Andi sa heepi u te wa dë seiki u wan soni?

1-2. (a) Andi da wantu soni di dee dinima u Jehovah sa hakisi deseei? (b) Andi woo si a di woto aki?

HII u tuu sa ta hakisi useei so juu ee Jehovah ta kai u gaan soni tuutuu, aan toobi ee u njönku nasö ee u ko gaandi kaa. Nasö u sa ta hakisi useei ee u bi du soni ku köni a di ten di pasa. Pakisei taa wan njönkuwan bigi ta hakisi hënseei ee Jehovah ta booko hën hedi ku ën tuutuu. Di soni dë sa mbei taa an dë seiki möön ee a kë dopu. Nasö pakisei wan baaa di pasa 50 jaa. Di a bi njönku, a bi buta taa a bi o biinga a di dini u Jehovah baka, ma na a möni baka. Ma nöö a bigi ko ta gaandi, nöö a ta djei kuma an ta abi möni tjika u sölugu dee sëmbë fëën wosudendu. Fëën mbei a bigi ta hakisi hënseei ee a bi du wan bunu soni di a bi njönku. Nasö pakisei wan sisa di ko gaandi kaa di an dë gaagaa sö möön. A kan taa a ta fii bookosaka u di an sa du hia soni kuma fosu möön. Kandë i bi hakisi iseei dee soni aki kaa: ’Jehovah ta booko hën hedi ku mi tuutuu ö? U sösö mi disa so soni u du möön soni a dini u Jehovah u? Mi sa du soni da Jehovah jeti ö?’

² Ee wa suku piki u dee hakisi aki, nöö a sa pasa taa di biibi fuu ko suwaki, nöö te u kaba fëën, nöö wa o dini Jehovah möön. A di woto aki, woo si unfa di buta di u ta buta pakisei a dee mama wëti u Bëibel sa heepi u te wa dë seiki taa (1) Jehovah ta booko hën hedi ku u, (2) taa dee soni dee u bi du a di ten di pasa bi dë bunu soni, nasö (3) taa u sa du soni da Jehovah jeti.

ANDI SA HEEPI U TE U TA BOOKO U HEDI KU SONI?

3. Andi da wan soni di sa heepi u te u ta booko u hedi ku wan soni?

³ Wan u dee soni dee sa heepi u te u ta booko u hedi ku wan soni, hën da te u ta öndösuku soni a di Bëibel. Ee u ta du sö, nöö di biibi fuu o ko möön taanga, söseei woo ko dë gaan mati ku Jehovah, nöö woo sa „dë gingin a di biibi.”​—1 Kol. 16:13.

4. Unfa u „musu ta wegi hii soni luku ee de dë u Gadu tuu”? (1 Tesalonika 5:21)

⁴ Lesi 1 Tesalonika 5:21. Di Bëibel ta piki u taa u „musu ta wegi hii soni luku ee de dë u Gadu tuu.” Unfa u sa du di soni aki? Te wa dë seiki u wan soni, nöö u sa öndösuku soni a di Bëibel fuu ko si unfa soni dë tuutuu. Boo taa wan njönkuwan ta hakisi hënseei ee Jehovah ta booko hën hedi ku ën tuutuu. U di a ta pakisei sö, mbei a musu ta si kuma Jehovah an ta booko hën hedi ku ën u? Wë, nönö. A „musu ta wegi hii soni luku” te a ta öndösuku soni a di Bëibel faa sa ko fusutan fa Jehovah ta si ën tuutuu.

5. Unfa Jehovah sa „fan” ku u te u ta hakisi useei soni?

⁵ Te u ta lesi di Wöutu u Gadu, nöö a dë kuma Jehovah ta „fan” ku u. Ma ee u kë u Jehovah piki u te u ta hakisi useei soni, nöö na lesi nöö u musu ta lesi nöö a kaba. Ma u musu öndösuku soni a di Bëibel finifini fuu sa feni dee piki u dee soni dee u ta hakisi useei. U sa öndösuku soni a dee buku di di ölganisaasi u Jehovah ta seeka da u (Nöng. 2:3-6). U sa begi u Jehovah tii u te u ta öndösuku soni, söseei fuu si soni kumafa a ta si soni. Baka di dë, nöö u sa suku mama wëti a di Bëibel ku woto bunu soni di o heepi u. U sa lesi woto u sëmbë a Bëibel tu di bi miti di wan seei soni.

