Un dee baaa, un ta mbei möiti u ko toon gaanwomi ö?

1-2. Andi wan gaanwomi musu ta du?

EE I dë dinai wan pisiten kaa, nöö a musu u dë taa i bi mbei taanga möiti u ko abi sömëni bunu fasi. Nöö dee fasi dë seei o heepi i fii sa toon gaanwomi. I bi o kë du di „gaan bumbuu wooko” dë u?​—1 Tim. 3:1.

² Andi da dee soni dee wan gaanwomi musu ta du? Wan gaanwomi ta tei fesi a di peleikiwooko, a ta mbei möiti u ta lei dee baaa ku dee sisa soni u Bëibel, söseei a ta mbei möiti u da de taanga. Di fasi fa a ta fan, ku di fasi fa a ta du soni, ta heepi dee baaa ku dee sisa u di kemeente u de go a fesi a di biibi. Na u sösö di Bëibel ta kai dee gaanwomi u kemeente „womi di abi apaiti köni”.​—Ef. 4:8.

3. Andi wan baaa sa du faa sa toon wan gaanwomi? (1 Timoteo 3:1-7; Titusi 1:5-9)

³ Andi i sa du fii sa toon wan gaanwomi? Na dee soni dee wan sëmbë sa’ u du nöö dë fanöudu faa sa ko toon wan gaanwomi u kemeente. Möön gaanfa te wan sëmbë ta suku wan wooko a di goonliba aki, nöö luku nöö di basi ta luku ee a köni tjika, nasö ee a sa’ u du di wooko. Ma na sö a dë a di dini di u ta dini Jehovah. Ee i kë ko dë wan gaanwomi, nöö na sabi nöö i musu sa’ u du di peleikiwooko, söseei na dë nöö i musu dë wan bunu leima. Ma i musu abi dee fasi dee wan gaanwomi musu abi. Dee fasi dë sikifi a 1 Timoteo 3:1-7 ku Titusi 1:5-9. (Lesi ën.) A di woto aki, woo luku dii soni di wan baaa musu ta du faa sa toon gaanwomi. Woo luku unfa wan baaa sa ko abi wan bunu në a di kemeente, söseei a döösë u di kemeente. Woo luku tu, unfa a sa ko dë wan bunu hedima u di wosudendu fëën, söseei andi sa heepi ën faa ta dë kabakaba u heepi dee baaa ku dee sisa fëën ku wai.

I MUSU ABI WAN BUNU NË

4. Andi a kë taki u „dë gaan bumbuu sëmbë” di „oto sëmbë an musu sa feni fasi a di libi fëën faa konda taa an bunu”?

⁴ Ee wan baaa kë toon wan gaanwomi, nöö a „musu dë gaan bumbuu sëmbë. Oto sëmbë an musu sa feni fasi a di libi fëën faa konda taa an bunu”. Di soni aki kë taki taa dee wotowan u di kemeente musu ta si i kuma bumbuu sëmbë, u di i ta libi a wan fasi di fiti. Söseei na wan sëmbë musu sa feni soni a i u kuutu i ku leti taa ja bunu. Boiti di dë, i „musu abi bunu në a dee oto sëmbë dee an dë a biibi”. A kan taa dee sëmbë dee na dë a di biibi o ta kuutu i u di biibi fii hedi. Ma de an musu sa kuutu i ku leti taa ja dë u futoou, nasö taa i na wan bumbuu sëmbë (Dan. 6:4, 5). Fëën mbei a bi o bunu fii hakisi iseei taa: ’Mi abi wan bunu në a dee sëmbë u di kemeente, ku dee sëmbë dee na dë a di biibi ö?’

