I sa dë waiwai tuutuu

1. Unfa di dë di u kë dë waiwai nama ku di fii di u ta fii ta u abi Gadu fanöudu?

TE WAN sëmbë dë waiwai tuutuu, nöö an ta dë waiwai u wan kölö pisiten nöö, ma hii hën libi longi a ta dë waiwai. Unfa sö? A di taki di Jesosi bi hoi a di kuun liba, a bi taki taa: „Un dë bunu e, dee sëmbë, ee un ta fii taa söndö Gadu wan dë wan wojo soni” (Mat. 5:3). Jesosi bi sabi taa Gadu mbei libisëmbë a sö wan fasi taa de o kë sabi di Sëmbë di mbei de, söseei taa de o kë dini ën. U di Jehovah da wan Gadu di ta dë waiwai hii juu, mbei dee sëmbë dee ta dini ën, sa ta dë waiwai tu.​—1 Tim. 1:11.

2-3. (a) Ambë Jesosi bi taki taa sa ta dë waiwai tu? (b) Fuun soni woo taki a di woto aki, nöö faandi mbei a dë fanöudu fuu taki fëën?

² A dë sö tuu taa te wa abi na wan fuka nöö nëën ufö u sa taki taa u dë waiwai ö? Wë nönö. Jesosi bi taki wan soni a di taki di a bi hoi a di kuun liba. A bi taki taa dee sëmbë dee „ta këë”, kandë u di de du wan gaan zöndu, nasö u di hati soni miti de a de libi, sa ta dë waiwai. A bi taki tu taa dee ’sëmbë dee wotowan ta suku a toobi fu di de ta libi bunu a Gadu wojo’, söseei dee sëmbë dee wotowan ta „kosi” u di de ta waka nëën baka, sa ta dë waiwai tu (Mat. 5:4, 10, 11). Ma unfa u sa ta dë waiwai tuutuu te dee lö soni aki ta miti u?

³ Jesosi bi lei u taa na te soni nango bunu da u, nöö nëën ufö woo ta dë waiwai. Ma woo ta dë waiwai te u ta suku Gadu baka, söseei te u ta mbei möiti fuu ku ën ko dë möön gaan mati (Jak. 4:8). Unfa u sa du dee soni dë? A di woto aki, woo taki u dii soni di sa heepi u fuu dë waiwai tuutuu.

LEI SONI U BËIBEL

4. Andi da di fosu soni di u musu du ee u kë dë waiwai tuutuu? (Psalöm 1:1-3)

⁴ DI FOSU SONI: Ee u kë dë waiwai tuutuu, nöö u musu ta lesi di Bëibel, söseei u musu ta öndösuku soni fëën. Jesosi bi tei di Wöutu u Gadu maaka ku soni u njan. Libisëmbë ku mbeti tuu musu njan u de sa dë a libi. Ma libisëmbë wanwan sa lei soni u Bëibel, söseei a dë fanöudu u de du di soni dë. Fëën mbei Jesosi bi taki taa: „Na soni u njan wanwan nöö ta hoi sëmbë a libi e, ma a hiniwan wöutu fu Gadu di a ta taki, nöö a de libi ta kumutu” (Mat. 4:4). Wa musu mbei wan daka pasa, nöö wa lesi di Wöutu u Gadu. Di psalöm sikifima bi taki taa: ’Di sëmbë di lobi di wëti u Jehovah, söseei di ta lesi ën ndeti ku didia, dë bunu.’​—Lesi Psalöm 1:1-3.

5-6. (a) Andi u sa lei a di Bëibel? (b) Unfa di lesi di u ta lesi di Bëibel sa heepi u?

⁵ U di Jehovah lobi u, mbei a lei u a di Bëibel andi u musu du fuu sa dë waiwai. Di Wöutu fëën ta lei u andi a kë taa u musu du, unfa u ku ën sa ko dë möön gaan mati, söseei andi u musu du sö taa a sa da u paadon u dee föutu dee u ta mbei. U ko sabi tu taa a o mbei u feni gaan bunu a di ten di ta ko (Jel. 29:11). Dee soni dee u ta lei te u ta öndösuku di Bëibel, ta mbei u ta dë waiwai!

