Josëfu famii foloisi go a Egepiti

JOSËFU an sa hoi ënseei möön. Fëën mbei a piki dee futuboi fëën be de go kumutu a di kamba dendu. Di Josëfu ku dee baaa fëën wanwan fika dë, hën a bigi ta këë. U sa fusutan fa dee baaa fëën foondo, biga de an sa’ faandi mbei a bigi ta këë. Te wan pisi hën a taa: ’Mi da Josëfu. Mi tata dë a libi jeti ö?’

Hën dee baaa fëën foondo tee de fika buka booo. De panta seei. Ma Josëfu piki de taa: ’Un hai ko möön zuntu a mi bandja.’ Di de hai ko zuntu kaa, hën a piki de taa: ’Mi da di baaa fuunu, Josëfu, di un bi sei manda go a Egepiti.’

Josëfu fan suti ku de go dou. Hën a piki de taa: ’Wan tei unu seei u hogi u di un sei mi kuma saafu da di köndë aki e. Gadu hën wë manda mi ko a Egepiti u ko puu sëmbë a fuka. Falao mbei mi toon tiima u hii di köndë aki. Wë nöö un go paapaa a mi tata, nöö un konda dee soni aki dëën. Un piki ën be a ko libi aki.’

Hën Josëfu tuwë maun baasa dee baaa fëën, hën a bosi de. Di Falao jei taa dee baaa u Josëfu bi ko, hën a piki Josëfu taa: ’Be de tei dee wagi, nöö be de lëi go tei de tata ku dee famii u de tja ko aki. Mi o da de di möön bunu kamian u hii Egepiti.’

Hën de du leti sö. A di peentje i ta si fa Josëfu miti hën tata di a dou a Egepiti ku hii di wosudendu fëën.

Di wosudendu u Jakopu bi ko bigi seei. Te i konda Jakopu ku dee mii fëën, ku dee mii dee kai ën avo, nöö de bi dë 70 sëmbë di de foloisi go a Egepiti. Ma dee mujëë u de bi go ku de tu, nöö a kan taa de bi tja dee hia futuboi u de tu. Hii de tuu go libi a Egepiti. De bi ta kai de Isaëli sëmbë, biga Gadu bi tooka di në u Jakopu ko Isaëli. Gadu bi tei dee Isaëli sëmbë ko dë apaiti sëmbë fëën, kumafa woo si a dee woto dee ta ko.