3 | I sa feni wini u dee woto u sëmbë dee dë a Bëibel

DI BËIBEL TA TAKI SONI U . . .Womi ku mujëë di bi abi wan taanga biibi, söseei di bi ta „fii leti kuma u tu”.—JAKOBOSI 5:17.

Andi di soni dë kë taki?

U sa feni sömëni woto u sëmbë a Bëibel dee bi abi peipei fii. Dee woto u de da soni di bi pasa tuutuu. Te u ta lesi dee woto u de, nöö u sa feni woto u so u de di bi ta fii leti kumafa u ta fii.

Unfa di soni aki sa heepi u?

Hii u tuu ta kë u wotowan fusutan fa u ta fii, möönmöön te u abi wan hedi dendu siki. Te u ta lesi dee woto u sëmbë a Bëibel, nöö u ta si taa deseei bi ta fii kumafa u ta fii, söseei taa de bi ta pakisei kumafa u ta pakisei tu. Di soni dë ta heepi u fuu ko fusutan taa na u wanwan dee fuka aki ta miti.

Di Bëibel ta taki soni u sömëni sëmbë di bi ta fii kuma saanfa-u-du u de kaba. A pasa ku i wan daka kaa taa i bi fii kuma i ko wei ku di libi ö? Wë Mosesi ku Elia ku Dafiti bi fii sö wan daka.—Nöbu 11:14; 1 Könu 19:4; Psalöm 55:4.
Di Bëibel ta taki soni u wan mujëë de kai Hana di bi ta „tjali gaanfa seei”, u di an bi sa pai mii, söseei u di di kambosa fëën bi ta mbei ën fa gaanfa seei.—1 Samuëli 1:6, 10.
Di Bëibel ta taki soni u wan womi tu, di de ta kai Jöpu. Hii fa a bi dë wan womi di bi abi wan taanga biibi, tökuseei a bi fii bookosaka gaanfa seei. Wan daka a bi taki taa: „Mi ta buuse di libi u mi, ma kë libi möön.”—Jöpu 7:16.

Te u ko sabi unfa dee sëmbë dee Bëibel ta taki soni u de aki bi feni heepi, nöö useei o sa feni di taanga di u abi fanöudu fuu libi ku dee bookohedi fuu.

Di fasi fa di Bëibel ta heepi wan womi de kai Kevin

Di soni di wan hedi dendu siki ta du ku mi

„Di mi bi ta zuntu u tapa 50 jaa, hën data ko si taa mi abi wan hedi dendu siki di ta mbei taa di fasi fa mi ta fii ta tooka vou sö. So juu mi ta si kuma mi sa seeka hiniwan fuka di ta miti mi. Ma so juu mi ta fii taa a möön bëtë ma bi dë a libi.”

Di fasi fa di Bëibel ta heepi mi

„Wan u dee woto u sëmbë u Bëibel di ta heepi mi, da di woto u apösutu Petuisi. A bi mbei föutu di bi ta mbei a ta fii kuma an dë wan hojo soni. Ma an bi fika ta pakisei dee soni dë nöömö. Petuisi bi ta mbei möiti u dë makandi ku dee mati fëën dee bi ta booko de hedi ku ën. Te di siki u mi ta möön mi poi, nöö di soni dë sa mbei mi fii kuma ma dë wan hojo soni. Ma leti kuma Petuisi, mi ta mbei möiti u dë makandi ku dee mati u mi, u di de ta heepi mi u mi hoi dou.

„Wan woto soni di ta heepi mi, da di woto u Könu Dafiti. A bi lo’ u pasa taa Könu Dafiti bi ta booko hën hedi gaanfa ku di fasi fa soni bi dë dëën, söseei dee föutu dee a bi mbei bi ta mbei a ta tjali. Di woto fëën ta da mi taanga, u di so juu miseei ta du soni di ta hati mi bakaten, söseei mi ta taki soni di ta hati mi bakaten tu. Di soni di Könu Dafiti bi taki a Psalöm 51 ta da mi taanga seei. A bi taki a vers 3 taa: ’Mi sabi dee föutu dee mi mbei bumbuu, nöö hii juu di zöndu u mi ta dë da mi mi ta si.’ Di tëkisi aki ta taki unfa soni ta dë da mi te mi ta fii bookosaka gaanfa seei, u di a dee lö ten dë a ta taanga da mi, u mi si miseei kuma bumbuu sëmbë. Mi lobi di soni di Dafiti bi taki a vers 10 tu. A bi taki dë taa: ’Gadu o, mi ta begi i, mbei mi ko abi wan limbo hati, nöö mbei mi ko abi wan njunjun pakisei, sö taa mi sa taanpu gingin.’ A di seei fasi mi ta hakisi Gadu faa heepi mi u mi ko ta si miseei wan woto fasi. Mi ta feni taanga a vers 17 tu. A ta taki taa: ’Gadu o, ja o dë piii ta luku wan sëmbë di booko saka nasö di lasi hati, söndö fii heepi ën.’ Di tëkisi aki ta da mi taanga, u di a ta lei mi taa Gadu lobi mi.

„Te mi buta pakisei a dee woto u dee sëmbë dee sikifi a Bëibel, söseei te mi buta pakisei a dee soni dee Gadu ta du da mi nöunöu, nöö mi ta dë seiki taa soni o waka bunu a di ten di ta ko, kumafa Gadu paamusi u. Di soni dë ta da mi taanga u mi hoi go dou.”