Di Bëibel ta lei u andi bunu ku andi an bunu

Ee u ta buta pakisei a di fasi fa u ta fii, nasö a di fasi fa wotowan ta fii, nöö wa o sa dë seiki ee dee soni dee u kë du o mbei u dë waiwai. Faandi mbei u taki sö? Wë di Bëibel ta piki u finifini faandi mbei. A ta heepi u fuu ko sabi andi bunu ku andi an bunu, nöö di soni dë ta heepi sëmbë u de ta dë waiwai.

U ABI GADU FANÖUDU FAA LEI U SONI

Jehovaha ta wooko ku di Bëibel u lei libisëmbë taa de abi ën fanöudu, söseei taa de an sa du hii soni söndö faa heepi de (Jelemia 10:23). Fëën mbei a ta wooko ku di Bëibel u lei u fa u musu ta du soni. A lobi u, nöö a kë tjubi u be hogi an miti u. An kë fuu bai sabisö u di wa bi du soni ku köni, söseei an kë fuu du soni di o mbei di libi ko ta möön taanga da u (Detolonomi 5:29; 1 Johanisi 4:8). Ma na di dë nöö, Gadu da di möön bunu sëmbë di sa lei u andi bunu ku andi an bunu. Hën mbei u, nöö a abi di köni ku di sabi di dë fanöudu u lei u soni (Psalöm 100:3; 104:24). Ma hii fa a dë sö, tökuseei Gadu an ta duwengi sëmbë u hoi dee wëti fëën.

Adam ku Eva, da di fosu womi ku di fosu mujëë di Jehovah Gadu mbei, nöö a bi da de hii dee soni di de bi abi fanöudu u de sa ta dë waiwai (Kenesesi 1:28, 29; 2:8, 15). A bi piki de wanlö soni di de bi musu du, ku di de an bi musu du, nöö dee soni dë an bi dë gaan taanga soni. Ma a bi disa de be deseei luku ee de o piki ën buka, nasö ee de an o piki ën buka (Kenesesi 2:9, 16, 17). A tjali taa Adam ku Eva an bi kë libi kumafa Gadu bi lei de. Ma de bi bia ta libi kumafa deseei kë (Kenesesi 3:6). Wë nöö unfa soni bi waka da de? Libisëmbë ta möön dë waiwai te de ta taki da deseei andi bunu ku andi an bunu ö? Wë nönö! Di fasi fa soni pasa a dee jaa dee pasa, ta lei u taa te sëmbë an ta buta pakisei a dee wëti u Gadu, nöö soni an ta waka bunu da de, söseei de an ta dë waiwai.—Peleikima 8:9.

Di Bëibel ta lei u dee soni dee u abi fanöudu fuu sa ta du soni ku köni. A sa heepi u aluwasi ambë da u. (2 Timoteo 3:16, 17; luku di pisi „Wan buku di mbei da hii pei sëmbë”.) Luku fa di Bëibel ta heepi u.

Ko sabi möön fini faandi mbei a fiti u kai di Bëibel di Wöutu u Gadu.—1 Tesalonika 2:13. Luku di fëlön de kai Ambë sikifi di Bëibel? A dë a di website fuu jw.org.

WAN BUKU DI MBEI DA HII PEI SËMBË

Di Sëmbë di mbei u köni, söseei a lobi u. Fëën mbei an ta bigi da u taa dee soni dee a kë lei u dë u feni a hii së u goonliba. Luku wantu soni di ta lei u taa di Bëibel da wan buku di mbei da hii pei sëmbë:

Möön leki 3500 Di nöbu aki ta lei u na un mëni töngö wan pisi u Bëibel dë u feni. Woto buku an dë kuma di Bëibel, hën da di wan kodo buku di dë u feni a sö hia töngö.
Möön leki 5000.000.000 Di nöbu aki ta lei u unfa de doloki di Bëibel hia tjika. Woto buku an dë di paaja a goonliba hia sö wan daka.

Di Bëibel an ta lei u taa wan föluku, nasö wan nasiön bunu möön wan wotowan. U ta fusutan seei gbelingbelin taa di buku aki mbei da hii pei sëmbë.

I sa lesi di Bëibel a di website fuu jw.org. A dë u feni a möön leki 250 töngö.

FAANDI MBEI SO SËMBË TA SI KUMA DI BËIBEL AN SA HEEPI DE?

So sëmbë ta taki taa di Bëibel an sa heepi u fuu ko sabi bunu ku hogi. Luku andi so u de sa ta taki:

So sëmbë sa taki taa: „Dee soni dee sikifi a Bëibel an ta kai a wan.”

Di fasi fa soni dë tuutuu: Te i luku ën, nöö a sa djei kuma so pisi u Bëibel an ta kai ku dee woto pisi. Ma te i öndösuku na un ten, söseei unfa soni bi dë a di ten di de bi sikifi dee pisi u Bëibel dë, nöö i ta ko si taa de ta kai ku deseei.

Ee i kë ko sabi di woto aki möön fini, nöö i sa lesi di woto de kai „Spreekt de Bijbel zichzelf tegen?”, di dë a di website fuu jw.org.

So sëmbë sa taki taa: „Dee sëmbë dee ta taki taa de ta libi ku dee wëti u Bëibel ta du sömëni soni di an bunu, fëën mbei a musu u dë taa di Bëibel an sa heepi sëmbë u de ko sabi andi bunu, ku andi an bunu.”

