmbë di toona ko a Jehovah, nöö i sa dë seiki taa Jesosi, dee ëngëli, ku Jehovah seei tu ta wai seei taa i toona ko a di kemeente. Ma a sa pasa taa soni o ta taanga da i, te joo ta mbei möiti fii ku Jehovah ko dë mati baka. Andi ku andi sa pasa? Ma andi sa heepi i?

ANDI DA SO SONI DI SA MBEI A TAANGA DA I?

Sömëni baaa ku sisa ta fii bookosaka jeti, hii fa de toona ko a di kemeente. Kandë i ta fusutan unfa Könu Dafiti bi fii. Hii fa Jehovah bi dëën paadon u dee föutu dee a bi mbei, tökuseei a bi taki taa: „Dee föutu u mi hia sö tee taa ma sa tja de” (Ps 40:12; 65:3). Te wan sëmbë toona ko a Jehovah, nöö a sa pasa taa sömëni jaa longi, a sa ta fii sen, nasö háti sa ta fon mën u di soni di a bi du. De bi puu wan sisa de kai Isabelle a di kemeente, nöö a bi tei möön leki 20 jaa ufö a toona ko a Jehovah.a Ma di a toona ko a Jehovah, hën a bi taki taa: „A bi ta taanga da mi u mi biibi taa Jehovah sa da mi paadon.” Ee i lasi hati, nöö a sa pasa möön taa i ku Jehovah an dë mati (Nön. 24:10). Fëën mbei a bunu fii mbei möiti u di soni aki an pasa.

Woto baaa ku sisa di toona ko a Jehovah ta si kuma de an o sa du hii soni di dë fanöudu u de ku Jehovah sa ko dë gaan mati baka. Baka di wan baaa de kai Antoine bi toona ko a Jehovah, hën a bi taki taa: „Mi bi fëëkëtë sömëni u dee soni di mi bi lei, söseei mi bi fëëkëtë sömëni soni di mi bi ta du, di mi bi ta dini Jehovah.” U di so baaa ku sisa di toona ko a di kemeente ta fii sö, mbei a ta taanga da de u de du hii soni di de sa du da Jehovah.

Te wan gaan ventu ko booko wan sëmbë wosu di a bi lobi, nöö di sëmbë sa ta fii taa di wooko di a musu du u seeka di wosu baka hia poi. Wë sö nöö a sa dë da i tu te i ku Jehovah an dë mati möön. I sa ta fii kuma ja sa mbei hii dee möiti dë fii ku Jehovah ko dë mati baka. Ma heepi dë.

Jehovah ta piki u taa: „Gaantangi, boo seeka soni ko bunu baka” (Jes 1:18). I bi mbei taanga möiti kaa fii „seeka soni ko bunu baka.” Jehovah lobi i, u di i bi mbei di möiti dë. Hoi di soni aki a pakisei: U di i toona ko a Jehovah, mbei Jehovah sa lei Saatan taa a dë wan mindisonima!​—Nön 27:11.

U di i toona ko a Jehovah, mbei u sa taki taa i ko zuntu ku ën, nöö Jehovah seei o ko zuntu fii tu (Jak. 4:8). A ta bunu te woto baaa ku sisa si taa i dë a di kemeente baka. Ma woto soni dë di i musu du. I musu mbei möiti fii lobi Jehovah möön gaanfa. Hën da di Tata fii, söseei a dë di Mati fii tu. Unfa i sa du di soni dë?

BUTA MAAKA DI I SA DOU

Buta maaka di i sa dou. Kandë i sa mëni jeti andi i bi lei u Jehovah ku di Paladëisi di a paamusi u. Ma nöunöu i musu ko abi di guwenti u du so soni baka. I musu go a di peleikiwooko, i musu go a dee komakandi, söseei i musu ta dë makandi ku dee baaa ku dee sisa fii. Boo buta pakisei a so maaka di i sa dou.

