Jehovah „ta kula dee sëmbë dee ta fii bookosaka”

1. Unfa Jehovah ta si dee dinima fëën?

JEHOVAH ta si hii dee soni dee ta miti dee dinima fëën. A ta si te u dë waiwai, söseei a ta si te u ta tjali (Ps. 37:18). A ta wai gaanfa seei te a ta si taa u ta du hii soni di u sa du u dini ën, aluwasi ee fuka ta miti u! Ma di möön fanöudu soni, hën da a ta dë kabakaba u heepi u, söseei u da u taanga.

2. Andi Jehovah ta du da dee sëmbë dee ta fii bookosaka, nöö unfa u sa feni wini u di soni dë?

² Psalöm 147:3 ta taki taa te wan sëmbë ta fii bookosaka, nöö Jehovah ’ta tai dee kamian fëën dee koti’. Di tëkisi aki ta lei fa Jehovah ta heepi dee sëmbë dee ta fii bookosaka. Andi u musu du fuu sa feni wini u di heepi di Jehovah ta heepi u? Boo luku wan woto. Wan data di abi öndöfeni sa du sömëni soni u heepi wan sëmbë di kisi makei faa ko bëtë. Ma ee di sëmbë kë feni wini u di heepi di di data ta heepi ën, nöö a musu wooko ku dee soni di di data ta piki ën. A di woto aki woo si andi di Wöutu u Jehovah ta piki dee sëmbë dee ta fii bookosaka, söseei woo luku unfa u sa wooko ku di soni dë.

JEHOVAH KË FUU SABI TAA A TA KAI U GAAN SONI

3. Faandi mbei so sëmbë ta fii kuma de an dë wan hojo soni?

³ A tjali taa sömëni sëmbë a di ten aki an ta lobi wotowan. Di soni aki ta mbei taa de ta libi hogi ku de, nöö de ta mbei de fii kuma de an dë wan hojo soni. Wan sisa di kai Helenataki taa: „De kiija mi a wan wosudendu ka lobi an bi dë. Mi tata bi lo’ u fon mi, söseei a bi lo’ u piki mi taa ma dë wan hojo soni.” A kan taa leti kuma Helen sëmbë ta libi hogi ku i, de ta kosi i, söseei de ta mbei i fii taa ja dë wan hojo soni. Ee sö a dë da i, nöö a sa taanga da i fii biibi taa sëmbë dë di lobi i tuutuu.

4. Unfa Jehovah ta si dee sëmbë dee lasi hati, nöö andi a paamusi taa a o du da de te u luku Psalöm 34:18?

⁴ Aluwasi ee sëmbë ta libi hogi ku i, i sa dë seiki taa Jehovah lobi i, söseei taa a kai i gaan soni. A „dë zuntu u dee sëmbë dee lasi hati”. (Lesi Psalöm 34:18.) Ee i „ta fii booko saka”, nöö sabi taa Jehovah si dee bunu fasi fii, hën a hai i ko nëën (Joh. 6:44). Hiniwan juu a ta dë kabakaba u heepi i, u di a lobi i gaanfa seei.

5. Andi u sa lei u di fasi fa Jesosi bi ta libi ku dee sëmbë dee wotowan an bi ta si u wan hojo soni?

⁵ U sa ko sabi fa Jehovah ta fii te u ta luku di fasi fa Jesosi bi ta du soni. Di Jesosi bi dë a goonliba aki, a bi ta libi bunu ku dee sëmbë dee wotowan an bi ta si u wan hojo soni (Mat. 9:9-12). Di wan mujëë di bi abi wan taku siki bi panjan di koosu buka u Jesosi u di a bi kë ko bëtë, hën Jesosi bi dëën kötö hati, söseei a bi gafëën u di a bi abi wan taanga biibi (Maik. 5:25-34). Jesosi ta du soni leti kuma hën Tata (Joh. 14:9). I sa dë seiki taa Jehovah ta kai i gaan soni. A ta si dee bunu fasi dee i abi, söseei a ta si di biibi di i abi ku di lobi di i lobi ën.

