I ta feni gaan bunu te i ta booko i hedi ku wotowan

Mi tata bi dë wan fesima u di United keiki u Kanada, nöö hii wiki a bi ta manda mi ku mi piki sisa go a di siköö di di keiki bi ta hoi da dee piki mii a sonde mamate. Baka di dë, nöö u ku ën bi nango a keiki a 11 juu mamate. Nöö sapate u ku u mama bi nango a komakandi. An bi taanga da u fuu si di tooka u dee tu keiki aki.

Mi mama bi konda dee soni dee a bi lei a Bëibel da tu gaan mati fëën, Bob Hutcheson ku hën mujëë Marion. Deseei bi ko toon Jehovah Kotoigi tu. A di jaa 1958 hën baaa Hutcheson ku hën mujëë bi tja mi ku dee dii womi mii u de go a di Divine Will könklësi di bi hoi aiti daka longi a di foto New York. Mi ko fusutan taa an bi dë wan kösökösö soni da de u de bi sa tja mi. Di komakandi dë da wan u dee soni di ma o sa fëëkëtë nöiti.

DEE BAAA KU DEE SISA BI HEEPI MI U MI DU MÖÖN DA JEHOVAH

Di mi bi möön njönku, nöö u bi ta libi a wan kamian ka de bi ta kiija mbeti. Mi bi lo’ u sölugu dee mbeti seei. Fëën mbei mi bi kë ko toon wan data di ta kula mbeti. Mi mama bi konda di soni dë da wan gaanwomi u di kemeente. Di gaanwomi dë bi toona mëni mi taa u ta libi „a dee lasiti daka”, söseei a bi hakisi mi ee unfa mi si kuma di biibi u mi o ko dë, baka te mi pasa wantu jaa a wan hei siköö (2 Tim. 3:1). Te u kaba fëën, hën mi bi buta taa ma o go a hei siköö möön.

Ma bi kaba sabi andi mi bi musu du di mi bi kaba siköö. Hii fa mi bi nango hiniwan sata ku sonde a di peleikiwooko, tökuseei an bi ta suti da mi u dini Jehovah. Boiti di dë, mi bi ta si kuma nöiti mi bi o sa du di pioniliwooko. A di pisiten dë, mi tata ku mi tio bi ta da mi taanga u mi wooko da wan gaan masikapei di dë a Toronto, nöö mi bi tei di wooko u di mi tio bi dë wan u dee heihei sëmbë u di masikapei.

Mi bi ta wooko pasa juu, söseei mi bi ta hulu sëmbë di an bi ta dini Jehovah. Dee soni dë bi mbei taa ma bi sa nango hii juu a dee komakandi, ku di peleikiwooko. Bigibigi, mi ku wan avo u mi di an bi dë Kotoigi hën bi ta libi a wan wosu. Ma baka di a ko lasi libi, nöö mi bi abi u suku wan woto kamian u libi.

Baaa Hutcheson ku hën mujëë bi dë kuma mi mama ku mi tata. De hën bi tja mi go a di könklësi u di jaa 1958. De bi kai mi u mi ko libi ku de a wan wosu, söseei de bi heepi mi u mi ku Jehovah ko dë möön gaan mati. Mi ku di womi mii u de di de kai John, bi dopu a di jaa 1960. John bi bigi du di pioniliwooko, nöö di soni dë bi da mi taanga u mi ta peleiki möön gaanfa. Di dee baaa u di kemeente bi si taa mi bi nango a fesi a di biibi, hën de da mi di faantiwöutu u ta heepi dee sëmbë dee ta hoi taki a di Teokalasia-siköö.a

MI FENI WAN BUMBUU MUJËË, HËN MI BIGI DU DI PIONILIWOOKO

A di jaa 1966, hën mi tööu ku wan sisa de kai Randi Berge. A bi ta du di pioniliwooko fajafaja, söseei a bi dë kabakaba u go heepi ka peleikima möön dë fanöudu. Di keling-gaanwomi fuu bi buta pakisei a u, nöö a bi da u taanga fuu go heepi di gemeente di dë a di foto de kai Orillia, di dë a Ontario. Di a piki u sö, hën u foloisi wantewante.

Di u dou a Orillia hën mi bigi du di kowoonu pioniliwooko makandi ku Randi. Mi bi dë seei fajafaja kuma ën! Di mi bi bigi du di pioniliwooko ku hii mi hati, hën mi ko si fa sëmbë ta tei di tuutuu lei. Di soni dë bi ta da mi piizii seei. U wai seei taa u bi sa heepi wan womi ku hën mujëë u de tooka soni a di libi u de, sö taa de bi sa toon dinima u Jehovah.

