Andi i musu du fii sa libi u teego?

1. Unfa so sëmbë sa ta pakisei u di libi di sëmbë o libi u teego?

SÖMËNI sëmbë ta köni ku dee soni di de ta njan, söseei de ta mbei möiti u abi di guwenti u ta du sport, sö taa de sa ta dë gösöntu. Ma tökuseei de an ta dë ku di mëni taa dee soni dë o mbei de libi u teego. Kandë de ta pakisei taa sëmbë an sa libi u teego. Ma Jesosi hën a bi taki taa sëmbë sa „libi u teego”, te u luku Johanisi 3:16 ku Johanisi 5:24.

2. Andi Johanisi kapitë 6 ta taki u di libi di sëmbë sa libi u teego? (Johanisi 6:39, 40)

² Wan daka, hën Jesosi da dusudusu sëmbë bëëë ku fisi a wan foombo fasi u de njan.a Di soni dë bi dë wan gaan foombo soni seei, ma di soni di a bi taki baka di dë, bi möön dë gaan soni. Dee gaan hia sëmbë bi faakëën go a Kapenaumi, zuntu ku di lio u Galilea, nöö a bi piki de ala taa sëmbë sa toona weki ko a libi baka, söseei taa de sa libi u teego. (Lesi Johanisi 6:39, 40.) Pakisei luku un wini di soni aki sa tja ko da hii dee mati fii, ku hii dee sëmbë fii dee lasi libi. Di soni di Jesosi bi taki aki, ta mbei u dë seiki taa sömëni sëmbë di dëdë sa weki ko a libi baka, söseei taa ju ku dee sëmbë fii tuu sa feni di libi u teego. Ma hii fa a dë sö, tökuseei dee soni dee Jesosi bi taki go dou a Johanisi kapitë 6, bi taanga da sömëni sëmbë u de fusutan. Boo buta pakisei möön fini a dee soni dë.

3. Andi Jesosi bi taki fëën seei a Johanisi 6:51?

³ Baka di Jesosi bi da dee gaan hia sëmbë soni u njan a wan foombo fasi, hën de pakisei go a di fasi fa Jehovah bi ta da dee gaansëmbë u de mana a di sabana. Di Wöutu u Gadu ta kai di mana „Gadu Köndë bëëë” (Ps. 105:40; Joh. 6:31). Jesosi bi wooko ku di mana u lei de wan gaan fanöudu soni. Hii fa di mana bi dë wan soni di Gadu seei bi ta da dee Isaëli sëmbë u de njan, tökuseei de bi ko dëdë bakaten (Joh. 6:49). Ma Jesosi bi kai hënseei di „tuutuu Gadu Köndë bëëë”, di „bëëë u Gadu”, ku „di bëëë di ta da sëmbë libi u teego” (Joh. 6:32, 33, 35). Jesosi bi lei unfa hën ku di mana tooka tjika. A bi taki taa: ’Mi da di bëëë di ta da sëmbë libi. A Gadu mi kumutu, nöö di sëmbë di ta njan di bëëë aki o libi u teego.’ (Lesi Johanisi 6:51.) Dee Dju dee bi jei di fan u Jesosi hati bi boonu. Unfa seei Jesosi sa taki taa a kumutu a liba ala kuma di „bëëë” di bunu möön di foombo mana di Gadu bi ta da dee gaansëmbë u de? Baka di dë, hën Jesosi bi piki de taa: ’Di bëëë di mi ta taki aki, nöö hën wë da di sinkii u mi aki.’ Andi a bi kë taki ku di soni aki? Wë a dë wan gaan fanöudu soni seei fuu ko fusutan andi a bi kë taki, biga di soni dë ta lei u unfa u ku dee sëmbë fuu sa feni di libi u teego. Boo luku andi Jesosi bi kë taki.

DI SINKII U JESOSI, KU DI BËËË DI TA DA SËMBË LIBI

4. Faandi mbei di soni di Jesosi bi taki bi toobi so sëmbë?

⁴ A bi bigi da so u dee sëmbë dee bi jei di Jesosi bi taki taa a o da „hii goonliba” di sinkii fëën u de „sa feni libi”. Pakisei de bi ta pakisei taa a bi o da de di sinkii fëën u de njan u? (Joh. 6:52) Wë baka di Jesosi bi taki di soni dë, hën a bi toona taki wan woto soni di möön toobi de. A bi taki taa: „Ee ja njan di sinkii u Mi di ko Libisëmbë Mii aki, söseei ee ja bebe di buuu u mi, nöö ja feni libi seei jeti.”​—Joh. 6:53.

