Lei taa i ta tei ën u bigi taa Gadu da u „womi di abi apaiti köni”

1. Andi da so u dee soni dee Jesosi da u?

SËMBË an dë di heepi wotowan kuma Jesosi. Di Jesosi bi dë a goonliba aki, nöö a bi lo’ u wooko ku di kaakiti di a bi abi u heepi sëmbë (Luk. 9:12-17). A da u di möön gaan soni di sëmbë bi sa da wotowan. A da u di libi fëën (Joh. 15:13). Di a weki ko a libi baka, a bi ta heepi sëmbë go dou. A bi hakisi Jehovah faa da u di santa jeje fëën u lei u soni, söseei u da u kötöhati, leti kumafa a bi paamusi u (Joh. 14:16, 17; 16:13). Jesosi ta tei dee komakandi fuu tu, u heepi u go dou fuu sa ko sabi unfa u sa heepi sëmbë a hii së u goonliba, u de ko dë bakama fëën.​—Mat. 28:18-20.

2. Ambë da wantu u dee „womi di abi apaiti köni”, dee Efeise 4:7, 8 ta taki soni u de?

² Boo buta pakisei a wan woto soni di Jesosi da u. Apösutu Paulosu bi taki taa baka di Jesosi go a liba ala, a bi da u „womi di abi apaiti köni”. (Lesi Efeise 4:7, 8.) Paulosu bi taki taa Jesosi bi da di kemeente dee womi aki, u di kemeente sa feni heepi a de (Ef. 1:22, 23; 4:11-13). Dee „womi” aki da dee dinai, dee gaanwomi u kemeente, ku dee keling-gaanwomi.a Wë an dë u taki taa dee womi aki ta mbei föutu, u di de da zöndu libisëmbë (Jak. 3:2). Ma Jesosi Keesitu, di Masa fuu, ta tei de u heepi u. De dë kuma wan apaiti gudu di a da u.

3. Konda unfa hiniwan fuu sa heepi dee „womi di abi apaiti köni”, ku di wooko di de ta du?

³ Jesosi bi da dee „womi di abi apaiti köni” di wooko u heepi di kemeente (Ef. 4:12). Ma useei sa heepi de u de sa du di gaan wooko aki. Buta pakisei a di woto aki. So fuu ta heepi mbei Könuköndë zali. Wotowan ta heepi sö taa di wooko sa go a fesi a peipei fasi. De ta tja soni u njan ku woto soni go da dee wookoma, nasö de ta heepi de a woto fasi. Wë sö nöö a dë taa hiniwan fuu sa heepi dee dinai, dee gaanwomi u kemeente, ku dee keling-gaanwomi, ku dee soni dee u ta du, söseei dee soni dee u ta taki. Boo luku unfa u ta feni wini u di taanga wooko di dee „womi di abi apaiti köni” aki ta du, söseei boo luku unfa u sa lei de ku Jesosi taa u ta tei dee soni di de ta du u bigi.

DEE DINAI TA „HEEPI OTOWAN A SÖMËNI FASI”

4. Andi da so u dee wooko di dee dinai bi ta du u „heepi otowan” na awooten?

⁴ Na awooten de bi ta buta so baaa ko dë dinai (1 Tim. 3:8). A djei kuma dee baaa dë, de bi ta „heepi otowan” a dee fasi dee Paulosu bi taki a 1 Kolenti 12:28. Dee dinai bi ta du so wooko di bi dë fanöudu, sö taa dee gaanwomi bi sa möön buta pakisei a di luku di de musu ta luku dee sëmbë u Gadu, ta lei de soni. A kan taa dee dinai bi ta heepi ta sikifi di Wöutu u Gadu buta go a woto pampia, nasö a kan taa de bi ta heepi ta suku dee soni dee bi dë fanöudu u du di wooko dë.

