A bi lobi sëmbë

1, 2. Unfa Jesosi bi lei fa a lobi libisëmbë tjika?

DI FOSU Womi Mii u Gadu ta lei u a di möön bunu fasi fa Jehovah köni tjika, nöö a bi dë di möön „bunu wookoma” fëën Tata. Pakisei fa Jesosi bi ta wai seei, ku fa a bi ta fii bunu di hën Tata bi ta „mbei liba ala”, söseei di a bi ta „seti di goonliba”. Ma u hii dee soni di hën Tata bi mbei, „libisëmbë” Jesosi bi möön „lobi” (Nöngö 8:22-31). Sensi di Gadu mbei libisëmbë Jesosi lobi de.

² Bakaten, Jesosi bi lei fa a lobi hën Tata, söseei a bi lei fa a ta hoi hënseei nëën Tata. A bi lei tu fa a lobi hii libisëmbë di a bi dë kabakaba u kumutu a liba ala ko libi a goonliba aki. U di Jesosi lobi sëmbë, mbei a bi da hën libi u „paka paima fu sömëni hia sëmbë sa ko bunu ku Gadu” (Mateosi 20:28; Filipi 2:5-8). Di Jesosi bi dë a goonliba, Gadu bi dëën di makiti faa sa du foombo wooko. Dee foombo wooko dee Jesosi bi ta du, ta lei fa a lobi libisëmbë tjika, söseei de ta lei u andi a o du da libisëmbë abiti möön.

3. Fu un pei soni woo taki a di woto aki?

³ Di Jesosi bi dë a goonliba aki, a bi konda „di bunu buka u di Könuköndë u Gadu” da sëmbë (Lukasi 4:43, NW). A bi sabi taa di Könuköndë dë hën bi o mbei di në fëën Tata ko santa, söseei taa hën bi o puu fuka da libisëmbë u nöömö. Te Jesosi bi nango peleiki, nöö a bi ta du sömëni foombo wooko tu. Dee foombo wooko dee a bi ta du dë, bi ta lei fa a lobi libisëmbë tjika. Faandi mbei a dë fanöudu fuu ko sabi di soni aki? Wë u di dee soni dee a du aki, ta da houpu, söseei de ta mbei u abi di futoou taa soni o waka bunu a di ten di ta ko. Boo taki u fö foombo wooko di Jesosi bi du.

„A BI ABI MAKITI U KULA SËMBË”

4. Andi bi pasa di Jesosi miti wan womi di bi abi di siki de kai kököbë?

⁴ Di pisiten di Jesosi bi ta du di diniwooko fëën a goonliba aki, hën a bi go a wan kamian de ta kai Galilea. Di a dou a wan u dee köndë u di pisiwata dë, hën a miti wan womi di bi dë ku wan taku siki de kai kököbë (Maikusi 1:39, 40). Di womi bi siki seei taa di data de kai Lukasi bi taki taa „sinkii fëën lai ku tjinasiki [kököbë]” (Lukasi 5:12). Di Bëibel ta taki taa di di siki womi si Jesosi, hën „a kai ku fesi a goon begi ën taa: ’Masa, ee i kë nöö i sa kula di tjinasiki u mi da mi.’” Di womi bi sabi taa Jesosi bi abi di makiti u kulëën, ma a bi kë sabi ee Jesosi bi o kë kulëën. Faandi mbei? U di di womi aki bi sabi fa dee Faliseima bi ta si dee kököbëma. Ma unfa Jesosi hën a bi ta si de? Unfa a bi o kula di womi aki di kandë kamian fëën bi ko fika dobadoba? Andi ii bi o du?

5. Faandi mbei Jesosi bi kula di womi di bi abi kököbë?

⁵ Di Wëti di Gadu bi da Mosesi bi taki taa wan sëmbë di bi abi kököbë bi musu bai taa: „Ma limbo ooo, ma limbo!” Ma di womi aki an bi du di soni dë (Leifitiki 13:43-46). Ma Jesosi hati an bi boonu ku ën. A bi ta booko hën hedi ku di womi, nöö a bi kë heepi ën. Wa sabi andi Jesosi bi pakisei u di soni dë, ma u sabi unfa a bi ta fii. Tjali u di womi bi kisi ën sö tee taa a bi du wan foombo soni u heepi ën. Jesosi du wan soni di woto sëmbë bi o fëëë u du. A bi panjan di womi. Hën Jesosi piki di womi a wan suti fasi taa: „Wë mi kë. Ko bunu e!” Nöö hën wante dë, „di sëmbë ko bunu kaa” (Lukasi 5:13). U ta si gbelingbelin taa Jehovah hën bi da Jesosi di makiti faa du di foombo wooko aki, u lei u fa a lobi sëmbë tjika.​—Lukasi 5:17.