5. Faandi mbei u sa dë seiki taa Jesosi an bi ta piki dee sëmbë u de bebe di buuu fëën tuutuu?

⁵ A di ten u Noa, Gadu bi piki libisëmbë taa de an musu njan buuu (Ken. 9:3, 4). Jehovah bi toona piki dee Isaëli sëmbë di soni dë a di Wëti di a bi da Mosesi. De bi musu „kii hiniwan sëmbë di ta njan buuu puu” (Leif. 7:27). Jesosi bi lei dee Dju taa de musu hoi hii dee wëti dee Gadu bi da Mosesi (Mat. 5:17-19). Fëën mbei an bi o sa hakisi dee Dju u de njan di sinkii fëën tuutuu, nasö u de bebe di buuu fëën. Ma di taki di Jesosi bi taki di apaiti soni aki, bi dë u lei de fa de sa feni di „libi u teego”.​—Joh. 6:54.

6. Unfa u du sabi taa wan woto Jesosi bi ta konda da dee sëmbë u heepi de, u de ko fusutan unfa de sa feni di libi u teego?

⁶ Andi Jesosi bi kë taki? Fuu taki ën, nöö Jesosi bi konda di woto dë u heepi dee sëmbë u de sa fusutan wan soni, leti kumafa a bi fan ku di Samalia mujëë. Di a bi fan ku di mujëë dë, nöö a bi piki ën taa: „Di sëmbë di o bebe di wata di mi o dëën, nöö hën dëëwata an o kisi möönsö a mundu. Biga di wata di mi o dëën, nöö a o dë nëën dendu kuma wan kiikihedi ta kule wata ta ko nöömö. An o kaba möönsö. Nöö so wan sëmbë abi di libi u teego” (Joh. 4:7, 14).b Wë Jesosi an bi kë taki taa di Samalia mujëë bi o feni teego libi u di a bi o bebe wan apaiti wata. Sö nöö a dë taa dee sëmbë dee bi ta haika Jesosi a Kapenaumi an bi o sa feni di libi u teego, ee de bi njan di sinkii u Jesosi, bebe di buuu fëën tuutuu.

JESOSI BI TAKI WOTO SONI DI TA DJEI DEE SEEI SONI DEE A BI TAKI DË

7. Andi so sëmbë bi taki u di soni di Jesosi bi taki a Johanisi 6:53?

⁷ Wantu sëmbë di nango a keiki bi taki taa dee soni dee Jesosi bi taki a Johanisi 6:53, da soni di sëmbë musu ta du te de ta hoi di Ndeti Njanjan u Masa, u di bëina Jesosi bi taki dee seei soni dë di ndeti dë (Mat. 26:26-28). De ta taki taa hii dee sëmbë dee nango a di Ndeti Njanjan u Masa, musu ta njan di bëëë, söseei de musu ta bebe di win di de ta tja pasa a dee sëmbë fesi. Ma sö soni musu dë u? Wë a dë fanöudu seei fuu ko sabi ee sö soni musu dë, u di hii jaa milionmilion sëmbë a hii së u goonliba ta ko makandi ku u te u ta hoi di Ndeti Njan u Masa. Woo si taa di soni di Jesosi bi taki a Johanisi 6:53, tooka ku di soni di a bi taki a di Ndeti Njan u Masa.

8. Unfa dee tu soni dee Jesosi bi taki tooka ku deseei tjika? (Luku dee peentje tu.)

⁸ Boo luku tu soni di tooka a dee tu soni dee a bi taki. Di fosu soni da, naasë Jesosi bi dë, söseei na un ten a bi taki dee soni dee sikifi a Johanisi 6:53-56? Wë a bi taki dee soni aki a di jaa 32 Ba.K., di a bi ta fan ku wanlö Dju a Galilea. Di soni aki bi pasa wan jaa sö ufö a seti di Ndeti Njan u Masa a Jelusalen. Di u tu soni da, ku ambë Jesosi bi ta fan? Gaansë u dee sëmbë dee a bi ta fan ku de, bi dë sëmbë di bi ta möön booko de hedi ku njanjan, möön dee soni dee de bi sa lei u Jehovah, nasö u di Könuköndë fëën (Joh. 6:26). Fëën mbei di Jesosi bi taki wan soni di bi taanga da de u de fusutan, hën hesihesi seei de an bi kë biibi Jesosi möön. Wantu u dee bakama fëën seei bi tapa u waka nëën baka (Joh. 6:14, 36, 42, 60, 64, 66). Te u luku ën, nöö dee sëmbë aki bi tooka gaanfa seei ku dee sëmbë dee bi dë a di pisiten u di jaa 33 Ba.K., di Jesosi bi seti di Ndeti Njan u Masa, wan jaa baka di dë. Di a bi taki di soni dë, dee 11 apösutu fëën dee bi ta hoi deseei nëën an bi go disëën, hii fa de an bi kaba fusutan hii dee soni dee a bi lei de. Dee apösutu dee bi hoi deseei nëën, bi tooka gaanfa seei ku gaansë u dee sëmbë u Galilea, u di de bi dë seiki taa Jesosi da di Womi Mii u Gadu di saka kumutu a liba ala (Mat. 16:16). Jesosi bi piki de taa: „Unu bi da dee sëmbë dee bi dë ku mi sömëni longi, ku dee pena u mi ku dee fuka libi u mi te kisi fa u dë aki” (Luk. 22:28). Dee soni dee u luku aki, ta lei taa dee soni dee Jesosi bi taki a Johanisi 6:53 an nama ku dee soni dee u musu ta du a di Ndeti Njan u Masa. Ma woto soni dë jeti di sa heepi u fuu fusutan dee tu soni dee Jesosi bi taki aki möön bunu.