5. Andi da so u dee fanöudu wooko di dee dinai ta du a di ten fuu aki?

⁵ Buta pakisei a so u dee fanöudu wooko di dee dinai ta du a di kemeente ka i dë (1 Pet. 4:10). A kan taa de hakisi de u de ta luku dee peleikiwooko kaita, nasö dee möni pampia u di kemeente. Nasö kandë de hakisi de u de ta manda tei buku da dee peleikima, u de ta pëë poku ku fëlön a zali, u de ta heepi ta seeka di Könuköndë zali, nasö u de du zaliwakitima wooko. De musu ta du hii dee wooko aki u soni sa ta waka bunu a di kemeente (1 Kol. 14:40). Boiti di dë, so dinai ta hoi taki a Di libi ku di diniwooko fuu komakandi, söseei a dee komakandi dee u ta hoi a sata nasö sonde. De sa hakisi wan dinai tu faa heepi di baaa di ta tei fesi a wan peleikiwooko kulupu. So juu dee gaanwomi sa hakisi dee dinai u de go ku de go da wan baaa nasö wan sisa taanga.

6. Faandi mbei u ta wai ku di taanga wooko di dee dinai ta du?

⁶ Unfa di kemeente ta feni wini u di wooko di dee dinai ta du? Wan sisa de kai Beberlyb, di ta dë a di köndë de kai Bolifia, bi taki taa: „U di u abi dinai a di kemeente, mbei mi ta feni wini u dee komakandi seei. Di wooko di de ta du ta mbei taa mi sa ta kanda a komakandi, ta da piki, ta haika dee taki di dee baaa ta hoi, söseei mi sa ta lei soni a dee fëlön ku dee peentje a komakandi. De ta heepi u sö taa sëmbë an feni pasi ko du hogi ku u te u dë a komakandi. Söseei de ta buta pakisei a dee sëmbë dee ta ko a komakandi a Internet. Te di komakandi kaba, nöö de ta tei fesi a di seeka di u ta seeka di zali, de ta heepi seeka möni soni u di kemeente, söseei de ta seeka soni fuu sa feni dee buku dee u abi fanöudu. Mi ta wai seei taa u abi dee baaa aki!” Wan sisa de kai Leslie ta libi a di köndë de kai Kolombia, nöö hën manu dë gaanwomi. Di sisa aki bi taki taa: „Mi manu abi dee dinai fanöudu, u de sa ta heepi ta du tookatooka wooko a di kemeente. Ee wa bi abi dee baaa aki, nöö mi manu bi o ta abi möön hia soni u du. Fëën mbei mi ta tei ën u bigi seei taa dee baaa aki ta dë kabakaba u heepi ku dee wooko dee ta dë u du a di kemeente.” Wë a musu u dë sö taa iseei ta wai ku di wooko di dee baaa aki ta du tu.​—1 Tim. 3:13.

7. Unfa u sa lei taa u ta tei di wooko di dee dinai ta du u bigi? (Luku di peentje tu.)

⁷ Hii fa a sa dë taa u ta tei dee wooko di dee dinai ta du u bigi, tökuseei di Bëibel ta piki u taa: „Un lei taa un ta tei soni u bigi” (Kol. 3:15). Kristof da wan gaanwomi di ta libi a di köndë de kai Finland. A bi taki andi a ta du u lei taa a ta tei di wooko di dee dinai ta du u bigi. A bi taki taa: „Mi lo’ u sikifi soni manda da dee dinai. Te mi sikifi wan soni manda da wan u de, nöö mi ta buta wan Bëibel tëkisi a di bosikopu. Söseei mi ta taki u wan fasi fa di dinai bi da mi taanga, nasö mi ta taki faandi mbei mi ta tei di wooko di a ta du u bigi.” Pascal ku Jael ta libi a New Caledonia, nöö de lo’ u begi da dee dinai. Pascal bi taki taa: „Dee daka dee pasa aki, u bi ta begi gaanfa seei da dee dinai u di kemeente ka u dë.” Jehovah ta haika dee lö begi dë, nöö hii di kemeente ta feni wini fëën.​—2 Kol. 1:11.

