Dafiti ku Goliati

DEE Filisiti sëmbë ta ko feti ku dee Isaëli sëmbë möön. Dee dii gaan baaa u Dafiti dë sodati u Saulosu. Hën wan daka, Isai taki da Dafiti taa: ’Tei pikisö alisi ku bëëë tja go da dee baaa fii. Go luku fa a nango ku de.’

Di Dafiti dou a dee sodati kampu, hën a kule go suku dee baaa fëën ka di feti ta feti. Di gaan langa Filisiti womi de kai Goliati ko ta mbei dee Isaëli sëmbë fa. Hiniwan ndeti ku didia a ta du di soni dë, 40 daka longi kaa. A bai taanga taa: ’Un tei wan u dee womi fuunu be a ko feti ku mi. Ee a wini mi, te a kii mi, nöö woo toon saafuma fuunu. Ma ee mi wini ën, te mi kii ën, nöö unu o toon saafuma fuu. Mi kë si un tei wan sëmbë ko feti ku mi.’

Dafiti hakisi wan tu u dee sodati taa: ’Andi di womi di o kii di Filisiti womi aki, puu di sen aki da Isaëli, o feni?’

Hën wan sodati taa: ’Saulosu o da di womi dë hia gudu. Nöö a o dëën di fëën seei mujëë mii faa dë mujëë fëën.’

Ma hii dee Isaëli sëmbë fëëë Goliati u di a bigi seei. A langa söwan dii mëti, nöö wan woto sodati ta tja di goboo felu kokoo fëën.

Wan tu u dee sodati go konda da Könu Saulosu taa Dafiti kë feti ku Goliati. Ma Saulosu piki Dafiti taa: ’Ja sa feti ku di Filisiti womi dë. Piki mii i dë jeti, hën a dë sodati hii hën libi kaa.’ Dafiti piki ën taa: ’Mi kii wan beer ku wan lëun di bi ta tja wan sikapu u mi tata go. Nöö di Filisiti womi aki o ko dë kuma wan u dee mbeti dë. Jehovah o heepi mi.’ Hën Saulosu taa: ’Go, nöö be Jehovah dë ku i.’

Dafiti saka go a wan piki kiiki, hën a tei feifi linzolinzo sitonu buta go nëën saku dendu. Hën a tei hën abalëti nango miti di gaan langa womi. Di Goliati si ën, an bi sa biibi di soni dë. A pakisei taa an o taanga dëën u kii Dafiti.

Goliati piki ën taa: ’Waka ko miti mi nö. Mi o da dee fou ku dee mbeti di sinkii fii u de njan.’ Ma Dafiti taa: ’I ta ko a mi ku wan ufangi, wan piiwa, ku wan lanza, ma mi ta ko a i ku di në u Jehovah. Tide Jehovah o buta i a mi maun, nöö mi o naki i tuwë.’

Hën Dafiti kule go miti Goliati. A tei wan sitonu puu a di saku fëën, a butëën nëën abalëti, hën a vindëën ku hii ën kaakiti viiin te a Goliati mindifesi. Hën Goliati tombi kai gbolou, dëdë piii! Di dee Filisiti sëmbë si taa di taangama u de dëdë, hën hii de tuu kule go. Dee Isaëli sëmbë kule a de baka, hën de wini di feti.