U LEI WAN NJUNJUN TÖNGÖ, HËN U TOOKA DI FASI FA U BI TA SI SONI

Di u bi go luku di foto de kai Toronto, hën u bi miti wan baaa de kai Arnold MacNamara. A bi dë wan u dee baaa di ta tei fesi a Bëtëli. A bi hakisi u ee u kë du di apaiti pioniliwooko. Wantewante dë mi piki ën taa: „Aai u kë! U kë go du ën a hiniwan kamian, boiti Kibëk!” Dee sëmbë dee bi ta libi a di pisiwata u Kanada ka de ta fan Ingisitöngö, an bi ta si dee sëmbë dee bi ta libi a di pisiwata u Kibëk ka de ta fan Faansitöngö kuma bumbuu sëmbë. Nöö miseei bi ko ta si soni sö tu. A di ten dë sëmbë bi ta waka a sitaati ta fia ku lanti, u de mbei Kibëk kumutu a Kanada basu.

Arnold bi taki taa: „Kibëk da di wan kodo kamian ka di bëikantoo ta manda sëmbë go u du di apaiti pioniliwooko a di ten aki.” Mi bi piki wantewante dë taa u dë kabakaba u go. Mi bi sabi kaa taa Randi bi kë go ala. Bakaten mi ko si taa di soni dë, bi dë wan u dee möön bunu soni di u du a u libi!

Baka di u kumutu a wan kalasi ka u bi lei u fan Faansitöngö feifi wiki longi, hën u ku wan woto baaa ku hën mujëë foloisi go a di foto de kai Rimouski, di dë söwan 540 kilomëti longi ku di foto Montreal. Di mi bi ta piki di kemeente wantu soni di de musu sabi, hën u ko fusutan taa u musu lei u fan Faansitöngö möön bunu. Mi bi taki taa a di könklësi di ta ko, woo abi sömëni sëmbë di o kumutu a „ostrich”, hii fa mi bi musu taki taa de o kumutu a „Oostenrijk”.

Di u bi dë a Rimouski, hën de manda fö sisa ko ka u bi dë. Dee sisa aki bi ta dini Jehovah fajafaja, nöö de an bi tööu. Boiti di dë, de bi manda baaa Huberdeau ku hën mujëë, ku dee tu mujëë mii u de ko tu. De bi ta libi a wan juu wosu di bi abi seibi duumi kamba, nöö dee baaa ku dee sisa dee bi ta du di pioniliwooko dee bi ta libi ku de, bi ta heepi de paka di wosu. U bi ta kai ën di weti wosu, u di di wosu bi weti. Möön gaanfa, dee sëmbë dee bi ta libi a di wosu aki bi dë söwan 12 te go miti 14 sëmbë. Mi ku Randi bi ta peleiki hii daka, nöö u bi ta wai seei taa u bi sa ta feni sëmbë u peleiki makandi ku u, aluwasi ee kamian bi ta kötö.

U ku dee baaa ku dee sisa dë bi libi makandi seei te de ko dë kuma famii fuu. So juu u bi ta sindo a faja bandja makandi, nasö u bi ta boi soni njan makandi. Wan u dee baaa bi dë pokuma, nöö dee sata ndeti u bi ta lo’ u kanda baja.

Sömëni u dee sëmbë u Rimouski bi ta kë lei soni u Bëibel! A feifi jaa dendu u bi si fa sömëni sëmbë bi go a fesi a di biibi fu te de dopu. Di gemeente bi go a fesi fu te a dou 35 peleikima.

A Kibëk, u lei sömëni soni di heepi u fuu ko dë möön bunu peleikima. U bi si fa Jehovah bi heepi u a di peleikiwooko, söseei u bi ta si fa a bi ta heepi u ku dee soni dee u bi abi fanöudu. Boiti di dë, u bi ko lobi dee sëmbë dee ta fan Faansitöngö, u bi ko lobi di töngö u de, söseei u bi ko lobi dee guwenti u de tu. Di soni aki bi heepi u fuu ko lobi woto pei sëmbë tu.​—2 Kol. 6:13.

