Di kaba u hogilibi

ANDI i ta si aki? Aai, i ta si sodati a weti hasi liba. Ma luku ka de ta kumutu ta ko. Dee hasi ta kule ta saka kumutu a liba a dee bundji liba! Wë hasi dë a liba tuutuu ö?

Nönö, na tuutuu hasi disi. U sabi sö u di hasi an sa kule a bundji liba, na sö nö? Ma di Bëibel ta taki u hasi a liba. I sa’ faandi mbei ö?

Wë u di fosuten de bi lo’ u tei hasi u go a feti. Fëën mbei di Bëibel ta taki u sëmbë di dë a hasi liba ta saka kumutu a liba u lei taa Gadu abi wan feti u feti ku libisëmbë a goonliba. I sabi fa de ta kai di kamian ka di feti o feti ö? Hën da Amagedon. Di feti dë o mbei hii hogilibi kaba a goonliba.

Jesosi da di Sëmbë di o tei fesi a di feti na Amagedon. Kumafa i sabi, Jesosi da di Sëmbë di Jehovah tei buta kuma könu u di tii fëën. Fëën mbei Jesosi bisi wan könu kaapusa. Nöö di së ufangi ta lei taa a o kii hii dee felantima u Gadu. A musu foondo u taa Gadu o kii hii hogihati sëmbë u?

Luku Woto 10 baka. Andi i ta si naandë? Aai, i ta si di Gaan Wata di bi kii dee hogihati sëmbë. Ambë bi mbei di Gaan Wata dë ko? Wë Jehovah Gadu. Nöö luku Woto 15. Andi ta pasa naandë? Sodom ku Gomola ta tjuma kaba a sösö u di Jehovah manda faja go tjuma de.

Nöö luku Woto 33. Luku andi ta pasa ku dee hasi ku dee feti wagi u dee Egepiti sëmbë. Ambë bi mbei di wata kai ko tapa de? Wë Jehovah. A bi du ën u tjubi dee sëmbë fëën. Luku Woto 76. Naandë i ta si taa Jehovah bi disa sëmbë be de kii dee Isaëli sëmbë fëën u dee hogilibi u de hedi.

Nöö fëën mbei wa musu foondo taa Jehovah o manda dee sodati fëën u ko puu hii hogilibi a goonliba. Nöö pakisei pikisö andi di soni dë kë taki! Bia di bladsëidë boo go luku.