UNFA DEE SONI DEE JESOSI BI TAKI NAMA KU I TJIKA?

9. Ku ambë dee soni dee Jesosi bi ta taki a di Ndeti Njan u Masa nama?

⁹ Di Jesosi seti di Ndeti Njan u Masa, hën a da dee apösutu fëën bëëë söndö sooda, hën a lei de taa di bëëë dë, dë kuma di sinkii fëën. Baka di dë, hën a mbei de paati wan kan win tjëtjë ku deseei, hën a piki de taa di win dë, dë kuma ’di buuu fëën di o kai a goon [fu Gadu sa mbei wan njunjun buka ku libisëmbë]” (Maik. 14:22-25; Luk. 22:20; 1 Kol. 11:24). Wan gaan fanöudu soni seei a taki dë. Di „njunjun buka” di Gadu mbei ku libisëmbë, nama ku dee sëmbë dee o tii makandi ku Jesosi a di Könuköndë. An mbei di buka aki ku hii libisëmbë (Heb. 8:6, 10; 9:15). Dee apösutu an bi fusutan di soni dë wantewante dë, ma an bi o tei longi möön ufö Gadu salufu de ku di santa jeje fëën. Di soni dë bi o mbei de ko dë sëmbë u di njunjun buka, di o mbei de sa go tii makandi ku Jesosi a liba ala.​—Joh. 14:2, 3.

10. Unfa di soni di Jesosi bi taki a Galilea, tooka ku di soni di a bi taki a di Ndeti Njanjan u Masa? (Luku di peentje tu.)

¹⁰ A bunu fii hoi a pakisei taa di soni di Jesosi bi taki a di Ndeti Njanjan u Masa, bi nama ku wan piki kulupu sëmbë. Dee apösutu fëën dee bi dë ku ën di daka dë da dee fosu sëmbë dee bi dë a di kulupu dë (Luk. 12:32). De Jesosi bi da di bëëë u de njan, söseei de a bi da di win u de bebe a di ndeti dë. Nöö dee woto sëmbë dee bi o ko dë sëmbë u di piki kulupu dë seei musu njan di bëëë bebe di win tu, te de o mëni di dëdë u Jesosi. De da dee sëmbë dee o go tii makandi ku Jesosi a liba ala. Di soni di u si aki da wan woto soni di ta lei fa di Ndeti Njanjan u Masa tooka tjika, ku di soni di Jesosi bi taki a Galilea. Di a bi hoi di Ndeti Njanjan u Masa, nöö a bi ta fan ku wan piki kulupu sëmbë. Ma di a bi dë a Galilea, nöö a bi fan ku gaan hia sëmbë.

11. Andi Jesosi bi taki a Galilea u lei taa an bi ta fan ku wan apaiti kulupu sëmbë?

¹¹ Di Jesosi bi dë a Galilea a di jaa 32 Ba.K., nöö möön gaanfa a bi ta fan ku dee Dju dee bi kë faa da de bëëë. Ma Jesosi bi mbei möiti u heepi de u de buta pakisei a wan soni di dë möön fanöudu möön njanjan. Di soni dë da wan soni di bi o sa heepi de u de feni di libi u teego. Boiti di dë, a bi taki tu taa dee sëmbë dee o weki ko a libi baka sa feni di libi u teego. An bi ta fan ku wan apaiti kulupu sëmbë, kumafa a bi du a di Ndeti Njan u Masa. Ma di a bi dë a Galilea, nöö a bi taki u wan bunu di hii sëmbë sa feni. A bi taki taa: ’Di sëmbë di ta njan di njanjan aki hën abi di libi u teego. Nöö di njanjan di mi ta taki aki, nöö hën wë da di sinkii u mi aki, di mi o da fu hii sëmbë musu sa feni libi.’​—Joh. 6:51.c

