1922 Wan Höndö Jaa Pasa Kaa

„WAN BUNU PAKISEI”

Di möön hia baaa ku sisa bi bigi ta du di peleikiwooko, nöö de bi abi möön hia buku fanöudu. Dee baaa a di Bëtëli u Brooklyn bi ta doloki dee Hei Wakitimawosu ku dee Ontwaakt!, ma woto masikapei bi ta doloki dee woto buku da de. Bakaten, sömëni liba longi di masikapei an bi sa doloki buku hia tjika da dee baaa u de peleiki möön. Fëën mbei Baaa Rutherford hakisi Baaa Robert Martin ee a si kuma de bi o sa doloki dee buku u de deseei.

Baaa Martin bi taki taa: „Wan bunu soni seei i hakisi dë, u di a o dë taa woo hopo wan masikapei ka woo sa doloki buku useei.” Dee baaa bi juu wan kamian a wan pasi de kai Concord Street nöbu 18 di dë a di foto Brooklyn, hën de bai dee masini di de bi abi fanöudu da di wooko.

Na hii sëmbë bi wai taa dee baaa bi o ta doloki buku deseei. Wan basi u wan masikapei di bi ta doloki buku da dee baaa, bi go luku di njunjun kamian ka dee baaa bi o ta doloki buku deseei. Di womi bi taki taa: „Un abi gaan kofaliki masini u doloki buku aki, ma na wan fuunu sa’ u wooko ku de. A sikisi liba dendu woon booko hii dee masini aki tuu kaba.”

Baaa Martin bi taki taa: „A bi djei kuma di womi aki bi abi leti. Ma u bi sabi taa Jehovah bi o heepi u. Nöö a bi heepi u tuu.” Baaa Martin bi abi leti. An bi tei longi seei, hën u bi bigi ta doloki möön leki 2000 buku wan daka.

U BI TA PELEIKI DA DUSUDUSU SËMBË A LADIO

Boiti di doloki di dee Jehovah Kotoigi bi ta doloki so u dee buku u de deseei, de bi bigi ta paaja di bunu buka a ladio. A 26 u bakajailiba u di jaa 1922, hën Baaa Rutherford bi fan a ladio u di fosu pasi. A bi dë wan sonde sapate. A bi hoi wan taki, nöö di në u di taki bi dë: „Milionmilion sëmbë di dë a libi nöunöu, an o dëdë möönsö.” A bi hoi ën, hën de bia ën a di ladio stasiön de kai KOG di bi dë a Los Angeles, California, na Amëëkanköndë.

Söwan 25.000 sëmbë bi jei di taki aki. So u de bi sikifi biifi manda da Baaa Rutherford u dëën tangi u di taki di a bi hoi. Wan u dee sëmbë aki bi dë wan womi de kai Willard Ashford, di bi ta libi a Santa Ana, di dë a di pisiwata de kai California. A bi gafa Baaa Rutherford da di bunu taki di a bi hoi. A bi taki taa: „U bi abi dii sëmbë a u pisi di bi dë ku suwaki, nöö de an bi o sa kumutu a wosu. Wa bi o sa ko haika di taki fii, aluwasi ee i bi hoi ën zuntu ku ka u ta libi.”

De bi hoi möön hia taki dee wiki baka di dë. Di Hei Wakitimawosu bi taki taa a kaba u di jaa 1922, „söwan 300.000 sëmbë bi jei di bunu buka a ladio”.

U di sëmbë bi lei taa de bi lobi dee taki di de bi ta jei a ladio, mbei dee Bëibel Öndösukuma bi buta taa de bi o mbei wan ladio stasiön a wan kamian a Staten Island. An bi longi ku di Bëtëli u Brooklyn. Dee Bëibel Öndösukuma bi o wooko ku di ladio stasiön aki u de paaja di bunu buka u di Könuköndë da gaan hia sëmbë. Di stasiön aki de bi kai WBBR.

„ADV”

A di Hei Wakitimawosu u 15 u höndima-liba u di jaa 1922, de bi taki taa a 5 te go miti 13 u wajamaka-liba u di jaa 1922, de bi o hoi wan gaan komakandi a Cedar Point, Ohio. Dee Bëibel Öndösukuma bi ta wai seei di de bi dou a di kamian dë.

A di fosu taki di Baaa Rutherford bi hoi, a bi taki taa: „Mi dë seiki taa Gadu o mbei soni waka bunu a di könklësi aki, söseei taa a o mbei möön hia sëmbë jei di buka fëën, möön dee ten dee pasa.” Dee baaa dee bi hoi dee taki a di könklësi, bi da dee baaa ku dee sisa taanga u de ta du di peleikiwooko.

A feeda 8 u wajamaka-liba, söwan 8000 sëmbë bi fuu di kamian ka de bi hoi di gaan komakandi. De bi dë seei ta wakiti di taki di Baaa Rutherford bi o hoi. De bi sikifi dee lëtë „ADV” a di pampia di de bi tei u kai sëmbë ko a di komakandi, nöö dee sëmbë bi ta wakiti u jei andi dee lëtë dë bi kë taki. Di de sindo, hën so u de si wan pei gaan koosu lolulolu a liba u di podium. Wan baaa de kai Arthur Claus di bi kumutu te a Tulsa, Oklahoma fu Amëëkanköndë ko a di gaan komakandi, bi feni wan bunu kamian u sindo, ka a bi o ta jei hii soni bunu. A di ten dë maiki ku bökusu an bi dë, nöö i bi musu haika bunu te di baaa di bi ta hoi di taki.

