Josia bi abi bumbuu mati

I si kuma a taanga fii du soni a wan leti fasi ö?— Gaansë u sëmbë ta si kuma a taanga. Di Bëibel ta konda da u taa a bi taanga da wan womi mii de kai Josia u du soni a wan leti fasi. Ma a bi abi bumbuu mati di bi heepi ën. Boo go luku andi u sa lei u Josia ku dee mati fëën.

Di könu u Juda de kai Amon, bi dë di tata u Josia. Amon bi hogi seei, nöö a bi ta dini pindi gadu. Baka di Amon dëdë, hën Josia toon könu u Juda. Ma aiti jaa nöö a bi abi! I si kuma a bi hogi kuma hën tata u?— Nönö, an bi hogi kuma hën tata!

Hii fa a bi njönku seei, tökuseei a bi kë piki Jehovah buka a soni. Fëën mbei sëmbë di bi lobi Jehovah nöö a bi tei kuma mati. De bi heepi Josia u du soni a wan leti fasi. Ambë bi dë wantu u dee mati u Josia?

Wan u dee mati fëën bi dë Sefania. Sefania bi dë wan u dee tjabukama u Gadu di bi ta piki dee sëmbë u Juda taa ee de ta dini pindi gadu, nöö hogi o miti de. Josia bi haika Sefania, nöö an bi dini pindi gadu, ma a bi dini Jehovah.

Jelemia bi dë wan u dee mati u Josia tu. Hën ku Josia bi dë pei, nöö de bi kiija de a di wan seei pisiwata. Josia bi dë wan gaan mati u Jelemia. Fëën mbei di a dëdë, hën Jelemia sikifi wan apaiti kanda u lei unfa a ta tjali u di Josia dëdë. Jelemia ku Josia bi ta heepi deseei u du soni a wan leti fasi, söseei de bi ta heepi deseei u de sa piki Jehovah buka.

Andi i sa lei a di woto u Josia?— Wë hii fa Josia bi dë wan piki womi mii, tökuseei a bi kë du soni a wan leti fasi. A bi sabi taa a bi musu dë mati ku sëmbë di lobi Jehovah. Be a dë sö taa iseei ta tei mati di lobi Jehovah, di sa heepi i fii du soni a wan leti fasi!