6. Andi i sa du ee i ta fii kuma ja dë wan hojo soni?

⁶ Andi i sa du ee i ta fii kuma ja dë wan hojo soni? Lesi Bëibel tëkisi di sa heepi i fii ko si taa Jehovah ta kai i gaan soni, nöö i kai pakisei a de b (Ps. 94:19). Ee ja dou wan maaka di i bi kë dou, nasö ee i lasi hati u di ja sa du sömëni soni kuma wotowan, nöö na tei iseei maaka ku wotowan, söseei na buta pakisei a dee soni dee ja sa du. Jehovah an kë fii du soni di a sabi taa ja o sa du (Ps. 103:13, 14). Ee a dë taa sëmbë bi du hogi ku i, nöö na pakisei taa ju hën mbei di soni dë pasa. Hoi a pakisei taa dee sëmbë dee ta du hogi, de Jehovah o kuutu, ma a o heepi dee sëmbë di wotowan libi hogi ku de (1 Pet. 3:12). Sandra da wan mujëë di sëmbë bi libi hogi ku ën di a bi dë miii. A bi taki taa: „Hiniwan juu mi ta hakisi Jehovah faa heepi mi u mi ta si miseei kumafa a ta si mi.”

7. Unfa dee soni dee miti u a u libi sa heepi u fuu sa dini Jehovah möön bunu?

⁷ Nöiti i musu si kuma Jehovah an sa tei i u heepi wan woto sëmbë. A da i di gaandi fii sa wooko makandi ku ën a di peleikiwooko (1 Kol. 3:9). U di soni miti i a i libi, mbei an ta taanga da i fii fusutan fa wotowan ta fii te soni ta miti de. I sa du sömëni soni u heepi de. Helen, di u bi taki soni fëën kaa, bi feni heepi, nöö fëën mbei a bi sa heepi wotowan tu. A taki taa: „Mi bi ta si kuma ma dë wan hojo soni. Ma Jehovah heepi mi u mi ko ta si taa sëmbë lobi mi, söseei a tei mi u heepi wotowan.” Helen ta wai seei taa a ta du di pioniliwooko.

JEHOVAH KË FUU BIIBI TAA A DA U PAADON

8. Andi Jehovah ta piki u a Jesaaja 1:18?

⁸ So u dee dinima u Jehovah ta fii bookosaka jeti u di de bi mbei föutu a di ten di pasa. Dee soni dë sa dë soni di de bi du ufö de dopu, nasö baka di de dopu. Ma wa musu fëëkëtë taa Jehovah lobi u gaanfa sö tee taa a paka di lusupaima da u, fuu sa feni paadon u dee zöndu fuu. U sa dë seiki taa a kë fuu tei di gaan bunu di a da u dë. Jehovah kë fuu biibi taa a o da u paadon ku hii hën hati, te u „seeka soni ko bunu baka”c ku ën. (Lesi Jesaaja 1:18.) U ta tei ën u bigi seei taa Jehovah di Tata fuu di lobi u seei, ta fëëkëtë dee zöndu fuu! Ma na di dë nöö, nöiti an ta fëëkëtë dee bunu soni dee u ta du.​—Ps. 103:9, 12; Heb. 6:10.

9. Faandi mbei a möön bunu fuu ta buta pakisei a di ten aki, söseei a di ten di ta ko, ka fuu ta buta pakisei a di ten di pasa?

⁹ Ee dee soni dee i bi du a di ten di pasa ta mbei i fii bookosaka, nöö mbei möiti fii ta buta pakisei a dee soni dee i ta du nöunöu, söseei a dee soni dee joo du a di ten di ta ko. Buta pakisei a di woto u apösutu Paulosu. A bi hati ën taa a bi du ku dee Keesitu sëmbë, ma a bi sabi taa Jehovah bi dëën paadon (1 Tim. 1:12-15). A bi ta pakisei dee hogi dee a bi du nöömö u? Wë, an bi ta dë ta pakisei dee soni dë leti kumafa an bi ta dë ta pakisei fa a bi dë wan Faliseima di sëmbë bi ta lesipeki (Fil. 3:4-8, 13-15). Ma Paulosu bi ta mbei möiti a di diniwooko fëën go dou, söseei a bi ta buta pakisei a di ten di ta ko. Leti kuma Paulosu, ja sa tooka dee soni dee pasa kaa. Ma i sa ta du soni nöunöu kaa u gafa Jehovah, söseei i sa ta buta pakisei a dee soni dee a paamusi i taa joo feni a di ten di ta ko.

10. Andi u sa du ee a di ten di pasa u bi du wan soni ku wan sëmbë di hati ën?

¹⁰ A kan taa i ta tjali gaanfa seei, u di i bi du soni di hati wotowan a di ten di pasa. Andi sa heepi i? Du andi i sa du u seeka soni ko bunu baka. Piki de taa di soni di i du ta hati i (2 Kol. 7:11). Hakisi Jehovah be a heepi dee sëmbë di i du wan soni ku de di hati de. A sa heepi i ku de tuu fuun sa hoi dou, söseei fuun sa ta libi fiifii ku unuseei.

