Di lasiti bumbuu könu u Isaëli

JOSIA bi a’ aiti jaa nöö di a toon könu u di tu-lö könuköndë a libasë u Isaëli. Wan mii u aiti jaa njönku poi u toon könu. Fëën mbei bigibigi wan tu gaan womi heepi ën tii dee sëmbë.

Di Josia bi dë könu söwan seibi jaa kaa, hën a bigi suku Jehovah baka. A waka a dee bumbuu könu baka, kuma Dafiti, Josafati ku Esikia. Josia an tapa tuwenti jaa seei, hën a du wan wooko ku degihati.

Wan hii pisiten kaa gaansë u dee Isaëli sëmbë puu ta du hogi seei. De ta dini taku gadu. De ta da pindi gaandi. Fëën mbei Josia ku dee womi fëën bigi puu falisi biibi a di köndë. Wan gaan wooko de du seei, u di sömëni u dee sëmbë bi ta dini taku gadu. I ta si aki fa Josia ku dee womi fëën ta naki dee pindi booko pisipisi.

Baka di dë, Josia da dii womi di wooko u seeka di Wosu u Jehovah. De pii möni a dee sëmbë da dee womi sö taa de sa paka u dee soni de a’ fanöudu u du di wooko. Di de ta wooko a di Wosu, hën di Gaan Mindima Hilikia feni wan gaan apaiti soni naandë. A bi dë di wëti buku di Jehovah bi mbei Mosesi sikifi gaanduwe kaa. A bi lasi sömëni jaa longi.

De tja di buku go da Josia, hën a hakisi de u de lesi ën dëën. Di Josia ta haika andi de ta lesi, hën a ko si taa dee sëmbë an hoi deseei a dee wëti u Jehovah. Di soni dë mbei a tjali seei. Nöö fëën mbei a ta tënë di koosu fëën, kumafa i ta si aki. A taa: ’Jehovah hati boonu ku u, biga dee tata fuu an hoi deseei a dee wëti dee sikifi a di buku aki.’

Josia piki di Gaan Mindima Hilikia faa go öndösuku andi Jehovah o du ku de. Hilikia go hakisi di mujëë tjabukama de kai Helida andi Jehovah o du ku de. Hën Helida konda di buka u Jehovah dëën faa toona go konda da Josia. A taa: ’Jelusalen ku hii dee sëmbë o kisi sitaafu, biga de go begi taku gadu, nöö di köndë ko fuu ku hogidu. Ma u di ju Josia libi bunu, mbei di sitaafu aki o ko baka te i dëdë ufö.’