Andi u musu du fuu sa libi u teego

I SA konda da u andi di piki mujëë mii ku dee mati fëën ta lesi ö? Aai, di seei buku aki de ta lesi, Dee woto u di Bëibel. Nöö di seei woto di i ta lesi aki wë de ta lesi, „Andi u musu du fuu sa libi u teego”.

I saandi de ta lei ö? De ta lei taa u musu ko sabi Jehovah ku ën Womi Mii Jesosi ee u kë libi u teego. Di Bëibel taa: ’Di soni wan sëmbë musu du fu sa libi u teego, hën da a musu lei sabi soni u di tuutuu Gadu ku di Womi Mii fëën di a manda ko a goonliba, Jesosi Keesitu.’

Unfa u sa lei sabi Jehovah Gadu ku ën Womi Mii Jesosi? Wan fasi da te u ta lesi Dee woto u di Bëibel fu bigi te dou kaba. Di buku aki ta konda te a hia soni u Jehovah ku Jesosi, na sö nö? Söseei a ta konda sömëni soni di de du ku dee soni de o du jeti. Ma na lesi nöö u musu lesi di buku aki.

I ta si di woto buku di dë a goon dë u? Hën da di Bëibel. Be wan sëmbë lesi dee pisi u di Bëibel da i ka dee woto u di buku aki kumutu. Di Bëibel ta konda hii soni da u di u musu sabi sö taa hii u tuu sa dini Jehovah a wan leti fasi, nöö u feni di libi u teego. Fëën mbei u musu a’ di guwenti u lei soni u di Bëibel nöömö.

Ma an tjika te u ta lei soni u Jehovah Gadu ku Jesosi Keesitu. A kandë taa u sabi hia soni u de ku söseei dee soni de ta lei u, ma tökuseei wa feni di libi u teego. I saandi u musu du tu ö?

U musu du dee soni u ta lei. I sabi Judasi Isikaliotu jeti ö? A bi dë wan u dee 12 womi di Jesosi bi tei ko apösutu fëën. Judasi bi sabi hia soni u Jehovah ku Jesosi. Ma andi pasa ku ën? Baka wan pisiten a bigi ta mëni hënseei nöö, hën a sei Jesosi da dee felantima fëën u 30 pisi soofu möni. Fëën mbei Judasi an o feni di libi u teego.

I sabi Gehasi jeti ö, di womi di u bi lei soni fëën a Woto 69? A bi kë wan tu koosu ku möni di an bi dë fëën. Hën a go mindi soni fu sa feni dee soni dë. Ma Jehovah sitaafu ën. Nöö a o sitaafu u tu ee wa ta hoi dee wëti fëën.

Ma sömëni bumbuu sëmbë bi dë di bi ta hoi de seei a Jehovah ta dini ën ku telu. U kë dë kuma dee sëmbë dë, na sö nö? Di piki Samuëli da wan u dee bumbuu sëmbë di u sa djeesi. Kumafa u bi si a Woto 55, nöö fö nasö feifi jaa nöö a bi abi di a bigi dini Jehovah a di tenti fëën. Hën da aan toobi un mëni jaa i abi, ja njönku tumisi u dini Jehovah.

Ma aan misi taa di sëmbë di hii u tuu kë waka nëën baka da Jesosi Keesitu. Di a bi dë piki mii, kumafa u bi lei a Woto 87, a bi dë a di Wosu u Gadu ta konda soni fëën Tata a liba da wotowan. Boo waka nëën baka. Boo mbei möiti u konda soni fu di Gaangadu fuu Jehovah ku ën Womi Mii Jesosi Keesitu, da hii sëmbë di u feni. Te u du dee soni aki, nöö woo sa libi u teego a di njunjun paladëisi u Gadu a goonliba aki.