5. Unfa i sa lei taa i da wan sëmbë di ta suku „bumbuu soni wanwan nöö”?

⁵ „Bumbuu soni wanwan nöö a musu ta suku.” Ee i dë sö, nöö joo ta si dee bunu fasi u dee wotowan, nöö joo ta lo’ u gafa de. Ku piizii seei joo ta du bunu da wotowan, aluwasi ee sëmbë an bi hakisi i fii heepi de (1 Tes. 2:8). Faandi mbei wan gaanwomi musu abi di fasi aki? Wë biga de ta wooko ku gaansë u di ten u de, u heepi dee baaa ku dee sisa u di kemeente, söseei u du dee wooko di de musu du a di kemeente (1 Pet. 5:1-3). Hii fa de abi sömëni wooko ta du, tökuseei de ta dë waiwai u di de ta heepi wotowan a soni.​—Tjab. 20:35.

6. Andi da dee tookatooka fasi fa i sa lei taa i ’ta hoi wotowan a wosu ku piizii’? (Hebelejën 13:2, 16; luku di peentje tu.)

⁶ I musu dë wan sëmbë di ’ta hoi wotowan a wosu ku piizii’. Te i ta du bunu da wotowan, te kisi dee sëmbë dee i ku de an dë gaan mati, nöö hën da i ta lei taa i ta hoi wotowan a wosu ku piizii (1 Pet. 4:9). Wan buku di ta taki soni u Bëibel, ta taki taa wan sëmbë di ta hoi wotowan a wosu ku piizii, ta libi bunu ku hii sëmbë, te kisi dee sëmbë dee an sabi. Söseei ku piizii seei a ta kai de ko nëën pisi. I sa hakisi iseei taa: ’Sëmbë sabi mi kuma wan sëmbë di lo’ u tei wotowan ku wai, te de ko luku u a di kemeente u?’ (Lesi Hebelejën 13:2, 16.) Wan baaa di ta hoi wotowan a wosu ku piizii, ta tei hii pei sëmbë ku wai te de ko a di kemeente. Dee sëmbë dë sa dë sëmbë di pooti, sëmbë di ko hoi taki a di kemeente, nasö sëmbë di ta wooko taanga u da dee baaa ku dee sisa taanga. Wan u dee sëmbë dë, da di keling-gaanwomi.​—Ken. 18:2-8; Nöng. 3:27; Luk. 14:13, 14; Tjab. 16:15; Lom. 12:13.

7. Unfa wan gaanwomi ta lei taa an ’lobi möni’?

⁷ Ja ’musu lobi möni’. Di soni aki kë taki taa ja o ta suku u ko abi hia möni, nasö hia gudu. Aluwasi i gudu, nasö i pooti, tökuseei hii soni di i ta du musu ta lei taa di dini di i ta dini Jehovah, da di möön fanöudu soni a di libi fii (Mat. 6:33). I musu ta wooko ku di ten fii, di kaakiti fii, ku dee woto soni dee i abi, u dini Jehovah, u heepi dee sëmbë fii wosudendu, söseei u heepi dee sëmbë u di kemeente (Mat. 6:24; 1 Joh. 2:15-17). I sa hakisi iseei taa: ’Unfa mi ta si möni? Mi ta dë tifeedi ku dee soni dee mi abi ö? Naa mi ta möön buta pakisei a di kë di mi kë ko abi möön hia möni, ku möön hia gudu?’​—1 Tim. 6:6, 17-19.

8. Andi da wantu fasi fa i sa lei taa ja ta du „soni pasa maaka”, söseei taa i sa’ u „duwengi iseei”?

⁸ Te ja ta du „soni pasa maaka”, söseei te i sa’ u „duwengi iseei”, nöö hën da i sa’ u tii di libi fii a hii futu. Dee soni dë sa dë soni kuma, di njan di ja ta njan pasa maaka, nasö di bebe di ja ta bebe pasa maaka. Söseei a sa dë di piizii di i ta piizii a wan fasi di fiti, nasö di bisi di i ta bisi, ta seeka uwii a wan fasi di fiti. A kë taki tu taa ja ta waka a dee sëmbë u di goonliba aki baka, u di wan njunjun soni ko a mödö (Luk. 21:34; Jak. 4:4). I ta hoi iseei hii fa wotowan an ta libi bunu ku i. Ja ’ta bebe daan ku win dööngö’, söseei sëmbë an musu sabi i kuma wan sëmbë di ta bebe hia. I sa hakisi iseei taa: ’Di fasi fa mi ta libi, ta lei taa mi ta duwengi miseei, söseei taa ma ta du soni pasa maaka u?’

