I ta mëni dee soni aki ö?

I bi lesi dee Hei Wakitimawosu u di jaa aki ö? Wë luku ee i sa piki dee hakisi aki:

Andi a kë taki fii „ko abi wan hii oto pakisei”? (Lom. 12:2)

Na du nöö u musu ta du bunu soni nöö a kaba, ma u musu ta öndösuku un pei sëmbë u dë tuutuu, söseei u musu ta mbei hii möiti fuu ta tooka soni a u libi fuu ko ta möön libi kumafa Gadu kë.—w23.01, bld. 8-9.

Unfa u sa lei taa u ta du soni ku köni te u ta buta pakisei a dee soni dee ta pasa a di goonliba aki?

U kë ko sabi unfa dee soni dee ta pasa a di ten fuu aki ta mbei dee tjabukama woto u Bëibel pasa tuutuu. Ma ka fuu ta taki andi u ta mëni taa o pasa, nöö a bi o bunu fuu ta taki u dee soni dee di ölganisaasi u Jehovah tja ko a limbo da u, fuu sa ta libi fiifii ku useei go dou (1 Kol. 1:10).—w23.02, bld. 16.

Unfa di dopu u Jesosi tooka ku di u dee bakama fëën?

Jesosi an bi abi u buta hën libi a Jehovah maun, u di a bi dë sëmbë u di föluku u Gadu, di bi buta de libi a Gadu maun kaa. Jesosi an bi abi zöndu, nöö an bi abi u lei taa a ta tjali taa a du zöndu.—w23.03, bld. 5.

Unfa u sa heepi dee wotowan u de sa ta da piki a komakandi?

U sa ta mbei möiti u da sati piki, söseei u da wotowan pasi u de da piki tu. Wa musu ta taki hia soni poi, nöö dee wotowan o sa feni soni u taki tu.—w23.04, bld. 23.

Andi di da di „Santa Pasi” di Jesaaja 35:8 ta taki fëën?

A di ten u dee Dju, nöö di gaan pasi aki bi dë di pasi ka de bi o waka kumutu a Babilon go a Jelusalen. Ma an bi dë wan tuutuu pasi. Unfa soni dë a di ten aki? A dee jaa ufö 1919, de bi du wantu fanöudu wooko u seeka soni. De bi puu di Bëibel ko a woto töngö, söseei de bi doloki ën gaanfa möön hiniwan woto buku. Dee sëmbë u Gadu bi waka a di „Sata Pasi” fu te de dou ka de musu dou fu de sa feni dee bunu di di Könuköndë o tja ko.—w23.05, bld. 15-19.

Ambë da dee tu mujëë dee Nöngö kapitë 9 ta taki soni u de?

Di buku Nöngö ta taki u „wan don mujëë” di ta kai sëmbë u de ko nëën, nöö dee sëmbë dee nango nëën ta saka go „a geebi”. A ta taki tu u wan woto mujëë di di Bëibel ta tei maaka ku „tuutuu köni”. Dee sëmbë dee nango nëën pisi ta ’waka a wan fasi di ta lei taa de abi fusutan’, nöö de o feni libi (Nöng. 9:1, 6, 13, 18).—w23.06, bld. 22-24.

Unfa a bi dë gbelingbelin u si taa Jehovah an ta suku fini a soni poi, söseei taa a abi sakafasi te u luku di fasi fa a bi libi ku Lötu?

Jehovah bi piki Lötu faa fusi kumutu a Sodom, nöö a kule go a di pisiwata ka dee kuun dë. Ma di Lötu begi Jehovah faa mbei a go a di foto de kai Zoali, hën Jehovah disëën be a go.—w23.07, bld. 21.

Andi wan mujëë sa du ee hën manu ta luku fanafiti soni u womi ku mujëë?

A musu ta hoi a pakisei taa na nëën di föutu kumutu. A bi o bunu faa ta buta pakisei a di dë di hën ku Jehovah dë mati, söseei faa ta kai pakisei a dee woto u dee mujëë u Bëibel dee bi feni kötöhati a Jehovah. A sa ta heepi hën manu faa ta köni u fu an luku dee soni dë.—w23.08, bld. 14-17.

Te wan sëmbë hakisi u wan taanga soni di nama ku di biibi fuu, nöö unfa di köni di u o abi u fusutan soni sa heepi u fuu fan ku ën a wan lesipeki fasi?

U sa ta si dee soni di dee sëmbë ta hakisi u kuma wan soni di sa heepi u fuu ko sabi andi dë a de hati. A sö wan fasi woo sa dë kabakaba u fan ku de a wan lesipeki fasi.—w23.09, bld. 17.

Andi u sa lei a Malia te a nama ku di mbei di u musu mbei möiti fuu ko taanga a di biibi?

Malia bi feni taanga a wotowan di a jei taa hën o dë di mama u di Mësiasi. Gabiëli ku Elizabëti bi da Malia taanga ku di Wöutu u Gadu. Useei sa feni taanga a dee baaa ku dee sisa fuu tu.—w23.10, bld. 15.

Unfa Jehovah sa piki dee begi fuu?

Jehovah paamusi u taa a o haika dee begi fuu, söseei taa a o buta pakisei a di fasi fa de ta nama ku dee soni dee a abi a pakisei u du (Jel. 29:12). Ee möön leki wan sëmbë begi hakisi ën di wan seei soni, nöö a sa pasa taa an piki dee begi dë a di seei fasi. Ma tökuseei hii juu a o ta heepi u.—w23.11, bld. 21-22.

Loomë 5:2 ta taki u di biibi di u ta biibi taa Gadu o du andi a paamusi u. Ma faandi mbei vers 4 ta taki u di seei soni baka?

Te wan sëmbë jei di bunu buka, nöö a sa ko abi di biibi taa a o libi u tëëgo a wan paladëisi a goonliba aki. Ma te fuka ta miti ën, te a ta hoi dou, söseei te a ta si taa Gadu ta wai ku ën, nöö di soni dë ta mbei di biibi fëën ko möön taanga. A ta möön dë seiki taa a o fini di libi u teego.—w23.12, bld. 12-13.