I musu ta fan ku Jehovah. Di Tata fii ta fusutan taa te háti fii ta fon i u di föutu di i mbei hedi, nöö a sa ta taanga da i fii begi ën (Lom. 8:26). Aluwasi ee soni dë sö, tökuseei i „musu ta begi nango nöömö”. I musu ta piki Jehovah unfa i kë fii ku ën dë mati tjika (Lom. 12:12). Wan baaa de kai Andrej ta mëni unfa soni bi dë dëën. A bi taki taa: „Háti u mi bi ta fon mi gaanfa seei, nöö mi bi ta fii sen. Ma hii juu te mi bi ta begi, mi bi ta fii möön bunu. Mi bi ko ta dë bööböö.” Ee ja sabi andi i musu taki te joo begi, nöö i sa lesi dee begi u Könu Dafiti dee sikifi a Psalöm 51 ku Psalöm 65.

I musu ta lei soni u Bëibel. Te i ta lei soni u Bëibel, nöö a o heepi i fii ko abi wan taanga biibi, söseei a o heepi i fii ko ta möön lobi Jehovah (Ps. 19:7-11). Wan baaa de kai Felipe bi taki taa: „U di ma bi abi wan skeima u lesi Bëibel, söseei u lei soni fëën, mbei di biibi u mi bi ko suwaki. Nöö di soni dë mbei mi du wan soni di Jehovah an lobi. Ma kë toona mbei di seei föutu dë. Fëën mbei mi seeka soni u mi sa ta lei soni u Bëibel.” Iseei sa du di soni di di baaa aki bi du. Ee ja sabi andi i musu öndösuku, nöö i sa hakisi wan mati fii di lobi Jehovah faa heepi i.

Ko dë mati u dee baaa ku dee sisa baka. So sëmbë di toona ko a di kemeente, ta fëëë taa woto baaa ku sisa o ta si de wan fasi. Wan sisa de kai Larissa bi taki taa: „Mi bi ta fii sen gaanfa seei. Mi bi fii kuma mi bi du wan soni di bi mbei dee baaa ku dee sisa u mi fii tjali. Wan hii pisiten mi bi ta fii sö.” I sa dë seiki taa dee gaanwomi ku dee woto baaa ku sisa di abi wan taanga biibi, dë kabakaba u heepi i fii ku Jehovah ko dë mati baka. (Luku di pisi „Andi dee gaanwomi sa du?”) De ta wai taa i toona ko a di kemeente, nöö de kë fii ta dë waiwai!​—Nöng. 17:17.

Andi sa heepi i fii nama ku di kemeente baka? Wë i musu ta du dee soni di dee woto baaa ku sisa u di kemeente ta du. De nango a dee komakandi, söseei de ta du di peleikiwooko. Unfa dee soni aki sa heepi i? Wan baaa de kai Felix bi taki taa: „Dee baaa ku dee sisa bi ta wakiti seei u mi toona ko a di kemeente. Mi bi si taa de bi lobi mii tuutuu. Hii de tuu bi mbei möiti u mi fii bunu baka, de heepi mi fusutan taa Jehovah da mi paadon, söseei de heepi mi u mi dini Jehovah go dou.”​—Luku di pisi „Andi i sa du?”

JA MUSU DISA!

Te Saatan o si taa i ta mbei möiti fii ku Jehovah ko dë mati baka, nöö a o ta mbei soni miti i, sö taa di biibi fii sa ko suwaki (Luk. 4:13). Nöunöu i musu mbei möiti fii ku Jehovah ko dë gaan mati.

Jehovah bi taki wan soni u dee sikapu fëën. A bi taki taa: „Mi o go suku dee sikapu dee lasi. Mi o tja hii dee sikapu dee bi paaja ko makandi. Te wan u de futu booko, nöö mi o tai di futu fëën. Mi o heepi dee suwakiwan” (Eze. 34:16). Jehovah bi heepi sömëni baaa ku sisa u de ko dë mati fëën baka. I sa dë seiki taa a kë heepi iseei tu fii ku ën ko dë gaan mati baka.