Di fasi fa soni dë tuutuu: Wa sa kuutu di Bëibel taa an bunu u di dee sëmbë dee ta du hogi an ta du andi a ta taki. A bi taki a fesi taa gaan hia sëmbë, te kisi dee keiki fesima, bi o ta taki taa de ta libi ku dee wëti u Bëibel, ma di fasi fa de ta libi bi o ta lei taa an dë sö. A bi taki tu taa, de bi o ta mbei sëmbë ta „kosi dee bumbuu lei u Gadu”.—2 Petuisi 2:1, 2.

Ee i kë ko sabi fa sömëni keiki fesima an ta du dee soni dee di Bëibel ta taki, nöö i sa lesi di woto de kai „Is religie niet gewoon big business?”, di dë a di website fuu jw.org.

So sëmbë sa taki taa: „Dee sëmbë dee ta libi ku dee wëti u Bëibel an ta lesipeki dee sëmbë dee an dë kuma de.”

Di fasi fa soni dë tuutuu: Di Bëibel ta lei u taa u musu ta lesipeki wotowan. Nöö a ta kuutu dee sëmbë dee abi dee fasi dee woo taki u de aki:

Sëmbë di ta si deseei hei möön wotowan.—Filipi 2:3.
Sëmbë di an ta lesipeki dee sëmbë dee na abi di wan seei biibi kuma de, nasö di an ta du soni kuma de.—1 Petuisi 2:17.
Sëmbë di ta duwengi wotowan u de ko ta si soni kuma de.—Mateosi 10:14.

Di Bëibel ta lei u taa hii juu Gadu ta libi bunu ku sëmbë, söseei taa hii juu a ta libi a wan leti fasi ku de. Fëën mbei a kë fuu ta djeesi ën.—Loomë 9:14.

Ee i kë ko sabi di woto aki möön fini, nöö i sa lesi di woto de kai „Tolerantie: Hoe de Bijbel kan helpen”, di dë a jw.org.

DI BËIBEL TA LEI U UNFA GADU KË FUU TA DU SONI

Di Bëibel ta lei u fa Gadu bi ta libi ku libisëmbë sensi di a mbei de. Dee soni dee sikifi a di Bëibel ta lei u andi bunu a Gadu wojo, ku andi an bunu nëën wojo. Söseei a ta lei u andi o tja wini ko da u, ku andi o mbei hogi miti u (Psalöm 19:7, 11). Dee soni dee sikifi a di buku dë, da tuutuu soni, de an ta tooka nöiti, nöö de sa heepi u fuu ta du soni ku köni hiniwan daka.

Buta pakisei a di soni di sikifi a Nöngö 13:20. A ta taki taa: „Di sëmbë di ta waka ku köni sëmbë o ko köni, ma di sëmbë di ta hulu don sëmbë, soni an o nango bunu dëën seei.” Leti kumafa di mama wëti aki bi ta heepi sëmbë a di ten di pasa, sö nöö a ta heepi sëmbë a di ten aki tu. Di Bëibel ta taki u sömëni woto soni di sa heepi u.—Luku di pisi „Dee soni dee sikifi a Bëibel an ta gaandi”.

Ma kandë i sa ta hakisi iseei taa: ’Unfa mi sa ko dë seiki ee dee soni dee sikifi a di Bëibel ta heepi sëmbë a di ten aki tuutuu?’ Wë di pisi di ta ko o lei i fa di Bëibel bi heepi wanlö sëmbë.

a Jehovah da di në u Gadu.—Psalöm 83:18.

DEE SONI DEE SIKIFI A BËIBEL AN TA GAANDI

Hii fa di Bëibel sikifi söwan 2000 jaa pasa kaa, tökuseei a ta heepi sëmbë a di ten aki jeti. Dee soni dee libisëmbë ta kë an ta tooka. Sensi di libisëmbë dë, hën de ta mbei möiti u abi wan bunu libi, söseei u de ta dë waiwai (Peleikima 1:9). Wë u di dee lei u Bëibel an ta gaandi, mbei u sa dë seiki taa a sa heepi u fuu ko ta dë waiwai.

Du soni ku wan limbo háti

’U kë fuun ta begi da u be u ta libi a wan leti fasi nango nöömö.’—Hebelejën 13:18.
„Ee wan sëmbë i bi ta fufuu, nöö be i disa. Be i go suku bumbuu wooko ta du.”—Efeise 4:28.

Ko sa’ u libi ku wotowan

„Na wan sëmbë musu ta du wan soni di bunu dëën seei nöö a kaba e, ma i musu ta mëni andi dë bunu da di otowan fii tu.”—1 Kolenti 10:24.
„Un musu hoi pasensi da unuseei ta da unuseei paadon ku hii unu hati.”—Kolosën 3:13.

Andi sa heepi u fuu ta du soni ku köni?

„Wan sëmbë di na abi öndöfeni ta biibi hii soni di a jei, ma wan köni sëmbë ta luku bunu ka a ta buta futu.”—Nöngö 14:15.
„Di köni sëmbë ta si di hogi ta ko miti ën, nöö a ta kule go tjubi, ma di sëmbë di an sabi soni ta waka go dou, nöö fëën mbei a musu tja sitaafu fëën.”—Nöngö 22:3.