Unfa i sa begi te nöö Gadu jei dee begi fii?

BEGI JEHOVAH GADU A DI NË U JESOSI

„Mi taki e baa, taa hiniwan soni di woon begi mi Tata a mi në, nöö woon feni ën e.”​—Johanisi 16:23.

Dee soni dee Jesosi taki aki ta lei gbelingbelin taa Jehovah an kë fuu begi ën ku peentje, söseei an kë fuu ta kai di në u wan ëngëli, nasö u wan sëmbë di dëdë kaa, te u ta begi ën, ma a kë fuu begi ën a di në u Jesosi Keesitu. Te u ta begi Gadu a di në u Jesosi, nöö u ta lei taa u ta fusutan taa Gadu ta haika dee begi fuu u di soni di Jesosi du hedi. Jesosi bi taki taa: „Na wan sëmbë sa dou a mi Tata e, ee na mi tja i go nëën.”​—Johanisi 14:6.

KONDA DEE SONI DEE DË A I HATI

„Konda hii dee soni dee dë a unu hati dëën.”​—Psalöm 62:8.

Te u ta begi Jehovah, nöö u musu ta fan ku ën leti kumafa u bi o fan ku wan tata di lobi u. Ka fuu lesi wan soni di sikifi a wan buku, nasö taki wan soni di u lei a hedi, u musu fan ku ën a wan lesipeki fasi, nöö dee soni dee woo taki musu kumutu a u hati.

DEE BEGI FII MUSU KAI KU DI PAKISEI FËËN

„U sabi tu taa te u begi ën wan soni, nöö ee di begi kai ku di pakisei fëën, nöö a o jei.”​—1 Johanisi 5:14.

A di Bëibel, Jehovah Gadu ta piki u andi a o du da u ku andi a kë fuu du dëën. Ee u kë taa Gadu feni dee begi fuu u bunu, nöö dee begi fuu musu „kai ku di pakisei fëën.” Ee u kë begi sö, nöö u musu lei soni a di Bëibel, sö taa u sa ko sabi ën bunu. Ee u du di soni aki, nöö dee begi fuu o kai ku ën.

ANDI U SA BEGI DA?

Begi da dee soni dee i abi fanöudu. U sa begi Gadu faa da u dee soni dee u abi fanöudu hiniwan daka. Soni kuma njanjan, soni u bisi ku wan tan kamian. U sa begi tu faa da u köni fuu sa du soni a wan bunu fasi, söseei faa da u taanga fuu pasa dee fuka dee ta miti u. U sa begi fuu ko abi wan möön taanga biibi, faa da u paadon, söseei faa heepi u a soni.​—Lukasi 11:3, 4, 13; Jakobosi 1:5, 17.

Begi da wotowan. Mama ku Tata di lobi dee mii u de ta fii bunu te dee mii u de lobi deseei. Jehovah seei kë u dee mii fëën a goonliba aki ta booko de hedi ku de na de. A fiti taa u begi da u manu nasö u mujëë, da dee famii fu, dee mii fuu, ku dee mati fuu. Jakobosi bi sikifi taa: „Un [musu] ta begi da unu seei.”​—Jakobosi 5:16.

Dë ku tangi. Di Bëibel ta taki u di Sëmbë di mbei u taa: „A bi seti dee soni fëën buta fu sëmbë musu si sabi taa wan bunuhati Gadu dë nöömö.  . . Biga te juu dou, a ta da unu tjuba. Te juu dou, a ta mbei dee soni i paandi göö fuun ta feni soni u njan. Un dë ku wai” (Tjabukama 14:17). Te u ta pakisei hii dee soni dee Gadu du da u, nöö a o mbei taa u kë dëën tangi te u ta begi ën. Ma u sa lei taa u dë ku tangi tu a di fasi fa woo libi.​—Kolosën 3:15.

I MUSU ABI PASENSI TA BEGI NÖÖMÖ TU

So juu u sa ta fii bookosaka, u di Gadu an piki u wantewante te u begi ën. Te a dë sö, nöö u musu si kuma Gadu an ta booko hën hedi ku u ö? Wë nönö! Buta pakisei a dee woto aki dee ta lei taa a dë fanöudu fuu ta begi nöömö.

Steve, di u bi taki soni fëën a di fosu woto, bi taki taa: „Ee ma bi ta begi, nöö ma bi o ta biinga ku di libi möön.” Andi bi mbei soni bi ko tooka? A bi bigi lei soni u Bëibel, nöö a bi ko si taa a bi musu ta begi nöömö. Steve bi taki tu taa: „Mi ta begi Gadu ta dëën tangi u di fasi fa a ta mbei dee mati u mi ta heepi mi. Nöunöu mi ta dë waiwai seei.”

Wë unfa soni waka da Jenny, di bi ta si kuma an bi bunu tjika u Gadu haika dee begi fëën? A bi taki taa: „Di mi bi ta fii bookosaka gaanfa seei, hën mi bi begi Gadu faa heepi mi u mi ko fusutan faandi mbei mi bi ta si kuma ma bi bunu dëën tjika.” Unfa di soni dë bi heepi ën tjika? A bi taki taa: „Di fan di mi bi ta fan ku Gadu bi heepi mi u mi bi ko ta si miseei kumafa hën ta si mi, hën da u mi bi ko ta si taa an ta kuutu mi te mi ta kuutu miseei. A bi heepi mi u mi hoi dou.” Andi bi ko pasa? „Di begi di mi bi ta begi, bi heepi mi u mi si taa Jehovah dë tuutuu, taa a lobi sëmbë, a dë wan Gadu di ta booko hën hedi ku sëmbë, a dë wan Tata, söseei wan Mati di o ta heepi mi hii juu, solanga mi ta du soni kumafa a kë.”

Luku di woto u wan mujëë de kai Isabel. Di a bi dë ku bëë, hën dee data fëën bi piki ën taa a bi o pai wan makisa mii. A bi fii bookosaka seei. So sëmbë bi piki ën seei taa a bi o bunu ee a puu di bëë. A bi taki taa: „Mi bi ta si kuma dee fuka dee mi bi ta tja a mi hati, bi o kii mi.” Andi a bi du? A taa: „Mi bi ta begi Gadu nöömö faa heepi mi.” Bakaten a bi ko pai di mii, hën de kai ën Gerard. A bi makisa tuu. Ma Isabel bi si kuma Gadu bi piki dee begi fëën u? Wë aai! Na un futu? A bi taa: „Te mi ta si fa di womi mii u mi di abi 14 jaa nöunöu ta wai ku di libi, hii fa an sa du hii soni, nöö mi ta si taa di dë di a dë a libi da di möön bunu fasi fa Jehovah bi sa piki dee begi u mi. Hën da di möön gaan bunu di Jehovah da mi.”

Di soni aki ta mbei u mëni dee soni di di psalöm sikifima bi taki. A bi taa: „Jehovah o, mi sabi taa joo jei dee begi di dee sakafasi sëmbë ta begi i. Joo seeka de hati. Joo seti jesi haika de” (Psalöm 10:17). Dee soni aki musu da u taanga fuu ta begi nöömö!

Sömëni begi di Jesosi bi begi, sikifi a di Bëibel. Di begi fëën di sëmbë möön sabi da di begi di a bi lei dee bakama fëën. Andi u sa lei a di begi dë?