12. Andi u musu du u feni di libi u teego?

¹² Jesosi an bi piki dee Dju taa hii dee sëmbë dee ta libi a goonliba o feni di libi u teego. Ma dee sëmbë dee o ’njan di bëëë’ wanwan o feni ën, hën da dee sëmbë dee ta lei taa de ta biibi nëën. Sömëni sëmbë u di ten aki ta biibi taa de o feni di libi u teego ee de ta biibi a Jesosi, söseei ee de ta si ën kuma di heepima u de (Joh. 6:29). Ma möön soni dë u du. Hia sëmbë bi dë a Galilea di bi ta biibi a Jesosi, ma bakaten de bi tapa u waka nëën baka. Faandi mbei di soni aki bi pasa?

13. Andi wan sëmbë musu du ee a kë ko dë wan tuutuu bakama u Jesosi?

¹³ Gaansë u dee gaan hia sëmbë dee Jesosi bi da soni u njan bi ta waka nëën baka ku wai, solanga de bi ta feni andi de kë. De bi ta kë faa kula de, faa da de njanjan, nasö faa lei de soni di bi ta kai ku de. Ma Jesosi bi lei de taa de bi musu du möön hia soni ee de bi kë ko dë tuutuu bakama fëën. An bi ko a goonliba u ko da sëmbë andi de kë wanwan nöö a kaba, ma de musu tei di kai di a ta kai de u de „ko” nëën. Di fasi fa de sa du di soni dë, hën da te de ta piki Jesosi buka a hii dee soni dee a ta lei sëmbë.​—Joh. 5:40; 6:44.

14. Andi u musu du u feni wini u di sinkii ku di buuu u Jesosi?

¹⁴ Jesosi bi lei dee gaan hia sëmbë unfa a dë fanöudu tjika u de buta biibi nëën. Na un futu? Wë de bi musu buta biibi a di sinkii fëën, ku di buuu fëën di a bi o tuwë da libisëmbë bakaten. Di buta di dee Dju bi musu buta biibi a Jesosi da wan gaan fanöudu soni, nöö sö a dë da u a di ten aki tu (Joh. 6:40). Awa, ee u kë feni wini u di sinkii ku di buuu u Jesosi kumafa a sikifi a Johanisi 6:53, nöö u musu ta du soni u lei taa u ta biibi di paima di a ko paka da u. Hii sëmbë sa feni wini u di soni aki.​—Ef. 1:7.

15-16. Un fanöudu soni u ta lei a Johanisi kapitë 6?

¹⁵ U ta lei sömëni fanöudu soni a Johanisi kapitë 6 di ta da hii u tuu taanga seei. A ta lei fa Jesosi ta booko hën hedi ku sëmbë tjika. Di a bi dë a Galilea a bi kula dee suwakima, a bi lei sëmbë soni u di Könuköndë u Gadu, söseei a bi heepi sëmbë ku wan u dee möön gaan soni di de ta abi fanöudu: a bi da de soni u njan (Luk. 9:11; Joh. 6:2, 11, 12). Ma di möön fanöudu soni, hën da a bi lei de taa hën da „di bëëë di ta da sëmbë libi u teego”.​—Joh. 6:35, 48.

¹⁶ Dee sëmbë dee Jesosi ta kai dee „oto sikafu” an ta njan di bëëë bebe di win, söseei de an musu du sö te de ta hoi di Ndeti Njan u Masa (Joh. 10:16). Ma tökuseei de ta feni wini u di sinkii ku di buuu u Jesosi Keesitu. De ta feni wini fëën te de ta buta biibi a di paima di Jesosi ko paka da u (Joh. 6:53). Dee sëmbë dee ta njan di bëëë bebe di win, ta lei taa de dë a di njunjun buka di Gadu bi mbei ku libisëmbë, söseei taa de abi di gaandi u go tii makandi ku Jesosi a di Könuköndë u Gadu. Fëën mbei aluwasi ee u dë wan salufuwan, nasö wan u dee woto sikapu, tökuseei u sa lei sömëni soni a di soni di Jesosi bi taki a Johanisi kapitë 6. A ta lei u unfa a dë fanöudu tjika fuu ta du soni u lei taa u abi biibi, sö taa u sa feni di libi u teego.