6. Unfa dee komakandi sa heepi u te wa dë seiki u wan soni?

⁶ Te u dë a dee komakandi fuu, nöö Jehovah ta „fan” ku u tu. Fëën mbei ee u nango hii juu a dee komakandi, nöö u sa jei wan soni a wan taki di wan baaa hoi, nasö a wan piki di wan sëmbë da. Kandë di soni dë da di piki di u bi abi fanöudu u heepi u ku di soni di u bi ta hakisi useei (Nöng. 27:17). Boo buta pakisei a wantu soni di sa heepi u te wa dë seiki u wan soni.

ANDI I SA DU TE JA DË SEIKI TAA JEHOVAH TA BOOKO HËN HEDI KU I?

7. Andi so sëmbë sa hakisi deseei?

⁷ I bi hakisi iseei wan daka kaa ee Jehovah ta booko hën hedi ku i tuutuu ö? Ee i ta si kuma ja dë wan hojo soni, nöö a sa kan taa a o taanga da i fii ta biibi taa i ku di Sëmbë di mbei hii di mundu sa ko dë gaan mati. A djei kuma di wan seei soni bi pasa ku Könu Dafiti. A bi tei ën u bigi taa Jehovah ta booko hën hedi ku libisëmbë. Fëën mbei a bi hakisi ën taa: „Jehovah o, ambë da libisëmbë fii ta buta pakisei a de sö? Ambë da dee mii u libisëmbë fii ta hoi de a pakisei sö?” (Ps. 144:3) Wë, naasë u sa feni di piki u di hakisi aki?

8. Andi Jehovah ta si a sëmbë te u luku andi 1 Samuëli 16:6, 7, 10-12 ta taki?

⁸ Di Bëibel ta lei u taa Jehovah ta booko hën hedi ku dee sëmbë dee di goonliba aki ta si kuma sösö sëmbë. Jehovah bi manda Samuëli go luku dee womi mii u Isai, nöö wan u de bi o ko toon könu u Isaëli. Isai bi kai seibi u dee womi mii fëën u ko miti Samuëli, ma an bi kai Dafiti di bi dë di möön njönkuwan.a Nöö Dafiti da di sëmbë di Jehovah bi kë. (Lesi 1 Samuëli 16:6, 7, 10-12.) Jehovah bi sabi ambë Dafiti bi dë tuutuu. A bi si taa di njönku kijoo aki bi lobi ën gaanfa seei.

9. Unfa i sa dë seiki taa Jehovah ta booko hën hedi ku i? (Luku di peentje tu.)

⁹ Pakisei unfa Jehovah bi lei taa a ta booko hën hedi ku i. A bi da i köni lai di i bi abi fanöudu (Ps. 32:8). Di soni aki ta lei taa a sabi andi i abi fanöudu tuutuu (Ps. 139:1). Te i ta wooko ku dee köni lai dee Jehovah ta da i, söseei te i si fa de ta heepi i, nöö joo ko dë seiki taa a ta booko hën hedi ku i (1 Klon. 28:9; Tjab. 17:26, 27). Jehovah ta si hii dee soni dee i ta du u dini ën, söseei hii dee soni dee i ta du u piki hën buka a soni. A ta si dee bunu fasi dee i abi, nöö a kë fii ku ën ko dë mati (Jel. 17:10). Nöö a o tei ën u bigi seei ee i kë ko dë mati ku ën tu.​—1 Johanisi 4:19.

ANDI I SA DU EE JA DË SEIKI TAA DEE SONI DEE I BI DU DA BUNU SONI?