U di dee baaa an bi kë u sëmbë puu wotowan pakisei a di taki, mbei de an bi da sëmbë pasi u de ko a dendu möön di Baaa Rutherford bi bigi hoi di taki fëën. Baaa Rutherford bi bigi hoi di taki fëën a 9 juu pasa 30 miniti mamate. A bi bigi ku di soni di Jesosi bi taki a Mateosi 4:17. A bi taki taa: „Di Könuköndë u Gadu dë zuntu.” Di Baaa Rutherford bi taki unfa sëmbë bi o ta jei soni u di Könuköndë aki, hën a bi taki taa: „Jesosi seei bi taki taa te a toona ko baka, nöö a o tja dee sëmbë dee ta hoi deseei a Gadu ko a wan.”

Baaa Claus di bi dë sindosindo a wan bunu kamian, bi taki taa: „U bi dë seei piii ta haika di taki.” Ma te wan pisi, hën an bi ta fii bunu, nöö a bi musu kumutu go a döö. Baaa Claus an bi kë go a döö, u di a bi sabi taa ee a go, an bi o sa toona ko a dendu möön.

Baka wantu miniti, hën a bi bigi ta fii bunu baka. A bi taki taa di a bi ta waka faa go a dendu baka, hën a jei sëmbë ta lalu maun. Di soni aki bi mbei a bi kë ko sabi andi ta pasa a dendu ala seei! A bi pakisei taa aluwasi ee a musu subi go a di daki liba faa sa haika di taki go dou, nöö a o du ën. A di ten dë Baaa Claus bi abi 23 jaa. A bi feni wan fasi u subi go a liba. Dee fënsë dee bi dë a liba ala bi dë jabijabi, nöö a bi sa jei di taki bunu seei.

Ma Baaa Claus an bi dë hën wanwan. So u dee mati fëën bi dë a liba ala tu. Wan u dee mati fëën di de ta kai Frank Johnson bi kule go hakisi ën taa: „I abi wan tapa-faka u?”

Hën Baaa Claus piki taa: „Aai, mi abi.”

Hën Baaa Frank taki taa: „U bi ta begi ta hakisi Gadu fuu feni wan sëmbë di abi wan faka. I ta si di gaan koosu lolulolu ala u? A dë wan koosu ku wan soni sikifisikifi nëën. Haika di Kuutuma bunu e.a Te a o taki ’un musu paaja, paaja’, nöö i musu koti dee fö tatai aki.”

Baaa Claus bi dë ku faka a maun ta wakiti u Baaa Rutherford taki dee soni dee a musu taki, faa sa koti dee tatai. An bi tei longi möön, hën Baaa Rutherford dou a di möön sipan pisi u di taki fëën. A bi dë fajafaja, nöö a kan taa a bi fan möön taanga di a bi taki taa: „I musu dë wan Kotoigi di ta hoi hënseei a Gadu. Mbei möiti go dou, u te de poi hii dee poipoi keiki kaba a sösö. Paaja di bunu buka a hii së u goonliba. Hii sëmbë musu ko sabi taa Jehovah da Gadu, söseei taa Jesosi Keesitu da Könu u dee könu, ku Masa u dee masa. Tide da wan gaan daka. Luku, di Könu ta tii! Unu da dee sëmbë dee ta konda soni fëën. Fëën mbei un paaja, paaja, paaja di buka u di Könu ku di Könuköndë fëën!”

Baaa Claus bi taki taa hën ku dee woto baaa koti dee tatai u di gaan koosu, nöö hën a jabi seei gbogodoo. Di soni di de bi sikifi nëën bi dë: „Paaja di buka u di Könu ku di Könuköndë.” Di soni dë dee lëtë „ADV” bi kë taki.

WAN FANÖUDU WOOKO

Di könklësi di de bi hoi a Cedar Point bi heepi dee baaa ku dee sisa u de möön buta pakisei a di peleikiwooko, nöö de bi dë waiwai seei u du di wooko aki. Wan baaa u Oklahoma di dë na Amëëkanköndë, di bi ta du di pioniliwooko bi taki taa: „U bi ta peleiki a wan kamian ka sömëni sëmbë bi ta wooko ta suku wan pei zonka, nöö dee sëmbë aki bi pooti gaanfa seei.” Te sëmbë bi ta jei di bosikopu di dë a di buku de kai Golden Age (Di Goutu Ten), nöö „de bi ta këë”. Di baaa bi taki tu taa: „U bi ta wai seei taa u bi sa da de kötöhati.”

Dee Bëibel Öndösukuma aki bi fusutan bumbuu andi Jesosi bi taki a Lukasi 10:2. A bi taki taa: „Di goon bigi nöö di njanjan lepi u koti, ma wookoma biti poi.” Möön di kaba u di jaa bi ta zuntu, möön de bi ta paaja di bosikopu u di Könuköndë a hii së.