Dee 12 womi dee go luku di köndë

LUKU dee fuuta dee womi ta tja. Luku fa di doloifi bondji bigi. A hebi sö tee taa tu womi musu tjëën ku wan pau. Nöö luku dee figa ku dee glanaki-apa. Unsë dee waiti fuuta aki kumutu? De kumutu a di köndë Kaana. Na fëëkëtë taa Abahamu, Isaki ku Jakopu bi ta libi a Kaana. Ma u di gaan hangi bi dë ala, mbei Jakopu ku di wosudendu fëën bi foloisi go a Egepiti köndë. De tan söwan 216 jaa a Egepiti. Ma di juu dou awaa taa Mosesi ta tja dee Isaëli sëmbë go baka a Kaana. Hën de ko dou a wan kamian a di sabana dendu de ta kai Kadesi.

Hogilibi sëmbë ta libi a di köndë Kaana. Fëën mbei Mosesi manda 12 womi go luku di köndë. A piki de taa: ’Un luku un mëni sëmbë ta libi ala, nöö un luku fa de taanga tjika. Un luku ee di goon ta ko njanjan. Nöö un tja so u dee fuuta ko tu.’

Di dee womi toona ko baka a Kadesi, hën de piki Mosesi taa: ’Di köndë bunu seei.’ Nöö hën de tja so u dee fuuta ko lei Mosesi faa si fa di köndë bunu tjika. Ma 10 u dee womi bai taa: ’Dee sëmbë dee ta libi ala bigi, nöö de taanga tu. De o kii u ee u pooba u tei di köndë.’

Dee Isaëli sëmbë ko fëëë di de jei di fan dë. De bai taa: ’A bi o möön bunu ee u bi dëdë a Egepiti köndë, nasö ee u dëdë a di sabana aki. De o kii u a feti, nöö de o tei dee mujëë ku dee mii fuu tja go. Un boo buta wan woto fesima a Mosesi kamian, nöö u toona go baka a Egepiti köndë!’

Ma tu u dee womi dee bi go luku di köndë, bi a’ futoou a Jehovah. Fëën mbei de pooba u kötö dee sëmbë hati. De në da Josua ku Kalëb. De piki dee sëmbë taa: ’An dë fuun fëëë. Jehovah dë ku u. An o taanga da u fuu wini di köndë.’ Ma dee sëmbë an bi kë haika. De bi kë kii Josua ku Kalëb seei.

Di soni dë mbei Jehovah hati boonu seei. Fëën mbei a piki Mosesi taa: ’Na wan sëmbë u 20 jaa tja go a liba o go a di köndë Kaana. De si dee maaka mi du a Egepiti köndë ku dee mi du a di sabana, ma tökuseei de an a’ biibi a mi. Fëën mbei de o waka 40 jaa longi lontu a di sabana, te kuma hii de tuu dëdë fijaa. Josua ku Kalëb wanwan tö o go a di köndë Kaana.’