Unfa u sa wooko ku dee buku fuu dee de buta a CD nasö a mp3
1. Boiti dee buku fuu dee dë a pampia, un woto bunu soni u abi tu?
1 Sömëni sëmbë ta feni ën bunu u go a jw.org u go lesi soni u di tuutuu lei (Peleik. 12:10). Ma i ta haika dee buku fuu dee de buta a CD nasö a mp3 ö? Di soni aki o da i pasi fii haika sömëni u dee soni dee dë a di website fuu. Unfa u sa feni wini u dee buku fuu dee de buta a CD nasö a mp3?
2. Unfa u sa wooko ku dee buku fuu dee de buta a CD nasö a mp3 te u ta lei useei soni u Bëibel nasö te u ku u wosudendu ta lei soni u Bëibel?
2 Da useei nasö da u wosudendu: Di haika di woo ta haika di Bëibel, dee buku fuu, ku woto soni di de buta a CD nasö a mp3 te u dë a pasi nango a kamian nasö te u dë ta wooko, sa heepi u fuu wooko ku di ten fuu a wan köni fasi (Ef. 5:15, 16). So juu u sa haika wan u dee buku fuu di de lesi buta CD nasö a mp3 te u ta hoi di Wosudendu dini fuu, nöö hii sëmbë sa ta haika ta luku a di buku u de. Te u ta lei useei soni u Bëibel, nöö u sa haika wan u dee buku fuu di de buta a CD nasö a mp3. Di soni aki sa heepi u fuu ko sa u’ lesi möön bunu, söseei a sa heepi u te u ta lei wan njunjun töngö.
3. Ambë dë a di pisiwata fuu di sa feni wini u dee buku fuu dee de buta a CD nasö a mp3?
3 Te u dë a di peleikiwooko: Dee sëmbë a di pisiwata fuu dee an ta feni ten u lesi, sa kë haika dee buku fuu dee de buta a CD nasö a mp3. Nasö u sa miti sëmbë di ta fan wan woto töngö dee sa kë haika di bunu buka u di Könuköndë ee a dë a di u „deseei töngö” (Tjab. 2:6-8). A so kamian, sëmbë möön guwenti u haika soni. Wë, sö dee Hmong sëmbë guwenti u konda woto u soni di bi pasa da dee mii u de. Nöö de an ta fëëkëtë dee woto dë. A sömëni u dee Afiikan köndë, sëmbë ta konda woto u lei wotowan soni.
4. Andi u sa hakisi useei ee u kë heepi dee sëmbë a di pisiwata ka u ta peleiki?
4 I si kuma a bi o bunu u pëë wan pisi u wan u dee buku fuu da wan sëmbë u di pisiwata ka i ta peleiki a di töngö fëën u? Sëmbë sa feni wini u wan u dee buku fuu dee dë a CD nasö a mp3 di u manda dëën a e-mail ö? U bi o sa download wan u dee buku fuu buta a CD, nöö u da wan sëmbë ën makandi ku di pampia wan u di buku ö? Ee u manda wan CD nasö wan mp3 u wan buku nasö u wan brochure nasö u wan talakitaati da wan sëmbë, nöö u sa kondëën a di peleikiwooko pampia fuu. De buta dee buku fuu a CD ku mp3 sö taa u sa wooko ku de te u ta lei useei soni u Bëibel, söseei fuu paandi dee sii u di Könuköndë a sëmbë hati.—1 Kol. 3:6.