6. Andi i lobi a dee foombo wooko dee Jesosi bi du, nöö andi de ta lei u?

⁶ Di makiti di Gadu bi da Jesosi bi ta heepi ën faa du sömëni foombofoombo soni. Na kököbëma nöö a bi kula. Jesosi bi kula sëmbë di bi abi peipei siki tu. Di Bëibel ta piki u taa sëmbë bi ta foondo te de „bi si fa dee tapabukama ko ta fan, dee lanma ko ta waka, dee makisamakisa sëmbë ko bëtë seei, dee bookowojoma ko ta si sondi” (Mateosi 15:31). Na opalasi Jesosi bi ta opalasi sëmbë te a bi ta kula de. A bi abi di makiti u kula dee sëmbë wantewante dë, nöö so juu a bi ta kula de, hii fa de bi dë te a wan woto kamian (Johanisi 4:46-54). Andi dee woto aki ta lei u? De ta lei u taa di Könu fuu, Jesosi Keesitu, abi di makiti u puu hii pei siki a goonliba, söseei taa a kë du ën seei. Te u ta lei fa Jesosi bi ta libi ku sëmbë, nöö a ta mbei u abi di futoou taa „a o abi tjalihati u dee möfina sëmbë ku dee pooti sëmbë” a di njunjun goonliba (Psalöm 72:13). U di Jesosi kë u hii sëmbë dë bunu, mbei a o kula hii dee siki sëmbë.

„HOPO, NÖÖ I TEI DI KAMA FII, NÖÖ I WAKA GO FII A WOSU”

7, 8. Konda andi bi pasa ufö Jesosi bi miti wan siki womi a Batesita.

⁷ Wan tu liba baka di Jesosi kula di kököbëma, hën a kumutu a Galilea go a Judea go paaja di bunu buka u di Könuköndë u Gadu. A bi musu u dë sö taa dusudusu sëmbë bi jei di buka di Jesosi bi ta paaja, nöö de bi ta si fa a bi lobi de tjika. Jesosi bi kë da dee pooti sëmbë ku dee sëmbë dee dë fukafuka kötöhati. A bi kë lei de taa de sa feni wan möön bunu libi.​—Jesaaja 61:1, 2; Lukasi 4:18-21.

⁸ A di liba u dee Dju de kai Nisan, Jesosi bi go a Jelusalen u go njan di Pasika. Di soni dë bi mbei taa sëmbë bi ko hia a di köndë seei. Wan peti wata de kai Batesita bi dë a bausë u di Wosu u Gadu, nöö naandë Jesosi bi miti wan womi di bi siki te an bi sa hopo waka.

9, 10. (a) Faandi mbei sëmbë bi nango a di peti de ta kai Batesita? (b) Andi Jesosi bi go du a di peti, nöö andi di soni dë ta lei u? (Luku di peentje a bigi u di woto.)

⁹ Sömëni siki sëmbë bi lo’ u go a Batesita. Faandi mbei? Wë u di de bi ta biibi taa ee wan sikisiki sëmbë bi go wasi a di peti te di wata bi ta seki, nöö a bi o bëtë. Pakisei fa dee sëmbë bi o ta mbei fanjanfanjan u di de bi ta suku heepi, söseei u di de an bi saandi de musu du. Jesosi an bi abi zöndu, nöö an bi ta siki. Ma nöö faandi mbei a bi go a Batesita? U di a bi lobi sëmbë mbei a bi go ala. A di kamian dë a bi ko miti wan womi di bi siki wan pisiten kaa. Di womi dë bi siki ufö Jesosi bi ko a goonliba seei.​—Lesi Johanisi 5:5-9.