11. Andi u sa lei a di woto u Jona? (Luku di peentje u di kafiti)

¹¹ Lei wan soni u dee föutu dee i mbei, söseei dë kabakaba u wooko makandi ku Jehovah kumafa a kë fii wooko dëën. Buta pakisei a di woto u Jona. Ka faa bi go a Ninifei leti kumafa Gadu bi piki ën, hën Jona lowe go a wan hii woto së. Jehovah bi bë wojo da Jona, nöö a bi lei wan soni a di föutu di a bi mbei (Jona 1:1-4, 15-17; 2:7-10). Jehovah an bi puu Jona kuma tjabukama. A bi toona mandëën faa bi sa go a Ninifei baka, nöö di pasi dë Jona bi piki hën buka. Jona an bi mbei di föutu di a bi mbei tapëën fuu an bi sa du di soni di Jehovah bi mandëën faa du.​—Jona 3:1-3.

JEHOVAH TA WOOKO KU DI SANTA JEJE FËËN U DA U KÖTÖHATI

12. Unfa Jehovah ta da u kötöhati te u dë ku wan fuka? (Filipi 4:6, 7)

¹² Jehovah ta da u di santa jeje fëën fuu sa feni kötöhati te fuka ta miti u. Buta pakisei a di woto u Ron ku Carol. Di womi mii u de di bi abi 39 jaa, kii hënseei. De taki taa: „Soni bi ta miti u e, ma di soni dë da di möön gaan soni di miti u. U bi ta begi Jehovah te wa bi sa duumi a ndeti, söseei u bi feni di kötöhati di Filipi 4:6, 7 ta taki soni fëën”. (Lesi ën.) Ee i ta fii bookosaka u di i dë ku wan fuka, nöö konda gbelingbelin da Jehovah unfa i ta fii. I sa fan ku ën sömëni pasi di i kë (Ps. 86:3; 88:1). Ta hakisi Jehovah di santa jeje fëën nöömö. Hii juu a o ta dë kabakaba u heepi i.​—Luk. 11:9-13.

13. Unfa di santa jeje u Jehovah sa mbei u feni taanga fuu sa dini ën go dou? (Efeise 3:16)

¹³ Wan soni miti i di ta mbei taa i ta fii kuma ja abi kaakiti möön u? Di santa jeje u Jehovah sa mbei i feni taanga fii sa dini ën go dou. (Lesi Efeise 3:16.) Boo luku di woto u wan sisa de kai Flora. Di sisa aki ku hën manu bi ta du di sëndëlengiwooko di hën manu waka dëën. Te u kaba fëën, de booko di tööu. Di sisa taki taa: „Di soni di mi manu bi du bi mbei mi ta tjali gaanfa seei, hën wanwan nöö mi bi ta pakisei. Mi bi ta bigi Jehovah faa da mi di jeje fëën fu mi bi sa hoi dou. Jehovah bi da mi kötöhati, nöö hii fa a bi hebi da mi gaanfa seei, tökuseei mi bi feni taanga, söseei mi bi sa hoi dou.” Flora ta fii taa Jehovah heepi ën faa ko ta möön futoou ën, nöö a dë seiki taa a o heepi ën faa hoi dou te fuka ta miti ën. Sisa Flora taki taa dee soni dee sikifi a Psalöm 119:32 ta lei fa Jehovah heepi ën. Di tëkisi ta taki taa: „Mi o hoi hii dee wëti fii, u di i jabi mi hati u mi sa fusutan soni möön bunu.”

14. Unfa u sa mbei di santa jeje u Gadu heepi u?

¹⁴ Andi i musu du baka te i hakisi Jehovah faa da i di santa jeje fëën? Du soni di o heepi i fii sa möön feni di santa jeje u Gadu. So u dee soni dë da di go di i nango a dee komakandi, ku di peleiki di i ta peleiki da woto sëmbë. Lesi di Wöutu u Jehovah hiniwan daka sö taa i sa ko ta möön si soni kumafa a ta si soni (Fil. 4:8, 9). Buta pakisei a dee woto u sëmbë u Bëibel di fuka bi ta miti, nöö kai pakisei a di fasi fa Jehovah bi heepi de u de hoi dou. Sömëni fuka bi miti Sandra, di u bi taki soni fëën kaa. A taki taa: „Di woto u Josëfu bi da mi taanga seei. Josëfu an bi mbei dee fuka dee bi ta miti ën ku di libi di sëmbë bi libi hogi ku ën, poi di dë di hën ku Jehovah bi dë mati.”​—Ken. 39:21-23.