9. Andi wan sëmbë sa du u lei taa libi fëën „seti bunu”, söseei taa a „abi fusutan ta tii ën seei fu an ta du soni di na fiti”?

⁹ Wan baaa di kë ko dë gaanwomi „musu abi fusutan ta tii ën seei fu an ta du soni di na fiti”. Ee i abi di fasi aki, nöö hën da i ta tei ten wegi soni luku bumbuu ku dee mama wëti u Bëibel. I ta kai pakisei bumbuu a dee mama wëti u Bëibel, nöö di soni dë ta heepi i fii ko fusutan soni bumbuu, söseei fii ko abi di köni u fusutan soni. Ja ta biinga du soni hesihesi te ja sabi fini u wan soni, ma i ta mbei möiti fii sabi hii dee soni dee dë fanöudu ufö (Nöng. 18:13). Dee soni dë ta heepi i fii du soni di ta kai ku Jehovah. Ee soni „seti bunu” a di libi fii, nöö hën da ja ta du soni fanjanfanjan, ma i ta wooko ku juu. Boiti di dë, sëmbë sabi i kuma wan sëmbë di de sa futoou, söseei di ta du soni kumafa soni seti. Dee fasi aki o heepi i fii ko abi wan bunu në a sëmbë. Nöunöu woo taki u dee fasi dee di Bëibel taki taa wan gaanwomi musu abi faa sa dë wan bunu hedima u di wosudendu fëën.

KO DË WAN BUNU HEDIMA U DI WOSUDENDU FII

10. Unfa wan baaa sa lei taa a „dë wan sëmbë di sabi fa u tii hën wosu dendu a wan bunu fasi”?

¹⁰ Ee i tööu, nöö i kë ko toon gaanwomi u kemeente, nöö dee sëmbë u di wosudendu fii seei musu abi wan bunu në tu. I musu „dë wan sëmbë di sabi fa u tii hën wosudendu a wan bunu fasi”. Di soni aki kë taki taa i musu ta sölugu dee sëmbë fii ku lobi, söseei taa i ta du soni a wan bunu fasi u heepi de. A kë taki tu taa i ta hoi di Wosudendu Dini, ta mbei möiti u dee sëmbë fii nango a dee komakandi, söseei taa i ta heepi de u de ta du di peleikiwooko ku hii de hati. Faandi mbei dee soni dë dë fanöudu? Wë apösutu Paulosu bi taki taa: ’Ee wan sëmbë an sabi fa u tii hën seepi wosu dendu libi, nöö unfa a sa tii dee sëmbë u di kemeente u Masa Gaangadu?’​—1 Tim. 3:5.

11-12. Faandi mbei dee sëmbë u di wosudendu u wan baaa di kë toon gaanwomi musu ta libi a wan fasi di fiti? (Luku di peentje tu.)

¹¹ Ee i abi miii, nöö dee mii fii dee dë a i leiki jeti, dee na tapa 18 jaa jeti, musu ’ta lesipeki i ta piki i buka a soni’. I musu ta lei de soni, ta kiija de ku lobi. An dë u taki taa de o ta kë pëë, ta du soni u piizii. Ma tökuseei i musu lei de u de ta piki i buka a soni, u de ta lesipeki wotowan, söseei u de ta tja deseei a wan bunu fasi. Boiti di dë, i musu ta mbei möiti u heepi dee mii fii u de ku Jehovah ko dë mati, u de ta libi ku dee mama wëti u Bëibel, söseei u de ta mbei möiti u de go a fesi a di biibi u de sa dopu.

¹² „Dee mii u de seei musu ta waka a Masa Jesosi baka tu. De an musu ta libi fanjanfanjan, ma de musu ta piki de tata buka a soni.” Ee wan u dee mii u wan tata di dë a di biibi ko du wan gaan zöndu, nöö unfa soni o waka da di tata? Wë ee di tata an bi ta du soni u heepi di mii, söseei u leti ën buta a pasi, nöö a kan taa an o sa toon gaanwomi a di kemeente.​—Luku di Waktitoren u 1 u tinimu-liba u di jaa 1996, bld. 28, 29, pal. 6-7.

