Unfa i sa ko lei soni u Gadu?

I sa lei soni u Jehovah te i ta lesi di Bëibel. Gaanduwe kaa, Gadu bi tei so sëmbë u sikifi dee pakisei fëën. Dee soni de sikifi u ta kai di Bëibel. A di ten aki, u ta lei soni u Gadu te u ta lesi di Bëibel. U di Bëibel abi Jehovah wöutu, nasö buka fëën, mbei de ta kai ën Gadu Wöutu. U sa biibi dee soni Bëibel ta taki, biga na wan daka Jehovah sa lëgëdë. ’Gadu an sa lëgëdë kwetikweti’ (Hebelejën 6:18). Gadu Wöutu abi di tuutuu lei.​—Johanisi 17:17.

Di Bëibel da wan u dee möön dii kado di Gadu da u. A dë kuma wan biifi di wan lobihati tata manda da dee mii fëën. A ta konda da u fa Gadu o tooka goonliba ko toon wan hanse kamian u libi, hën da wan paladëisi. Söseei a ta konda dee soni a bi du kaa, dee soni a ta du nöunöu, ku dee soni a o du a di ten di ta ko da dee mii fëën, dee ta da jesi nëën. A ta heepi u ku dee fuka fuu, söseei a ta heepi u fuu feni wan kölöku libi.​—2 Timoteo 3:16, 17.

Jehovah Kotoigi da mati u Gadu. De o heepi i fii ko fusutan andi di Bëibel ta lei. Piki de nöö taa i kë lei soni u Bëibel. De an o hakisi i fii paka de wan möni (Mateosi 10:8). Söseei i sa go a dee komakandi u Jehovah Kotoigi tu. De ta hoi de a kamian teka de ta dini Gadu, di de ta kai Könuköndë zali. Ee i nango a dee komakandi, nöö hesihesi seei joo ko sabi soni u Gadu.

Dee soni Gadu mbei ta lei u unfa a dë. Bëibel ta taki taa: ’Gadu mbei hemel a liba ku di goonliba’ (Kenesesi 1:1). Di Jehovah mbei ’hemel a liba’, nöö a bi mbei di sonu. Andi di soni dë ta lei u, u Gadu? A ta lei u taa Jehovah abi makiti gaanfa. Hën wanwan tö bi sa mbei wan soni di abi kaakiti sö kuma di sonu. A ta lei u tu taa Jehovah köni, biga köni dë fanöudu u mbei di sonu. Di sonu ta kendi u, a ta tuwë limbo da u, söseei di faja fëën an ta tjuma kaba möönsö.

Dee soni Gadu mbei ta lei u taa a lobi u. Buta mëni a dee peipei pau-njanjan dee dë a goonliba. Jehovah bi sa da u wan kodo pei pau-njanjan, nasö na wan kodo seei. Tökuseei Jehovah da u sömëni peipei pau-njanjan ku tookatooka mbei, gaanwan ku pikiwan, tookatooka kulölu ku peipei tesi. Di soni aki ta lei u taa Jehovah an dë wan lobihati Gadu nöö, ma a lo u da sëmbë soni, a ta mëni wotowan, söseei a lobi sëmbë tu.​—Psalöm 104:24.