JEHOVAH TA WOOKO KU DEE BAAA KU DEE SISA U DA U KÖTÖHATI

15. Ambë sa da u kötöhati, nöö unfa de sa heepi u? (Luku di peentje tu.)

¹⁵ Dee baaa ku dee sisa fuu sa da u „degihati seei” te fuka ta miti u (Kol. 4:11). Jehovah da u de baaa ku dee sisa fuu a di biibi u lei u fa a lobi u tjika. De sa da u kötöhati te de ta tei ten u dë makandi ku u ta haika u te u ta konda da de fa u ta fii tuutuu. De sa da u taanga ku wan Bëibel tëkisi, nasö de sa begi ku ud (Lom. 15:4). So juu wan baaa nasö wan sisa sa heepi u fuu pakisei di fasi fa Jehovah ta si soni, nöö di soni dë sa heepi u fuu hoi dou. Woto fasi dë fa de sa heepi u tu. De sa heepi u fuu feni soni u njan, sö taa u sa fii möön bunu.

16. Andi u musu du ee u kë u dee baaa ku dee sisa heepi u?

¹⁶ So juu woo abi u hakisi wotowan u de heepi u. Dee baaa ku dee sisa lobi u, nöö de kë heepi u (Nöng. 17:17). Ma a kan taa de an sabi fa u ta fii, nasö andi u abi fanöudu (Nöng. 14:10). Ee i ta fii bookosaka, nöö i sa piki dee mati fii dee dë gaangaan sëmbë a di biibi, unfa i ta fii. Piki de tu andi o heepi i. Kandë i sa fan ku wan nasö tu gaanwomi di i ku de lo’ u da woto. So sisa ta fii bunu te de ta fan ku wan woto sisa di dë gaansëmbë.

17. Andi da so soni di ta miti u, di sa mbei a taanga da u fuu feni degihati, nöö andi sa heepi u ku dee soni dë?

¹⁷ Duwengi iseei fu ja ta dë i wanwan nöömö. So juu i sa fii bookosaka sö tee taa i ta fii u dë i wanwan. A sa pasa so juu taa dee baaa ku dee sisa an ta kaba fusutan i, nöö de sa taki soni di o hati i (Jak. 3:2). Ma ja musu mbei dee lö soni dë tapa i fii feni di taanga di wotowan kë da i. Wan gaanwomi di de ta kai Gavin, abi wan suwaki di ta mbei a ta booko hën hedi gaanfa seei. A taki taa: „Möön gaanfa ma ta kë fan nasö dë ku dee mati u mi a wan kamian.” Ma Baa Gavin ta mbei möiti tökuseei faa ta dë makandi ku dee baaa ku dee sisa. A ta fii möön bunu te a ta du di soni dë. Wan sisa di de ta kai Amy taki taa: „U di so soni miti mi a di ten di pasa mbei taa a ta taanga da mi u futoou sëmbë. Ma leti kuma Jehovah mi ta lei fa mi sa lobi dee baaa ku dee sisa, söseei mi ta lei fa mi sa futoou de kuma ën. Mi sabi taa di soni aki ta mbei taa Jehovah ta wai ku mi, nöö mi seei ta wai tu.”

DEE SONI DEE JEHOVAH PAAMUSI U SA MBEI U FENI KÖTÖHATI

18. Un wini woo feni a di ten di ta ko, söseei andi u sa du nöunöu kaa?

¹⁸ Abiti möön Jehovah o puu hii dee soni dee ta mbei u ta fii bookosaka, söseei a o puu hii dee soni dee ta mbei u fii pen (Ako. 21:3, 4). A di ten dë, dee soni dee bi miti u, dee ta hati u gaanfa seei ’an o ta toobi u möön’ (Jes. 65:17). Leti kumafa u si, nöö nöunöu kaa Jehovah ’ta tai dee kamian fuu dee koti’. Na niinga u tei dee sömëni soni dee Jehovah ta wooko ku de u heepi i. Nöiti i musu fëëkëtë taa „a a’ toobi ku i.”​—1 Pet. 5:7.