10. Andi u sa bigi hakisi useei te u pakisei dee soni dee u bi du a di ten di pasa?

¹⁰ So juu, a sa pasa taa so sëmbë an dë seiki möön ee dee bunu soni di de bi du a di ten di pasa, da soni di de bi musu du tuutuu. Kandë de bi disa wan bunu wooko ka de bi ta kisi bumbuu möni u de bi sa dini Jehovah ku hii de hati. Ma baka di sömëni jaa ko pasa, hën de bigi ta hakisi deseei wantu soni. Kandë de ta buta pakisei a wantu sëmbë di bi du soni woto fasi, nöö a ta djei kuma de abi hia möni, ku wan möön bunu libi tu. Te u kaba fëën, dee sëmbë dee ta pakisei sö sa bigi hakisi deseei taa: ’U sösö mi disa soni, u du möön hia soni a di dini u Jehovah u? Nasö mi bi musu wooko möön taanga u mi bi sa feni möön hia möni a di ten aki ö?’

11. Un bookohedi di sëmbë di sikifi Psalöm 73 bi abi?

¹¹ Ee i ta hakisi iseei dee seei soni aki, nöö luku unfa di sëmbë di sikifi Psalöm 73 bi ta fii. A bi si kuma dee sëmbë dee an bi ta dini Jehovah bi dë gösöntu, de bi gudu, söseei taa de an bi abi na wan bookohedi (Ps. 73:3-5, 12). Te a bi ta si fa de bi abi wan suti libi, nöö a bi ta si kuma u sösö a bi ta dini Jehovah. ’Hii di daka di soni dë bi ta möön ën”, nöö a bi ta fii bookosaka (Ps. 73:13, 14). Andi bi heepi ën fu an fii sö möön?

12. Andi bi heepi di sëmbë di sikifi Psalöm 73:16-18 fu an fii bookosaka möön?

¹² Lesi Psalöm 73:16-18. Di sëmbë di sikifi di psalöm aki bi go a di Wosu u Gadu. Di a go dë, hën fusutan fëën ko limbo. A bi ko fusutan taa hii fa a bi ta djei kuma so sëmbë bi abi wan suti libi, tökuseei de an bi sabi fa libi u de bi o waka bakaten. Di a bi ko fusutan di soni dë kaa, hën an bi ta fii bookosaka möön. A bi ko si taa di dini di a bi ta dini Jehovah bi dë di möön bunu soni di a bi musu du. Te u kaba fëën, a bi dë kabakaba u dini Jehovah fajafaja go dou.​—Ps. 73:23-28.

13. Andi sa heepi i fii sa ko ta dë bööböö ee i ta si kuma ja bi du soni a wan bunu fasi? (Luku di peentje tu.)

¹³ Di Wöutu u Gadu sa mbei i ko dë bööböö tu. Unfa sö? I sa kai pakisei a dee bunu soni dee i abi, di wai di Jehovah ta wai ku i, ku dee bunu dee a ta mbei i feni. Nöö hoi a pakisei taa dee sëmbë dee an ta dini Jehovah an ta feni dee bunu dë. Dee sëmbë dë ta buta futoou a di wooko di de abi nasö a di möni di de abi, u di de an ta biibi taa de sa feni wan möön bunu libi bakaten. Ma fa i dë aki, ja o feni bunu a di ten aki nöö, ma joo feni möön gaan bunu a di ten di ta ko (Ps. 145:16). Hoi di soni aki a pakisei tu. Ja sabi fa libi fii bi o waka tuutuu ee i bi du soni woto fasi. Ma i sa dë seiki u di soni aki: Te i ta du soni u di i lobi Jehovah, söseei u di i lobi wotowan, nöö joo ko abi dee möön bunu soni a di libi fii. Dee soni dë o mbei i ta dë waiwai.

ANDI I SA DU TE I TA SI KUMA JA DË WAN HOJO SONI DA JEHOVAH?

14. Andi ta miti so dinima u Jehovah, nöö andi de sa ta hakisi deseei?

¹⁴ So dinima u Jehovah an sa du soni möön kumafa de kë, u di de ko gaandi kaa nasö u di de ta dë ku suwaki. Kandë de sa fii kuma de an dë na wan hojo soni da Jehovah. A kan taa de ta hakisi deseei taa: ’Jehovah ta si mi kuma wan sëmbë di a abi fanöudu jeti ö?’