¹⁰ Jesosi hakisi di womi ee a kë ko bëtë. Pakisei unfa di womi bi o ta fii tjali di a bi piki Jesosi taa a bi kë ko bëtë, ma sëmbë an bi dë u tjëën go a di wata. Hën Jesosi hakisi di womi u du wan soni di wan sëmbë di bi abi sö wan siki an bi o sa du nöiti. A piki ën faa tei di kama fëën nöö a waka go. Hën wë di womi tei di kama fëën, hën a bigi waka! Di foombo soni di Jesosi bi du aki ta lei andi a o du a di njunjun goonliba. Söseei a ta lei taa Jesosi lobi sëmbë gaanfa. A bi ta suku dee sëmbë dee bi abi heepi fanöudu. A di ten aki hia sëmbë dë di ta fuka u di sömëni hogi soni ta pasa a di goonliba. Dee soni dee Jesosi bi du aki musu da u taanga fuu ta suku dee lö sëmbë dë a di pisiwata ka u ta peleiki.

„AMBË PANJAN DI KOOSU U MI?”

11. Unfa di tëkisi u Maikusi 5:25-34 ta lei taa Jesosi bi ta booko hën hedi ku dee sëmbë dee bi dë ku siki?

¹¹ Lesi Maikusi 5:25-34. Wan mujëë bi siki 12 jaa longi, nöö di siki fëën bi ta dëën sen a kamian. Di siki fëën bi ta tapëën u na du sömëni soni, te ku di dini di a bi ta dini Jehovah seei. A bi go a sömëni data u suku heepi, te fa hii di möni fëën ko kaba, nöö ka u di siki fëën bëtë a bi ta ko möön hogi. Wan daka di mujëë bi ko pakisei taa a o go suku heepi a wan woto fasi. Di soni dë mbei a waka pasa a dee sëmbë mindi go panjan di koosu u Jesosi (Leifitiki 15:19, 25). Di Jesosi ko fusutan taa wan kaakiti kumutu nëën sinkii, hën a hakisi dee sëmbë ee ambë panjan di koosu fëën. Di mujëë „ko fëëë seei”, hën a „tuwëën seei a goon a Masa Jesosi fesi, hën a konda hii di sondi te a kaba kumafa a bi waka”. Jesosi bi sabi taa Jehovah hën bi kula di mujëë. Fëën mbei a bi piki ën taa: „Mujëë, di fa i si i biibi a mi tjika dë, hën wë mbei i fendi heepi e. Nöö go fii, i böö u di siki bi ta sitaafu i dë.”

12. (a) Te i luku dee soni dee u lei, nöö unfa ii bi o taa Jesosi dë? (b) Unfa Jesosi lei u taa u musu ta libi?

¹² A ta bigi da u seei u si fa Jesosi bi lobi sëmbë tjika. Di lobi di a abi da sëmbë bi dë u si gaanfa seei a di fasi fa a bi ta libi ku dee sëmbë dee bi dë ku suwaki. Jesosi an dë kuma Saatan, u di Saatan hën a kë fuu biibi taa wa dë na wan hojo soni, söseei a kë fuu biibi taa na wan sëmbë lobi u. Dee foombofoombo soni dee Jesosi bi du ta lei taa a lobi u, söseei taa a ta booko hën hedi ku u te soni ta miti u. U sa dë ku tangi a hati seei u di u abi sö wan lobihati Könu di dë wan Gaan Mindima tu! (Hebelejën 4:15). A sa taanga da u fuu fusutan unfa wan sëmbë ta fii te a dë ku siki wan hii pisiten. Te wa dë ku siki, nöö a sa möön taanga da u fuu fusutan sö wan sëmbë. Pakisei fa Jesosi hën a bi abi tjalihati da sëmbë di bi dë ku siki, hii fa nöiti hën a bi ta siki. Boo mbei hii möiti u waka a Jesosi baka a di fa a bi ta lei taa a lobi sëmbë.​—1 Petuisi 3:8.

„WATA TA PASA A MASA JESOSI WOJO”

13. Andi di weki di Jesosi bi weki Lazalosi ta lei u u Jesosi?

¹³ A bi ta hati Jesosi seei te soni bi ta du wotowan. Di wan mati fëën de kai Lazalosi bi dëdë, nöö a bi „fukëën nëën hati gaanfa te a fika piki an sa hoi ën seei möön”, u di a bi si fa di soni dë bi hati dee mati ku dee famii u Lazalosi tjika (Lesi Johanisi 11:33-36). Hii fa Jesosi bi sabi taa a bi o weki Lazalosi, tökuseei a bi këë. An bi abi toobi ee wotowan bi o si fa a bi ta këë. Jesosi bi lobi Lazalosi ku dee famii fëën sö tee taa a tei di kaakiti di Gadu bi dëën faa weki ën ko a libi baka!​—Johanisi 11:43, 44.

