Jesosi nango baka a Gadu

HII FA dee daka ta pasa, Jesosi tjëën seei go lei dee bakama fëën sömëni pasi. Söwan 500 bakama si ën. I sabi fu andi Jesosi fan ku de di a tjëën seei go lei de u? Wë u di könuköndë u Gadu. Jehovah manda Jesosi ko a goonliba u ko lei sëmbë soni u di Könuköndë. Nöö baka di a weki a dëdë seei, a tan du di soni aki.

I sabi jeti andi da di könuköndë u Gadu ö? Aai, di Könuköndë da di tii u Gadu a liba, nöö Jesosi da di Sëmbë di Gadu buta u tii kuma könu. Kumafa u bi lei, nöö Jesosi lei taa a o dë wan gaan bunu könu u di a bi ta da dee sëmbë hangi bi ta kii njanjan, a bi ta kula dee sikima, söseei a bi ta weki dëdë sëmbë!

Wë nöö unfa di goonliba o dë te Jesosi o tii kuma könu a liba wan dusu jaa longi? Awa, hii di goonliba o toon wan hanse paladëisi. Gaan feti an o dë möön, hogidu, siki ku dëdë seei an o dë möön. U sabi di soni aki u di Gadu mbei di goonliba u dë wan paladëisi ka sëmbë musu libi waiwai. Fëën mbei a bi mbei di djai u Eden bigibigi. Nöö Jesosi o mbei taa di kë u Gadu pasa a hii së u goonliba.

Di juu dou taa Jesosi musu toona go baka a Gadu. Föteni daka longi Jesosi tjëën seei go lei dee bakama fëën. Nöö de dë seiki taa a ko a libi baka. Ma bifö a go disa dee bakama fëën a piki de taa: ’Un tan a Jelusalen aki te kuma un kisi di santa jeje.’ Di santa jeje da di kaakiti u Gadu, a dë kuma ventu, nöö hën o heepi dee bakama u Jesosi u du di kë u Gadu. Te u kaba fëën Jesosi taa: ’Un musu pleiki soni u mi te dou dee möön longi kamian u goonliba.’

Di Jesosi taki di soni aki te a kaba, hën wan foombo soni pasa. A bigi hopo sii nango a liba kumafa i ta si aki. Hën dee bundji tapëën, hën dee bakama u Jesosi an si ën möön. Jesosi go a Gadu, hën a bigi ta tii dee bakama fëën a goonliba aki.