HEEPI DI KEMEENTE

13. Unfa i sa lei taa i „abi wan saapi libi”, söseei taa ja ’abi gaanfasi ta buta iseei hei tumisi’?

¹³ Dee baaa dee abi dee fasi dee wan Keesitu sëmbë musu abi, da baaa di sa heepi di kemeente gaanfa seei. Wan baaa di „abi wan saapi libi” ta mbei möiti u ta libi fiifii ku wotowan, söseei a ta heepi wotowan u de ta libi fiifii ku deseei. Boiti di dë, a ta haika dee wotowan, nöö a ta mbei möiti u ko fusutan fa de ta fii. Ee gaansë u dee gaanwomi buta taa de o du soni a wan fasi di ta kai ku dee mama wëti u Bëibel, i bi o dë kabakaba u wooko makandi ku de hii fa kandë ii bi o kë du soni woto fasi ö? Ja musu ’abi gaan fasi ta buta iseei hei tumusi’. Di soni aki kë taki taa ja musu ta kë u dee wotowan ta du soni nömönömö kumafa i kë. Ma i musu lo’ u haika di fasi fa wotowan ta si soni (Ken. 13:8, 9; Nöng. 15:22). „Hati fii an musu ta boonu hesi”, söseei ja „musu lo’ u suku toobi ta buja ta feti ku sëmbë”. Dee soni aki kë taki taa ja musu ta du soni di ta lei taa ja ta lesipeki wotowan, ma i musu ta du soni di ta lei taa i lobi de. U di i dë wan womi di lo’ bööböö libi, mbei te i ku wotowan abi toobi, nöö i fosu o mbei möiti u hopo du wan soni, sö taa i ku di wotowan fii sa ko ta libi fiifii ku unuseei baka, aluwasi ee a ta taanga (Jak. 3:17, 18). Te i ta fan suti ku sëmbë, te kisi dee sëmbë dee ta du ku u, nöö di soni dë sa kötö de hati.​—Kuutm. 8:1-3; Nöng. 20:3; 25:15; Mat. 5:23, 24.

14. Andi di Bëibel kë taki te a ta taki taa wan sëmbë ’an musu dë wan sëmbë di ko njunjun a di biibi’?

¹⁴ Wan baaa di dou dee maaka u toon gaanwomi ’an musu dë wan sëmbë di ko njunjun a di biibi’. Ja a’ fu dë sömëni jaa longi a di biibi ufö i sa toon gaanwomi, ma tökuseei i abi ten fanöudu fii sa ko dë gaangaan sëmbë a di biibi. Ufö i toon gaanwomi, i musu lei taa i abi sakafasi kuma Jesosi, söseei taa i dë kabakaba u wakiti Jehovah ku pasensi faa da i wooko di a si taa fiti i, a di ten di a feni bunu (Mat. 20:23; Fil. 2:5-8). I sa lei taa i „ta hoi dee wëti u Masa Gadu ta libi wan apaiti libi dëën” te i ta hoi iseei a Jehovah ta libi kumafa a kë, söseei te i ta du soni kumafa di ölganisaasi fëën ta lei u.​—1 Tim. 4:15.

15. Wan gaanwomi musu u dë wan gaan bunu takima u? Booko ën a piki möni.

¹⁵ Di Wöutu u Gadu ta taki gbelingbelin taa dee gaanwomi „musu sabi fa u lei sëmbë soni te de fusutan”. Di soni aki kë taki taa i musu dë wan gaan bunu takima u? Nönö. Na hii dee gaanwomi dë gaan bunu takima. Ma te de ta du di peleikiwooko, nasö te de nango luku dee baaa ku dee sisa, nöö de ta sa’ u wooko ku di Bëibel u lei wotowan soni, söseei u da de taanga. (Luku 1 Kolenti 12:28, 29 ku Efeise 4:11.) Ma hii fa a dë sö, tökuseei i musu ta mbei möiti fii ko dë wan möön bunu leima. Unfa i sa ko dë wan möön bunu leima?

