Josëfu ta pooba dee baaa fëën

JOSËFU kë sabi ee dee 10 gaan baaa fëën abi hogihati jeti. Fëën mbei a piki de taa: ’Soni un ko hulu aki fuun feni go konda baka. Un kë sabi unfa un sa booko ko a di köndë.’

De piki ën taa: ’Nönö e, mati, na di soni dë u ko du. U da limbohati womi. Hii u tuu aki da baaa. U bi dë 12 baaa, ma wan baaa an dë möön, nöö di möön njönku wan dë a wosu ku u tata.’

Josëfu mbei kuma an ta biibi de. A hoi di baaa de kai Simion buta a dunguwosu, hën a mbei dee wotowan tei njanjan hai go a wosu. Ma a piki de taa: ’Te un ta ko baka un musu tja di möön njönku baaa fuunu tu.’

Di de toona go a wosu a Kaana, hën de konda hii soni da de tata Jakopu. Jakopu tjali seei. A bai këë ta kai wolo taa: ’Josëfu an dë möön, nöö Simion seei mi lasi tu. Më o mbei un tei di tapabëë womi mii u mi, Benjamin, tja go e.’ Ma di njanjan u de bi ta kaba, Jakopu an bi a’ woto fasi möön leki u disa de be de tja Benjamin go a Egepiti, sö taa de bi sa feni möön hia njanjan.

Josëfu si dee baaa fëën ta ko. A bi wai seei u si ën piki baaa Benjamin. Ma na wan u de bi sabi taa di gaan womi dë da Josëfu. Hën wë Josëfu du wan soni u pooba dee 10 baaa fëën.

A mbei dee futuboi fëën lai njanjan a hii dee saku u dee baaa fëën. Ma söndö u de sabi, a mbei de lai di apaiti soofu kan fëën a Benjamin saku. Hën a mbei de go, nöö di de dë a pasi nango wan pisi kaa, hën Josëfu manda dee futuboi fëën go a de baka. Di de miti de, hën wan u dee futuboi taa: ’Faandi mbei un fufuu di soofu kan u mi masa?’

Hii de tuu piki di wan pasi taa: ’Wa fufuu di kan fii masa. Ee i feni ën a wan fuun saku, be de kii di sëmbë dë.’

Hën di futuboi suku a hii dee saku u de lontu ko kai, hën a feni di kan a Benjamin saku, leti kumafa i ta si a di peentje aki. Di futuboi taa: ’Un dee wotowan sa go, ma Benjamin o ko ku u.’ Andi dee woto 10 baaa o du?

De tuu toona go ku Benjamin a Josëfu wosu. Josëfu piki dee baaa fëën taa: ’Hii unu tuu sa go a wosu, ma mi o hoi Benjamin buta aki kuma mi saafu.’

Hën Juda hopo taki da dee baaa fëën. A taa: ’Ee mi go a wosu nöö më tja di baaa u mi aki, mi tata o dëdë, biga a lobi ën gaanfa seei. Gaantangi mi begi i, hoi mi buta aki kuma saafu fii, ma be di mii go a wosu.’

Josëfu bi ko si taa dee baaa fëën bia de libi. De an bi a’ hogihati möön. Boo go luku andi Josëfu du.