DEE GAANWOMI U KEMEENTE „TA WOOKO TAANGA”

8. Faandi mbei Paulosu bi sa taki taa dee gaanwomi fu awooten bi „ta wooko taanga”? (1 Tesalonika 5:12, 13)

⁸ Dee gaanwomi u kemeente fu awooten bi ta wooko taanga. (Lesi 1 Tesalonika 5:12, 13; 1 Tim. 5:17) De bi ta „tii” di kemeente, ta hoi komakandi, söseei de bi ta taki unfa soni bi musu waka. De bi ta „leti dee baaa ku dee sisa u de buta a pasi” ku lobi, sö taa de bi sa sabi unfa de musu libi a Gadu wojo (1 Tes. 2:11, 12; 2 Tim. 4:2). Ma dee womi aki bi ta wooko taanga tu u de bi sa ta sölugu dee sëmbë u de wosudendu, söseei u de bi sa ta abi wan taanga biibi go dou.​—1 Tim. 3:2, 4; Tit. 1:6-9.

9. Andi da so u dee wooko di dee gaanwomi ta du a di ten aki?

⁹ Dee gaanwomi ta abi hia soni u du a di ten aki. De ta du di peleikiwooko (2 Tim. 4:5). De ta tei fesi fajafaja a di peleikiwooko, ta seeka soni fuu sa ta peleiki a di pisiwata ka di kemeente musu peleiki, söseei de ta heepi u fuu sa ta peleiki ta lei sëmbë soni a wan bunu fasi. Dee gaanwomi ta kuutu soni tu. Te de ta du di soni aki, nöö de ta lei taa de abi tjalihati u sëmbë, söseei taa de an lobi wan sëmbë möön wan wotowan. Te wan Keesitu sëmbë du wan gaan zöndu, nöö dee gaanwomi ta mbei möiti u heepi ën fu hën ku Jehovah sa ko dë mati baka. Ma de ta mbei möiti tu u di kemeente sa ta dë limbolimbo a Gadu wojo (1 Kol. 5:12, 13; Gal. 6:1). Di möön gaan soni, hën da dee gaanwomi dë kuma sëmbë di ta kiija sikapu (1 Pet. 5:1-3). De ta wooko ku di Bëibel u hoi taki, de ta mbei möiti u de ko sabi hii sëmbë a di kemeente, söseei de nango ta luku dee baaa ku dee sisa u da de taanga. So gaanwomi ta heepi mbei Könuköndë zali, söseei de ta seeka de u de an booko. De ta heepi seeka könklësi soni, de ta heepi a di Hatiwosu Komite, nasö de nango ta luku wotowan a hatiwosu, söseei de ta du woto soni tu. Dee gaanwomi ta wooko taanga da u seei!

10. Faandi mbei u ta tei di wooko di dee gaanwomi ta du u bigi?

¹⁰ Jehovah bi taki a fesi taa a bi o buta sëmbë ta luku u a wan bunu fasi, nöö wa bi o ta „fëëë möön”, söseei wa bi o ta „dë pantapanta” möön (Jel. 23:4). Wan sisa u Finland de kai Johanna, bi si taa sö di soni aki bi dë tuu di hën mama bi suwaki gaanfa seei. A bi taki taa: „A bi ta taanga da mi u mi konda da wotowan unfa mi ta fii. Ma wan gaanwomi di ma bi sabi sö bunu bi haika mi ku pasensi. A bi begi makandi ku mi, söseei a bi mbei mi ko si taa Jehovah lobi mi tuutuu. Ma sa mëni andi a bi taki möön, ma mi sa mëni jeti taa mi bi fii bunu. Mi ta biibi taa Jehovah bi mandëën ko heepi mi a di soifi ten.” Unfa dee gaanwomi u di kemeente ka i dë bi heepi i?