⁶ U sabi taa di Bëibel ta taki u soni di sa heepi u a u libi. Te u ta libi ku dee soni dee a ta taki, nöö u sa ko dë waiwai. Te i ta fii bookosaka u di fuka ta miti i, nöö i musu lesi di Wöutu u Jehovah möön gaanfa, söseei i musu pakisei fundu u dee soni dee i lesi. Jesosi bi taki taa: „Dee sëmbë dee ta jei di Wöutu u Masa Gadu ta piki ën buka, nöö de ta feni di möön gaan bunu!”​—Luk. 11:28.

7. Andi sa heepi i fii feni wini tuutuu u di lesi di i ta lesi di Bëibel?

⁷ Te i ta lesi di Wöutu u Gadu, nöö a bunu fii buta pakisei a dee soni dee i ta lesi. A bi pasa ku i kaa taa wan sëmbë bi boi wan soni di i lobi gaanfa seei, hën i biinga njan mën hesihesi söndö fii fii suti fëën u? Wë a kan taa a bi pasa sö, u di ja bi abi hia ten, nasö u di i bi ta pakisei woto soni. Ma baka di i kaba njan, hën i bi ko fusutan taa i bi njan di soni hesi poi, nöö a hati i taa ja bi tei i ten u njan di soni bumbuu. Wë sö nöö a sa pasa te u ta lesi di Bëibel. So juu u ta lesi ën hesi poi, nöö wa ta feni pasi u buta pakisei a di soni di u ta lesi. Tei i ten te i ta lesi di Wöutu u Gadu. Pakisei unfa soni bi sa dë, pakisei unfa dee sëmbë bi ta fan, söseei kai pakisei a dee soni dee i lesi. Te i ta du dee soni aki, nöö möönmöön joo ta dë waiwai.

8. Unfa „di köni saafu di dë u futoou” ta du di wooko di de butëën faa du? (Luku di pisi a basu tu.)

⁸ Jesosi buta „di köni saafu di dë u futoou” u da u soni u njan a di së u di biibi, nöö de ta du di wooko u de bunu seeib (Mat. 24:45). De ta wooko ku di Bëibel u lei u soni u Jehovah (1 Tes. 2:13). Di soni aki ta heepi u fuu ko sabi unfa Jehovah ta si soni. Fëën mbei u ta lesi dee Hei Wakitimawosu, dee Ontwaakt! ku dee woto soni dee dë a jw.org. U ta seeka useei da dee komakandi dee u ta hoi a mindi wiki, ku dee u ta hoi a sata nasö a sonde. Söseei hiniwan liba u ta luku di JW Broadcasting^®. Te u ta lesi di Bëibel, söseei te u ta öndösuku soni fëën, nöö woo sa du di u tu soni di dë fanöudu fuu du, fuu sa ta dë waiwai.

HOI DEE WËTI U JEHOVAH

9. Andi da di u tu soni di u musu du ee u kë ta dë waiwai tuutuu?

⁹ DI U TU SONI: Ee u kë ta dë waiwai tuutuu, nöö u musu hoi dee wëti u Jehovah. Di psalöm sikifima bi taki taa: „Dee sëmbë dee abi lesipeki da Jehovah, dee ta waka a di pasi fëën, dë bunu” (Ps. 128:1). U ta lei taa u ta lesipeki Jehovah, te wa ta du soni di an ta kai ku ën (Nöng. 16:6). Fëën mbei u ta mbei möiti u hoi dee wëti u Gadu, dee ta taki andi da bunu ku andi da hogi. U sa feni dee wëti aki a di Bëibel (2 Kol. 7:1). Woo ta dë waiwai, te u ta du dee soni dee Jehovah lobi, söseei te u ta bia baka da dee soni dee a ta buuse.​—Ps. 37:27; 97:10; Lom. 12:9.

10. Un faantiwöutu u abi, te u luku Loomë 12:2?

¹⁰ Lesi Loomë 12:2. Wan sëmbë sa sabi taa Jehovah abi di leti u piki u andi da bunu ku andi da hogi, ma di dë an tjika. A musu dë kabakaba u hoi dee wëti dë tu. Wan sëmbë sa sabi taa gaan lanti u di köndë abi di leti u taki unfa wan sëmbë sa lëi di wagi fëën taanga tjika a dee pasi. Ma kandë an o dë kabakaba u hoi di wëti dë. Te u kaba fëën, a ta lëi möön taanga möön fa di wëti taki. Di fasi fa u ta tja useei ta lei ee u ta biibi tuutuu taa te u ta hoi dee wëti u Jehovah, nöö woo ta dë waiwai tuutuu (Nöng. 12:28). Dafiti bi ta fii sö, u di a bi taki taa: „I ta lei mi fa mi musu libi. Mi ta wai te mi si taa i feni mi u bunu. Te mi dë a di letisë maun fii, nöö mi ta dë waiwai hii juu.”​—Ps. 16:11.