14, 15. (a) Andi ta lei u taa Jehovah o puu libi sëmbë a fuka basu? (b) Andi di Giiki wöutu di de puu ko „geebi” kë taki?

¹⁴ Di Bëibel ta lei u taa Jesosi dë leti kuma hën Tata Jehovah (Hebelejën 1:3). Dee foombo soni dee Jesosi bi du ta lei taa Jehovah o puu siki, pen, ku dëdë a goonliba. Abiti möön Jehovah ku Jesosi o weki sömëni sëmbë ko a libi baka. Jesosi bi taki taa: „Wan juu o dou, nöö hii dëdë sëmbë tuu . . . o weki kumutu a geebi toona ko ku libi baka.”​—Johanisi 5:28, 29.

¹⁵ Di Giiki wöutu di de puu ko „geebi” nama ku wan woto Giiki wöutu di kë taki „u mëni”. Di Makiti Gadu u mundu hën mbei liba ala ku goonliba aki, nöö a sa mëni hii soni u dee lobiwan fuu dee dëdë. A sa mëni finifini un pei sëmbë de bi dë (Jesaaja 40:26). Na mëni nöö Jehovah sa mëni de baka, ma a kë mëni de baka. Dee woto u dee sëmbë dee bi weki baka, dee sikifi a Bëibel ta lei u andi da wan tu foombo soni dee o pasa a di njunjun goonliba.

DEE SONI DEE U TA LEI A DEE FOOMBO WOOKO U JESOSI

16. Un gaandi sömëni u dee dinima u Gadu o kisi?

¹⁶ Ee u ta hoi useei a Gadu nöömö, nöö u sa abi di gaandi u si wan gaan foombo soni di nöiti an bi pasa wan daka. Hën da di pasa di woo pasa di gaan fuka libilibi! Abiti möön, baka Amagedon woo si möön foombo soni seei. A di ten dë, hii libisëmbë o ko abi wan bunu gösöntu (Jesaaja 33:24; 35:5, 6; Akoalimbo 21:4). Pakisei fa a o dë te dee sëmbë o ta tuwë dee beei u de, dee kokoti u de, dee atikoko u de, dee bookofutuma sutuu, ku dee soni sëmbë ta tuusi a jesi u jei soni möön bunu. Jehovah sabi taa hii dee sëmbë dee o pasa Amagedon libilibi o abi wan bunu gösöntu fanöudu, u di de o abi hia wooko u du. De o abi di wooko u mbei di goonliba aki ko toon wan hanse paladëisi.​—Psalöm 115:16.

17, 18. (a) Faandi mbei Jesosi bi ta du foombo wooko? (b) Faandi mbei u musu du hii soni di u musu du fuu sa dou a di njunjun goonliba?

¹⁷ A di ten aki te dee „gaan hia sëmbë” ta lesi fa Jesosi bi ta kula dee siki sëmbë, nöö di soni dë ta da de degihati seei (Akoalimbo 7:9). Dee foombo soni dee Jesosi bi du ta taanga di biibi fuu taa a di ten di ta ko wa o ta siki möön. Söseei de ta lei unfa di fosu Womi Mii u Gadu lobi libisëmbë tjika (Johanisi 10:11; 15:12, 13). Di fasi fa Jesosi bi ta lei taa a abi fii da sëmbë, ta lei u fa Jehovah lobi hiniwan u dee dinima fëën tjika.​—Johanisi 5:19.

¹⁸ A di ten aki fuka ku dëdë hia a goonliba te na soni (Loomë 8:22). Fëën mbei u abi di njunjun goonliba fanöudu. A di njunjun goonliba dë, Gadu o mbei hii libisëmbë dë gösöntu kumafa a paamusi. Di tëkisi u Maleaki 4:2 ta da u di houpu taa „woo ta djombo ta wai” seei u di wa o ta siki möön, söseei u di wa o abi zöndu möön tu. Boo dë ku tangi a hati u dee soni dee Jehovah ta du da u, söseei boo biibi dee soni dee a paamusi taa a o du. Di soni dë o da u di taanga u du hii soni di u musu du fuu sa dou a di njunjun goonliba. U ta wai seei u di u sabi taa dee foombo wooko dee Jesosi bi du, ta lei u unfa soni o dë u nöömö te a o tii di goonliba abiti möön!