11. Unfa u sa lei taa u ta wai ku dee gaanwomi? (Luku di peentje tu.)

¹¹ Jehovah kë fuu ta lei dee gaanwomi taa u ta wai ku de ’fu di wooko de ta du hedi’ (1 Tes. 5:12, 13). Wan woto sisa u Finland de kai Henrietta, bi taki taa: „Dee gaanwomi lo’ u heepi wotowan, ma di soni dë an kë taki taa de abi ten ku kaakiti pasa maaka, nasö taa de an ta abi bookohedi. So juu mi ta piki de taa: ’Mi kë piki i taa i da wan bunu gaanwomi. I ta du di wooko fii bunu seei.’” Wan sisa de kai Sera, di ta dë a Tolukuköndë, bi taki taa: „Dee gaanwomi abi taanga fanöudu, u du di wooko u de go dou. Fëën mbei u sa sikifi wan biifi manda da de, u sa kai de ko njan a u pisi, söseei u sa peleiki makandi ku de.” Ee i sabi wan gaanwomi di i ta wai seei ku di wooko di a ta du, nöö i sa suku fasi u lei ën taa i ta tei dee soni dee a ta du u bigi.​—1 Kol. 16:18.

DEE KELING-GAANWOMI TA DA WOTOWAN TAANGA

12. Un woto kulupu womi Jesosi bi buta u da dee kemeente taanga na awooten? (1 Tesalonika 2:7, 8)

¹² Jesosi Keesitu da dee kemeente „womi di abi apaiti köni” di ta du woto wooko tu. A bi mbei dee gaanwomi u Jelusalen manda Paulosu, Banabasi, ku woto baaa jeti u de du di keling-wooko (Tjab. 11:22). Wë faandi mbei? Wë u di seei soni mbei de bi buta dinai ku gaanwomi a dee kemeente: u da dee kemeente taanga (Tjab. 15:40, 41). Dee womi aki ta disa so soni di de lobi, u de sa ta lei wotowan soni, söseei u de sa ta da de taanga, hii fa so juu de bi sa lasi de libi.​—Lesi 1 Tesalonika 2:7, 8.

13. Andi da so u dee wooko di dee keling-gaanwomi ta du?

¹³ Dee keling-gaanwomi nango ta luku tookatooka kemeente. So u de ta waka höndöhöndö kilomëti longi u go a wan woto kemeente. Hiniwan wiki wan keling-gaanwomi ta hoi taki, ta hoi peleikiwooko komakandi, ta hoi pionili komakandi, ta hoi gaanwomi komakandi, söseei a nango ta luku dee baaa ku dee sisa u da de taanga. Boiti di dë, a ta seeka taki di a musu hoi, söseei a ta seeka keling komakandi, ku könklësi. A ta lei sëmbë soni a pionili siköö, a ta seeka soni sö taa a sa ko makandi ku dee sëmbë dee ta du di pioniliwooko a di keling ka a dë. Nöö so juu a ta du gaan fanöudu soni di di bëikantoo ta hakisi ën faa du.

14. Faandi mbei u ta tei di wooko di dee keling-gaanwomi ta du u bigi?

¹⁴ Unfa dee kemeente ta feni wini u di gaan wooko di dee keling-gaanwomi ta du? Wan baaa di ta libi a Tolukuköndë, bi taki taa: „Solanga dee keling-gaanwomi ko luku di kemeente fuu, mi ta feni taanga u mi ta möön dë makandi ku dee baaa ku dee sisa u mi. Mi miti sömëni keling-gaanwomi, ma nöiti de bi mbei mi fii kuma de an bi abi ten u fan ku mi.” Johanna di u bi taki soni fëën a fesi kaa, bi peleiki makandi ku wan keling-gaanwomi, ma de an bi miti na wan sëmbë a wosu. A bi taki taa: „Hii fa wa bi miti na wan sëmbë, tökuseei ma o fëëkëtë di daka dë nöiti. Dee tu sisa u mi tuu bi foloisi go a woto kamian, nöö mi bi ta hangi de seei. Ma di keling-gaanwomi bi da mi taanga. A bi heepi mi u mi ko fusutan taa kandë wa o sa dë makandi ku dee famii fuu kumafa u bi o kë a di ten aki, ma a di njunjun goonliba woo abi di okasi u dë makandi ku de u teego.” Sömëni fuu ta wai seei ku dee keling-gaanwomi, söseei ku di fasi fa de bi heepi u.​—Tjab. 20:37–21:1.

