U musu mbei möiti u libi kuma wan famii a di kemeente

Te u ta dë makandi ku dee baaa ku dee sisa fuu, nöö u ta fii leti kuma Könu Dafiti di bi taki taa: „Luku unfa a bunu, söseei unfa a suti te baaa ku baaa ta libi makandi!” (Psalöm 133:1) Di libi di u ta libi kuma wan famii an ta ko fu hënseei. Hii u tuu musu du wan soni fuu sa libi kuma wan famii a di kemeente.

1. Andi da wan apaiti soni di u ta si a dee sëmbë u Gadu?

Ee i go a wan komakandi a wan woto köndë, nöö aluwasi ja ta fusutan di töngö, tökuseei joo fii taa i dë a sëmbë mindi di lobi i. Faandi mbei a dë sö? U di u ta lei dee seei soni u Bëibel a hii së u goonliba. Nöö hii u tuu ta mbei möiti u lei taa u lobi useei. Aantoobi ka i ta libi, hii u tuu „sa kai di në u Jehovah, fuu sa dini ën makandi.”​—Sefanja 3:9.

2. Andi u sa du fuu sa libi kuma wan famii?

„Lobi unu na unu ku hii unu hati” (1 Petuisi 1:22). Unfa u sa du di soni di sikifi a di tëkisi aki? Ka fii ta buta pakisei a dee föutu u wotowan, nöö i sa buta pakisei a dee bunu fasi u de. Na hulu sëmbë di lobi dee seei soni dee i lobi nöö, ma pooba u ko sabi woto baaa ku sisa di lobi woto soni tu. Söseei u musu du hii soni di u sa du, u puu hiniwan pakisei di sa mbei u kuutu wotowan.​—Lesi 1 Petuisi 2:17.a

3. Andi joo du ee i ku wan baaa nasö wan sisa an kai a wan a wan soni?

Hii fa u ta libi kuma wan famii, tökuseei wa ta fëëkëtë taa u da zöndu libisëmbë. So juu u sa du wan soni nasö taki wan soni di sa hati wotowan, nasö wotowan sa du wan soni nasö taki wan soni di sa hati u tu. Di wöutu u Gadu ta piki u taa: „Un musu ta . . . da unuseei paadon,” söseei a ta taki tu taa: „Leti kumafa Jehovah ta da unu paadon, sö nöö u musu ta da wotowan paadon tu” (Lesi Kolosën 3:13.) Hii juu u ta du soni di ta hati Jehovah, ma tökuseei a ta da u paadon. Fëën mbei a kë fuu ta da dee baaa ku dee sisa fuu paadon tu. Ee i ko si taa i du wan soni nasö taki wan soni di hati wan sëmbë, nöö na biabia u go hakisi ën paadon.​—Lesi Mateosi 5:23, 24.b

WOTO SONI DI I SA LEI

4. Na kuutu wotowan

U kë lobi hii dee baaa ku dee sisa fuu. Ma so juu a sa taanga da u fuu lobi wan sëmbë di dë u wan woto lö nasö di kiija a wan woto fasi. Andi sa heepi u? Lesi Tjabukama 10:34, 35, nöö piki dee hakisi aki:

• Jehovah ta tei hii pei sëmbë u ko dë Kotoigi fëën. Unfa di soni dë musu mbei i si wan sëmbë u wan woto lö di kiija a wan woto fasi?

• Andi da wantu soni di sëmbë lo’ u du a di pisiwata ka i ta libi, di ta lei taa de ta buuse sëmbë u wan woto lö, nasö sëmbë di an dë kuma de? Faandi mbei u musu köni ku dee soni aki?

Lesi 2 Kolenti 6:11-13, nöö piki di hakisi aki:

• Andi u sa du fuu sa ko dë mati ku dee baaa ku sisa fuu dee dë u wan woto lö?

5. Da wotowan paadon ku hii i hati, nöö mbei möiti u libi fiifii ku de

Jehovah dë kabakaba u da u paadon, hii fa an ta mbei föutu fuu dëën paadon. Lesi Psalöm 86:5, nöö piki dee hakisi aki:

• Andi di tëkisi aki ta lei u u Jehovah?

• Faandi mbei i ta tei ën u bigi taa Jehovah ta dë kabakaba u da u paadon u?

• Andi sa mbei a taanga da u fuu libi fiifii ku wotowan?

Unfa u sa djeesi Jehovah, söseei unfa u sa libi fiifii ku dee baaa ku dee sisa fuu? Lesi Nöngö 19:11, nöö piki di hakisi aki:

• Ee wan sëmbë taki wan soni nasö du wan soni di hati i, nöö andi i sa du u soni an ko möön hogi?

So juu useei ta du soni di ta hati wotowan. Te söwan soni pasa, nöö andi u sa du? Pëë di FËLÖN, nöö piki di hakisi aki.

FËLÖN: U ta feni wini te wa ta hoi wotowan a bëë (6:01)

• Andi di sisa bi du fëën ku di woto sisa bi sa ko dë bunu ku deseei baka?

6. Buta pakisei a dee bunu fasi u dee baaa ku dee sisa fii

Te u ta ko sabi dee baaa ku dee sisa fuu möön bunu, nöö u ta ko si dee bunu fasi u de, ku dee fasi u de di an bunu. Andi sa heepi u fuu buta pakisei a dee bunu fasi u de? Pëë di FËLÖN, nöö piki di hakisi aki.

FËLÖN: Ko abi möön bunu fasi! (5:10)

• Andi sa heepi i fii si dee bunu fasi u dee baaa ku dee sisa fii?

Jehovah ta buta pakisei a dee bunu fasi fuu. Lesi 2 Kloniki 16:9a, nöö piki di hakisi aki:

• Unfa di sabi di i ko sabi taa Jehovah ta buta pakisei a dee bunu fasi fii ta mbei i fii?

ANDI I LEI?

Te i ta dë kabakaba u da wotowan paadon, söseei te i ta lei hii dee baaa ku dee sisa taa i lobi de, nöö a sö wan fasi i ta heepi u mbei hii sëmbë a di kemeente ta libi kuma wan famii.

Andi i bi o piki?

• Andi sa heepi i u na ta kuutu wotowan?

• Andi joo du ee i ku wan baaa nasö wan sisa an kai a wan a wan soni?

• Faandi mbei i kë djeesi Jehovah a di fasi fa a ta da sëmbë paadon?

WOTO SONI DI I SA LUKU

Luku di fëlön aki fii si unfa di woto di Jesosi bi konda ta heepi u fu wa kuutu wotowan.

Puu di posu a i wojo (6:56)

U musu hakisi wotowan paadon hii fa u ta fii taa u abi leti ö?

„Wi sa man meki vrede nanga trawan te wi e aksi den pardon” (A Waktitoren, 1 u ëlufumu-liba 2002)

Luku di fëlön aki fii si unfa so sëmbë bi lei u libi bunu ku wotowan di dë u wan woto lö.

Na luku sëmbë, nöö i kuutu de u di fasi fa de dë (5:06)

Lesi di woto aki fii si unfa i sa seeka pikipiki toobi sö taa fiifii libi sa dë a di kemeente hii juu.

„Lei taa i abi lobi te i musu koti wan taki ku wan sëmbë” (Di Hei Wakitimawosu u sebitaa-liba 2016)