11-12. (a) Ku un soni u musu ta köni te soni ta toobi u, nasö te u lasi hati? (b) Unfa dee soni dee sikifi a Filipi 4:8 sa heepi u te u ta luku andi woo du u mbei piizii?

¹¹ Te soni ta toobi u, nasö te u lasi hati, nöö so juu u ta suku u du soni di sa heepi u fu wa booko u hedi. Di soni aki an föutu, ma u musu köni taa wa go du soni di Jehovah ta buuse.​—Ef. 5:10-12, 15-17.

¹² A di biifi di Paulosu bi sikifi manda da dee Keesitu sëmbë a Filipi, a bi da de taanga u de ta pakisei ’dee soni dee dë leti, dee soni dee dë gbelingbelin a Gadu wojo, dee soni dee dë u lobi, ku dee soni dee dë u kai gaan soni’. (Lesi Filipi 4:8.) Hii fa Paulosu an bi ta taki u dee soni dee u ta du u mbei piizii nömönömö, tökuseei dee soni dee a bi taki sa heepi u fuu köni ku dee soni dee u ta du u mbei piizii. Pooba di soni aki: Ka i si di wöutu „soni” a di vers, nöö i buta dee wöutu „poku”, „fëlön”, „buku”, nasö „game” nëën kamian. Te i du di soni aki, nöö a o heepi i fii ko sabi andi ta kai ku Gadu, ku andi an ta kai ku ën. U kë ta libi ku dee wëti u Jehovah (Ps. 119:1-3). Te u ta du sö, nöö woo sa du di woto soni di sa mbei u ko ta dë waiwai, ku wan limbo háti.​—Tjab. 23:1.

BUTA DI DINI U JEHOVAH A DI FOSU KAMIAN

13. Andi da di u dii soni di sa heepi u fuu ta de waiwai tuutuu? (Johanisi 4:23, 24)

¹³ DI U DII SONI: Be di dini u Jehovah dë a di fosu kamian a di libi fii. Jehovah da di Gadu di mbei u. Fëën mbei u musu dini ën (Ako. 4:11; 14:6, 7). Di möön fanöudu soni a u libi musu dë di dini di u ta dini Jehovah a di fasi di ta kai ku ën. Hën da u musu dini ën „a wan tuutuu fasi ku di santa jeje fëën”. (Lesi Johanisi 4:23, 24.) U kë taa di santa jeje musu tii u sö taa u sa ta dini Jehovah kumafa di Wöutu fëën ta lei u. Aluwasi ee u ta libi a wan köndë ka de tapa di wooko fuu, tökuseei di dini di u ta dini Jehovah musu dë a di fosu kamian a di libi fuu. A di ten aki, möön leki 100 baaa ku sisa fuu dë a dunguwosu, u di de dë Jehovah Kotoigi hedi.c Tökuseei de ta dë waiwai ta begi, ta lei soni u Bëibel, söseei de ta konda soni u di Gadu fuu ku di Könuköndë fëën da sëmbë. Te sëmbë ta du ku u, nasö te de ta kuutu u, nöö u ta wai u di u sabi taa Jehovah dë ku u, söseei taa a o paka u.​—Jak. 1:12; 1 Pet. 4:14.