15. (a) Unfa u sa lei taa u ta tei di wooko di dee keling-gaanwomi ta du u bigi, te u luku 3 Johanisi 5-8? (Luku di peentje tu.) (b) Faandi mbei u musu lei taa u ta wai ku dee mujëë u dee baaa dee abi faantiwöutu a di kemeente, nöö unfa u sa du ën? (Luku di pisi „Buta pakisei a dee mujëë u de”.)

¹⁵ Apösutu Johanisi bi da Gajusi taanga faa ta tei dee baaa dee ta ko luku di kemeente ku wai, söseei faa ta „libi bunu ku de” kumafa a fiti a Gadu wojo. (Lesi 3 Johanisi 5-8.) Wan fasi fa u sa du di soni dë, hën da te u ta kai di keling-gaanwomi faa ko njan a u pisi. Wan woto fasi fa u sa du ën, hën da te u nango a dee peleikiwooko komakandi dee a ta hoi te a ko. Leslie di u bi taki soni fëën a fesi kaa, bi du woto soni tu u lei taa a ta wai ku di wooko di dee keling-gaanwomi ta du. A bi taki taa: „Mi ta begi Jehovah faa da de dee soni dee de abi fanöudu. Mi ku mi manu bi sikifi biifi da de tu u piki de unfa u bi feni wini tjika di de bi ko luku u.” Hoi a pakisei taa dee keling-gaanwomi an abi wan apaiti kaakiti. So juu de ta dë ku suwaki, de ta abi bookohedi, söseei de ta lasi hati tu. Wë i sa fan a wan suti fasi ku di keling-gaanwomi di ta ko luku unu, nasö i sa dëën wan piki kado. A sa kan taa di baaa aki bi begi suku heepi a Jehovah, nöö Jehovah sa tei di soni dë u piki di begi fëën.​—Nöng. 12:25.

U ABI DEE „WOMI DI ABI APAITI KÖNI” FANÖUDU

16. Andi so baaa sa hakisi deseei te u luku Nöngö 3:27?

¹⁶ A hii së u goonliba u abi möön „womi di abi apaiti köni” fanöudu. Ee i da wan baaa di dopu, nöö i sa mbei möiti u ko dë wan u dee womi aki. (Lesi Nöngö 3:27.) I bi o kë mbei möiti u ko dë dinai ö? Ee i dë dinai kaa, nöö i bi o kë mbei möiti u ko dë gaanwomi ö?c I bi o sa tooka soni a di libi fii sö taa i sa go a di Siköö da Könuköndë Peleikima u? Di siköö aki o heepi i u Jesosi sa möön tei i fii wooko dëën. Ee i ta fii kuma ja sa du dee soni dë, nöö begi Jehovah be a heepi i. Hakisi ën faa da i di santa jeje fëën faa heepi i fii sa du hiniwan wooko di de da i fii du.​—Luk. 11:13; Tjab. 20:28.

17. Andi u ta lei u di Könu fuu Jesosi Keesitu, te u ta buta pakisei a dee „womi di abi apaiti köni” dee a da u?

¹⁷ U ta si gbelingbelin taa Jesosi ta tii u a dee lasiti daka aki, te u ta buta pakisei a dee womi dee „abi apaiti köni” dee a da u (Mat. 28:20). Ja ta wai taa u abi wan Könu di lobi u, di lo’ u da sëmbë soni, di ta buta mëni a sëmbë, söseei di ta buta baaa di taanga a di biibi u de ta heepi u ö? Wë, nöö suku fasi fa i sa lei taa i ta tei di wooko di dee womi aki ta du u bigi. Söseei na ta fëëkëtë u da Jehovah tangi, u di nëën hii bunu soni ta kumutu.​—Jak. 1:17.