Söndö fuu mëni, hën dee baaa u di bëikantoo hakisi u fuu foloisi go a di foto Tracadie. Di soni dë an bi dë wan kösökösö soni da u, u di an bi longi sö jeti di u bi teeken wan pampia ku wan sëmbë di bi o juu wan wosu da u. Söseei mi bi feni wan piki wooko ka mi bi dë mësitë a wan siköö. Boiti di dë, so u dee sëmbë dee u bi ta lei soni u Bëibel bi ko toon peleikima a dee pisiten dë, söseei u bi ta mbei wan njunjun Könuköndë zali tu.

Hii di sata ku di sonde dë tuu u bi puu ta begi, u di go di u bi musu go a Tracadie, söseei u di go di u bi musu go luku fa di foto dë. A bi tooka seei ku Rimouski. Ma u bi buta taa ee Jehovah kë fuu go ala, nöö woo go. U bi pooba Jehovah luku, hën u si fa a jabi pasi da u (Mal. 3:10). A bi ta möön kösökösö da u fuu foloisi, u di Randi bi abi wan taanga biibi, u di an bi abi gaanfasi, söseei u di an bi ta booko hën hedi ku soni.

Baaa Robert Ross bi dë di wan kodo gaanwomi di bi dë a di gemeente ka u bi go. Hën ku hën mujëë Linda bi ta du di pioniliwooko makandi. Baka di de pai di fosu mii u de, hën de buta taa de o fika libi a di foto dë. Hii fa de bi abi wan mii ta kiija, tökuseei de bi tei u ku wai, söseei de bi ta du di peleikiwooko fajafaja. Di fasi fa de bi ta du soni bi da u taanga seei.

U BI FENI GAAN BUNU U DI U BI NANGO HEEPI A HINIWAN KAMIAN KA HEEPI BI DË FANOUDU

Baka di u du di pioniliwooko a Tracadie tu jaa longi, hën dee baaa toona hakisi u fuu du wan soni di wa bi mëni. De bi hakisi u fuu du di keling- wooko. U bi du ën seibi jaa longi, nöö u bi nango luku dee kemeente ka de bi ta fan Ingisitöngö. Baka di dë, hën de manda u go a Kibëk fuu go luku dee kemeente ka de ta fan Faansitöngö. Baaa Léonce Crépeault bi dë di pisiwata-gaanwomi fuu a Kibëk. Baka te mi bi hoi wan taki, nöö a bi ta gafa mi, nöö a bi ta hakisi mi taa: „Unfa i sa hoi dee taki fii a sö wan fasi taa a sa da sëmbë taanga u de hopo du wan soni?”b Di soni dë bi da mi taanga u mi ta hoi dee taki u mi a sö wan fasi taa de sa dou hii sëmbë hati.

A di jaa 1978, de bi da mi wan wooko di ma sa fëëkëtë nöiti. A bi dë a di gaan könklësi di bi hoi a Montreal. Di në u di könklësi dë bi dë „Victorious Faith”, nöö mi bi musu heepi boi soni da söwan 80.000 sëmbë dee bi o ko. Boiti di dë, u bi abi u seeka njanjan da de a wan hii woto fasi di wa bi guwenti. Dee soni dee u bi musu boi seei bi dë soni di wa bi guwenti u boi. U bi abi söwan 20 gaan ëisikasi, ma so juu de an bi ta wooko. Di daka ufö di könklësi bigi, hën u bi mbei möiti u go seeka soni a fesi, ma a di gaan ndeti ufö u bi sa denda go a dendu, u di de bi ta du wan sport a di bali goon ka u bi o hoi di könklësi. Nöö u bi musu sëndë dee onfu fuu jasa bëë ufö sonu jabi! U bi wei seei, ma mi bi lei sömëni soni a dee baaa ku dee sisa dee mi bi wooko makandi ku de. De bi ta wooko taanga, de bi sa’ u hoi de seei, söseei de bi sa’ u mbei sipoutu. Te kuma tide, u ku de dë mati jeti. U ta wai seei taa u bi dë a di könklësi dë. A bi dë wan apaiti wan. Kibëk bi dë wan u dee pisiwata ka sëmbë bi möön du ku u a dee pisiten u dee jaa 1940 te go miti 1950.

Mi lei sömëni soni u dee woto baaa dee bi ta tei fesi a dee könklësi dee u bi ta hoi a Montreal. Wan u dee jaa, baaa David Splane, hën bi dë di fesima u di könklësi. Nöunöu, a dë wan baaa u di Tii Kulupu. Bakaten, de bi hakisi mi u mi dë fesima a wan u dee könklësi, nöö David bi dë kabakaba seei u heepi mi.

