Jesosi ta kula sikima

TE JESOSI ta waka pasa a di köndë, nöö a ta kula sikima. A hii dee köndë ku dee foto, sëmbë ta taki u dee foombo wooko dë. Fëën mbei sëmbë ta tja dee lanma, dee bookowojoma, dee tapabukama, ku woto siki sëmbë ko nëën. Nöö de tuu fiaa Jesosi ta kula.

Dii jaa pasa kaa sensi di Johanisi dopu Jesosi. Nöö Jesosi piki dee apösutu fëën taa an fika longi möön nöö a o go a Jelusalen ka de o kii ën, nöö a o weki kumutu a dëdë. A di ten dë seei Jesosi ta kula sikima go dou.

Wan daka Jesosi ta lei sëmbë a wan Saba daka. Di Saba daka da wan daka ka dee Dju ta böö. Di mujëë i ta si aki bi siki seei. A bi ta waka bendibendi 18 jaa longi kaa, nöö an bi sa hopo luku liba. Fëën mbei Jesosi buta maun nëën liba, hën a hopo taanpu. A ko bunu baka!

Di soni dë mbei dee hedima u keiki hati ko boonu te na soni. Wan u de bai taa: ’Sikisi daka u abi fuu wooko. Nöö a dee sikisi daka dë dendu un musu ko suku kula, ma na a Saba e!’

Ma Jesosi piki taa: ’Un dee takuhatima aki, hiniwan Saba un ta lusu dee buliki fuunu ta tja de go bebe wata. Nöö di pooti mujëë aki di siki 18 jaa longi aki an musu ko bëtë a di Saba daka nö?’ Di piki u Jesosi mbei sen kisi dee takuhati womi aki.

Bakaten Jesosi ku dee apösutu fëën tei pasi nango a Jelusalen. Di de dë leti a döösë u di foto Jelikou, hën tu bookowojoma jei taa Jesosi ta pasa dë. Fëën mbei de bai taa: ’Jesosi, heepi u ooo!’

Jesosi kai dee bookowojoma ko nëën, hën a hakisi de taa: ’Andi un kë fu mi du da unu?’ Hën de taa: ’Masa, heepi u be u ko ta si soni.’ Jesosi tëndë maun nama a de wojo, hën wantewante dë de ko si soni gbegedee! I sa faandi mbei Jesosi ta du hii dee gaan foombo wooko aki ö? Wë u di a lobi sëmbë, nöö a kë u de abi biibi nëën. Nöö fëën mbei u sa dë seiki taa te a o tii kuma Könu, na wan sëmbë a goonliba o ta siki möön.