Unfa u sa peleiki ku di bukuwagi nasö di bukutafa

Di peleiki di u ta peleiki ku di bukutafa nasö di bukuwagi, da wan seti di ta heepi sömëni bunuhati sëmbë u ko a di tuutuu biibi. (Joh. 6:44) Fëën mbei dee gaanwomi ta kisi di degihati u seti soni, sö taa di kemeente sa ta peleiki a kamian ka hia sëmbë ta waka pasa. U di wa ta buta di bukutafa nasö di bukuwagi a di wan seei kamian hii juu, mbei wa a’ fu hakisi lanti ufö u seti de. Ma ee dee wëti u di köndë, nasö woto soni u di köndë ta taki taa u musu hakisi ufö, nöö u musu du ën. Ambë sa kisi di gaandi u wooko a di bukutafa nasö di bukuwagi? Wan peleikima di abi di köni u si soni gbelingbelin, di ta tja hënseei a wan fasi di fiti, ku di sa’ u fan bunu ku sëmbë. Dee soni dee sikifi a basu aki, ta lei andi dee peleikima musu du ku andi de an musu du, sö taa soni waka möön bunu da de.

Soni di i musu du:

I musu abi sutifasi, nöö i musu dë kabakaba u heepi dee sëmbë dee ta waka pasa. So peleikima ta lafu da de, nöö de ta da de odi tu. Te wan sëmbë ta waka pasa ta luku di bukutafa nasö di bukuwagi, nöö i sa piki ën taa: „Ee i kë i sa tei wan soni e.”
Na taanpu zuntu poi u di bukutafa nasö di bukuwagi. A so kamian, soni ta waka bunu da dee peleikima te de taanpu a di bukutafa nasö di bukuwagi bandja. Ma so peleikima ta feni taa te de du ën sö, nöö dee sëmbë ta waka pasa. Fëën mbei de ta taanpu pikisö a longi ta wakiti te wan sëmbë waka ko a di bukutafa nasö di bukuwagi, nöö de ta waka go fan ku ën. Te wan sëmbë waka ko a di bukutafa nasö di bukuwagi, nöö pooba u fan ku ën. I sa hakisi ën taa: „I bi hakisi iseei di soni aki kaa u?”
Wooko ku di Bëibel, solanga i feni pasi u du ën.
Te wan sëmbë tei wan buku, kuma di Bëibel lei-buku, nöö i sa lei ën unfa u ta lei sëmbë soni u Bëibel. Hakisi ën ee i sa pëë wan fëlön dëën, nöö pëë di fëlön Faandi mbei u musu lei soni u Bëibel? dëën a wan tablet nasö wan tëlëfön.
Ee wan sëmbë kë ko sabi möön soni u Bëibel, nöö hakisi ën di tëlëfön nöbu fëën ku ka a ta libi. Ee di sëmbë an ta libi a di pisiwata ka un ta peleiki, nöö fuu di Gobaka-pampia (S-43), nöö na biabia u tjëën go da di sekretares u di kemeente fii.