15. Fuun soni di sëmbë di sikifi Psalöm 71 bi dë seiki?

¹⁵ Di sëmbë di sikifi Psalöm 71 bi ta fii bookosaka u di an bi sa ta du hia soni kuma fosu möön. A bi begi Jehovah taa: „Na go disa mi te sinkii u mi ko suwaki” (Ps. 71:9, 18). Hii fa a bi ta fii sö seei, tökuseei a bi dë seiki taa ee a bi ta dini Jehovah ku hii hën hati, nöö Jehovah bi o tii ën, söseei a bi o heepi ën. A bi ko si taa ee wan sëmbë ta du hii soni di a sa du a di dini u Jehovah hii fa soni ta taanga dëën, nöö Jehovah ta wai ku ën.​—Ps. 37:23-25.

16. Na un fasi dee baaa ku dee sisa de ko gaandi kaa sa du soni da Jehovah jeti? (Psalöm 92:12-15)

¹⁶ Ee i ko gaandi kaa, nöö pakisei unfa Jehovah ta booko hën hedi ku i apaiti tjika. Jehovah o heepi i fii du soni a di dini fëën aluwasi di gösöntu fii an dë sö taanga. (Lesi Psalöm 92:12-15.) Ka fii buta pakisei a dee soni dee ja sa du, nöö buta pakisei a dee soni dee i sa du. I sa da wotowan taanga ku di fasi fa i ta hoi iseei a Gadu, söseei ku di fasi fa i ta buta pakisei a de. I sa konda da wotowan unfa Jehovah bi heepi i a hii dee jaa de pasa, söseei i sa konda da de unfa i ta biibi dee soni dee a paamusi u tjika. Nöö na fëëkëtë taa dee fajafaja begi fii sa heepi wotowan tu (1 Pet. 3:12). Aluwasi andi ta miti u, tökuseei hii u tuu sa du soni da Jehovah, ku wotowan.

17. Faandi mbei wa musu ta tei useei maaka ku wotowan?

¹⁷ Ee a ta hati i taa ja sa du sö hia soni a di dini u Jehovah möön, nöö i sa dë seiki taa aluwasi andi i ta du, Jehovah ta tei ën u bigi. Kandë i ta kë tei dee soni dee i ta du maaka ku dee soni dee wotowan ta du. Ma na du di soni dë! Faandi mbei? U di Jehovah an ta tei u maaka ku woto sëmbë (Gal. 6:4). Malia bi da Jesosi wan gaan dii sumëësuti fatu (Joh. 12:3-5). Ma tu sensi nöö di pena mujëë di manu fëën bi dëdë kaa, bi buta a di möni këdë u di Wosu u Gadu (Luk. 21:1-4). Jesosi an bi tei dee tu mujëë aki maaka ku deseei, ma a bi si fa de bi lei taa de bi abi biibi. Jesosi dë kuma hën Tata Jehovah. Fëën mbei i sa dë seiki taa Jehovah ta kai hii dee soni dee i ta du gaan soni, u di i ta lei taa i ta biibi ën, söseei taa i lobi ën. A ta kai de gaan soni, hii fa i sa ta si kuma de an dë wan hojo soni.

18. Andi o sa heepi u te wa dë seiki u wan soni? (Luku di pisi „Di Wöutu u Jehovah sa heepi i te ja dë seiki u wan soni.”)

¹⁸ A sa pasa ku hii u tuu taa so juu wa ta dë seiki u so soni. Ma leti kumafa u bi si, di Wöutu u Gadu sa heepi u fu wa fii sö möön. Fëën mbei i musu ta mbei hii möiti fii ko sabi unfa dee soni dee i ta hakisi iseei dë tuutuu. A o heepi i fii sa ko dë seiki u soni. Jehovah ta buta pakisei a ju apaiti. A ta tei ën u bigi taa i du sömëni soni u lei taa di dini di i ta dini ën da di möön fanöudu soni da i. Fëën mbei i sa dë seiki taa a o du dee soni dee a paamusi i. A o mbei i feni gaan bunu. I sa dë seiki taa Jehovah lobi hiniwan u dee dinima fëën apaiti, söseei taa a ta booko hën hedi ku de.