A di jaa 2011, hën de da mi di wooko u mi ta lei dee gaanwomi soni a di Gaanwomi-siköö. Mi ku Randi bi du di keling-wooko 36 jaa longi, nöö u bi duumi a 75 tookatooka bedi a tu jaa dendu. Hii fa soni bi dë sö, tökuseei wa bai sabisö. Dee gaanwomi bi ta dë waiwai seei a kaba u hiniwan wiki, u di de bi ta si fa dee baaa u di Tii Kulupu bi ta booko de hedi ku de.

Bakaten, mi bi ko ta lei dee baaa ku dee sisa soni a di Siköö da Könuköndë Peleikima. De bi ta booko de hedi gaanfa seei, söseei de bi ta dë weiwei, u di de bi ta dë sindosindo a kalasi söwan seibi juu longi hiniwan daka. Boiti di dë, hiniwan sapate de bi ta tei dii juu longi u de du dee wooko di de bi da de, söseei de bi musu ta seeka fö nasö feifi soni di de bi musu du a kalasi a di wiki dendu. Mi ku dee woto baaa dee bi ta lei de soni, bi piki de taa de an o sa du hii dee soni dë ee Jehovah an dë ku de. A bi ta bigi da de, di de bi ko si taa de bi sa du sömëni soni di de an bi mëni, u di de bi ta buta hii soni a Jehovah maun. Nöiti mi o fëëkëtë di fasi fa de bi ta fii.

I TA FENI GAAN BUNU TE I TA BOOKO I HEDI KU WOTOWAN

Di booko di mi mama bi ta booko hën hedi ku wotowan bi heepi dee sëmbë dee a bi ta lei soni u Bëibel u de go a fesi a di biibi. Söseei di soni dë bi heepi mi tata faa ko ta si di tuutuu lei a wan möön bunu fasi. A bi bigi da u seei taa dii daka baka di mama lasi libi, hën a ko haika wan taki a di Könuköndë zali. Baka di dë, hën a nango a dee komakandi fu te hënseei ko lasi libi. A bi du di soni dë 26 jaa longi. Ma hii fa mi tata an bi dopu möönsö, tökuseei dee gaanwomi bi piki mi taa hii juu a bi ta dë di fosu sëmbë di bi ta dou a dee komakandi.

Mi mama bi dë wan sëmbë di mi ku dee sisa u mi bi sa djeesi. De ku dee manu u de tuu ta dini Jehovah ku hii de hati. Tu u dee sisa u mi ta wooko a di bëikantoo u Potigeköndë, nöö wan wotowan ta wooko a di u Haiti.

Nöunöu mi ku Randi ta du di apaiti pioniliwooko a di foto de kai Hamilton, a Ontario. Di u bi ta du di keling-wooko, nöö u bi ta wai seei, te u bi nango ku dee wotowan a dee gobaka u de, ku dee sëmbë dee de bi ta lei soni u Bëibel. Nöunöu u ta wai gaanfa seei te u si fa dee sëmbë dee useei ta lei soni u Bëibel nango a fesi a di biibi. Boiti di dë, möön u bi ta ko dë mati ku dee baaa ku dee sisa, möön u bi ta feni taanga te u bi ta si fa Jehovah bi ta heepi de, aluwasi ee soni nango bunu da de, nasö aluwasi ee soni a nango bunu.

Te u ta pakisei di fasi fa di libi fuu waka, nöö u ta tei ën u bigi seei taa dee wotowan bi ta booko de hedi ku u. Fëën mbei useei ta mbei möiti u lei taa u ta „booko u hedi tuutuu” ku wotowan. U ta da de taanga u de dini Jehovah ku hii de hati (2 Kol. 7:6, 7). Dii sëmbë u di wosudendu u wan baaa bi ta du di hii-ten diniwooko. Fëën mbei mi bi hakisi ën ee a bi pakisei u du di pioniliwooko tu. A bi piki mi taa a ta heepi dee sëmbë fëën kaa. Di a taki sö, hën mi hakisi ën taa: „I si kuma i sa heepi de möön Jehovah u?” Mi bi dëën taanga faa du di pioniliwooko luku, sö taa hënseei bi sa fii di suti fëën tu. Baka sikisi liba hën a bigi du di pioniliwooko.

Mi ku Randi o „konda dee foombo soni” dee Jehovah du, „da dee bakamii dee dë u ko jeti”, nöö woo wai seei ee de ko lo’ u dini Jehovah kuma u.​—Ps. 71:17, 18.