WAN WOTO U WAN SËMBË

14. Andi bi pasa ku wan njönku baaa di ta libi a Tajikistan, nöö faandi mbei sö wan soni miti ën?

¹⁴ Gaangaan soni bi miti so u dee baaa ku dee sisa fuu, ma tökuseei de bi ta dë waiwai, u di de bi du dee dii soni dee u bi taki soni u de. Boo luku di woto u wan baaa di de ta kai Jovidon Bobojonov di abi 19 jaa. Di baaa aki ta libi a di köndë de kai Tajikistan, nöö an bi kë go a sodati. A 4 u tinimu-liba u di jaa 2019, hën siköutu go nëën pisi go kisi ën tja go söötö a dunguwosu wantu liba longi, nöö de bi ta libi ku ën kuma a bi dë wan hogiduma. Sëmbë bi ta paaja di woto aki a teefei ku ladio a sömëni köndë. De bi taki taa de bi fon Baaa Jovidon, u di de bi kë duwengi ën faa soi taa a o go a sodati u feti da di köndë fëën, söseei u di de bi kë faa bisi dee soni di dee sodati ta bisi. Bakaten, de kuutu ën taa a du hogi, hën de mandëën go a wan sitaafuma kampu. A bi dë ala tefa di pelesidënti u di köndë taki taa de musu puu ën a dunguwosu. Hii di pisiten dë, Baaa Jovidon bi ta hoi hënseei a Jehovah, söseei a bi ta dë waiwai. Unfa a bi sa du dee soni aki? Wë hii juu a bi ta buta pakisei a soni u Jehovah.

15. Unfa Jovidon bi ta lei soni u Jehovah go dou, hii fa a bi dë a dunguwosu?

¹⁵ Di Jovidon bi dë a dunguwosu, a bi ta lei soni u Jehovah go dou, hii fa an bi abi Bëibel nasö dee woto buku fuu. Unfa a waka? Wë te dee baaa ku dee sisa u di köndë bi ta tja soni u njan go dëën, nöö de bi ta sikifi di daka wöutu a dee saku ka de bi lai dee soni u njan. A sö wan fasi a bi sa ta lesi di Bëibel, söseei a bi sa pakisei fundu u dee soni dee a bi ta lesi hiniwan daka. Baka di de puu ën a dunguwosu, hën a taki wan fanöudu soni di sa heepi sëmbë di an miti gaan tesi jeti. A bi taki taa: „A dë fanöudu fii tei di ten fii a di pisiten ka i sa dini Jehovah fiifii, fii ta lesi di Wöutu fëën ku dee woto buku fuu, sö taa i sa ko sabi Jehovah möön bunu.”

16. Na un soni Jovidon bi ta buta pakisei?

¹⁶ Jovidon bi ta libi ku dee wëti u Jehovah. An bi ta pakisei soni di an bunu, söseei an bi ta du soni di an bunu. Ma a bi ta buta pakisei a Jehovah ku dee soni dee Jehovah ta feni bunu. Jovidon bi lo’ u luku dee waitiwaiti soni dee Gadu mbei. Te a bi weki a mamate, nöö a bi ta jei fa dee fou ta kanda. A ndeti a bi ta luku di libawojo ku dee teeja. A bi taki taa: „Dee soni dee Jehovah mbei da u aki, bi ta mbei mi ta dë waiwai, söseei de bi ta da mi taanga.” Te u ta tei dee soni dee Gadu mbei u bigi, söseei te u ta tei dee lei u Bëibel u bigi, nöö woo ta dë waiwai, nöö di soni aki o heepi u fuu hoi dou.

17. Unfa dee soni dee sikifi a 1 Petuisi 1:6, 7 sa heepi wan sëmbë di miti dee seei fuka kuma dee bi miti Jovidon?

¹⁷ Jovidon bi buta di dini u Jehovah a di fosu kamian. A bi fusutan taa a bi dë fanöudu faa hoi hënseei a di tuutuu Gadu. Jesosi bi taki taa: „Masa Gadu wanwan tö i musu ta begi. Hën wanwan nöö i musu ta dini, biga hën nöö da i Masa” (Luk. 4:8). Dee hedima u dee sodati ku dee sodati seei, bi kë tapa Jovidon fu an dini Jehovah möön. Ma a bi begi Jehovah fajafaja ndeti ku didia. A bi ta hakisi Jehovah faa heepi ën faa sa ta dini ën go dou. Hii fa de bi du ku Jovidon, tökuseei nöiti a disa. Te u kaba fëën, a bi ta wai seei, u di a bi ko feni wan soni di an bi abi ufö hii dee soni dë bi miti ën. Dee fuka dee bi miti ën, bi mbei di biibi fëën ko möön taanga.​—Lesi 1 Petuisi 1:6, 7.

18. Andi u sa du fuu sa ta dë waiwai go dou?

¹⁸ Jehovah sabi andi u abi fanöudu fuu sa ta dë waiwai tuutuu. Ee i du dee dii soni di sa heepi i fii ta dë waiwai, nöö joo ta dë waiwai, hii fa fuka ta miti i. Boiti di dë, joo sa taki tu taa: „Dee sëmbë dee abi Jehovah kuma Gadu u de, dë bunu!”​—Ps. 144:15.