Wooko ku di website fuu jw.org a di peleikiwooko

Di Website fuu da wan bunu wooko lai di ta heepi u, u paaja di bunu buka te dou „a hii dee köndëköndë u goonliba tuu” (Tjab. 1:8). Gaansë u dee sëmbë dee u ta peleiki da an saanfa u go a di site fuu jw.org. Ma te wan peleikima lei de, nöö de ta ko sabi.

Wan keling-gaanwomi download di fëlön Faandi mbei u musu lei soni u Bëibel? buta nëën tëlëfön, nöö a ta lei sëmbë ën a hiniwan okasi di a feni. Te a dë a di peleikiwooko nöö a ta taki: „Mi ta pasa kölö sö a sëmbë u heepi de u feni dee piki u dii fanöudu hakisi: Faandi mbei fuka hia a goonliba sö? Unfa Gadu o seeka soni ko bunu baka? Nöö unfa u sa pasa dee fuka aki nöunöu? Di sati fëlön aki ta piki dee hakisi aki.” A ta pëë ën dëën, nöö a ta luku unfa di sëmbë ta feni ën. Di fëlön ta hai sëmbë pakisei sö taa gaansë u de an sa ta puu wojo a di fëlön möön u te a kaba pëë. Baka di dë, di Keling-gaanwomi ta taki taa: „I jei a di fëlön aki taa i sa hakisi Jehovah Kotoigi a di website fuu, u ko lei i soni u Bëibel.” Ee di sëmbë kë, nöö a ta tei di Bunu Buka-brochure u lei ën fa u ta lei sëmbë soni u Bëibel. Ee di sëmbë aan ten, nöö a ta piki ën taa a o lei ën te a o toona ko nëën. Di seei fasi a ta bigi wan fan ku wan sëmbë a wan kamian ka de ta bai kofi bebe. Te a go sindo böö naandë, nöö a ta bigi wan fan a wan sutifasi ku wan sëmbë di sindo nëën bandja. I ta wooko ku jw.org a di peleikiwooko u?