16. Unfa i sa ko dë wan möön bunu leima? (Luku di peentje tu.)

¹⁶ „A musu ta dë ku di Buka u Masa Gadu nöömö kumafa a bi lei ën. An musu biëën möönsö.” Fii sa ko dë wan möön bunu leima, nöö i musu ta köni be dee soni dee i ta lei sëmbë ta kai ku dee lei u Bëibel. Fii sa dou di maaka dë, nöö i musu dë wan sëmbë di lo’ u öndösuku di Bëibel, söseei di lo’ u lei soni u Bëibel ku dee buku fuu (Nöng. 15:28; 16:23). Te i ta lei soni u Bëibel, nöö i sa ta buta pakisei a di fasi fa dee buku fuu ta wooko ku dee Bëibel tëkisi, sö taa i sa wooko ku de a di soifi fasi. Nöö te i ta lei sëmbë soni, nöö mbei möiti u heepi de u de ko lobi Jehovah, söseei mbei möiti u da de taanga u de kë du dee soni di de lei. I sa ko toon wan möön bunu leima, te i ta hakisi dee woto gaanwomi dee abi öndöfeni lai, söseei te i ta du dee soni di de piki i (1 Tim. 5:17). Dee gaanwomi musu „sa lei dee oto biibima ta da de hati a di biibi”, nöö so juu te a dë fanöudu, nöö de musu saanfa u da de lai, nasö u leti de buta a pasi. Ma te de ta du dee soni aki, nöö hii juu de musu ta du de ku lobi, söseei a wan saapifasi. Te i ta wooko ku di Wöutu u Gadu u lei sëmbë soni a di fasi aki, nöö joo ko dë wan möön bunu leima, u di a o dë taa i ta waka a di Gaan Mësitë fuu de kai Jesosi baka.​—Mat. 11:28-30; 2 Tim. 2:24.

I MUSU TA MBEI MÖITI GO DOU

17. (a) Andi sa heepi dee dinai u de sa ta mbei möiti go dou u de sa toon gaanwomi? (b) Andi dee gaanwomi musu ta hoi a pakisei te de ta luku ee wan baaa dou dee maaka faa sa toon gaanwomi? (Luku di pisi „Na suku fini poi te i ta luku ee wan baaa dou dee maaka u toon gaanwomi”.)

¹⁷ Baka di u luku dee fasi dee wan baaa musu ko abi faa sa toon gaanwomi, nöö so dinai sa ko ta si kuma nöiti de o sa dou di maaka dë. Ma a bunu fii hoi a pakisei taa Jehovah ku di ölganisaasi fëën, an ta suku fii ko ta du hii dee soni aki tuu finifini (1 Pet. 2:21). Di santa jeje u Jehovah hën o heepi i fii ko abi dee fasi aki (Fil. 2:13). I bi o kë ko ta du wan u dee soni u taki aki möön bunu ö? Wë a bi o bunu fii begi Jehovah faa heepi i. Mbei möiti u ko sabi möön hia soni u di fasi di i kë ko abi, nöö hakisi wan u dee gaanwomi andi i sa du fii sa go a fesi möön gaanfa.

18. Andi u ta da dee dinai taanga u de du?

¹⁸ Be hii u tuu mbei möiti go dou fuu abi dee fasi dee u taki u de a di woto aki, aluwasi ee u dë gaanwomi kaa (Fil. 3:16). I da wan dinai ö? Ee sö a dë, nöö mbei möiti go dou fii sa du möön hia soni u heepi dee baaa ku dee sisa fii! Hakisi Jehovah be a lei i andi i sa du fii sa dini ën möön gaanfa, nasö fii sa heepi di kemeente möön gaanfa (Jes. 64:8). Be Jehovah mbei i feni gaan bunu, u di i ta mbei möiti u dou dee maaka fii sa toon gaanwomi.